الشمس اختفت

هذا الشاب عنده حساب على التويتر وكان اسم حسابه  " الشمس اختفت " محتوى الحساب الي جان موجود بالتويتر شخص كاعد ينشر اشياء يكول انو هوه بمنطقه الشمس بيها اختفت !! وكاعد تلاحكه فد ناس واحداث مخيفه
اول تغريده جان منزلها كاتب بيها
ساعدوني .. احنا بوسط النهار ومازالت الشمس غايبه !
ووراها نشر : اكدر اسمع انذارات العواصف لكن رادار الجو صافي !
ونشر بعدها وكال : وين الشمس ؟
وبعدها نشر فديو لتلفزيون على نشره الاخبار وديحجون عن هذا الشي !
وبعدها نشر تغريده يكول بيها : الكهرباء ضلت تفصل وترجع وكاعد اسمع اطلاقات نار بره
ولحد الان هوه داخل البيت ماطلع ابد
بعدها نشر تغريده يكول : ما اكدر انام لحد الان جاي اسمع اصوات جايه من بره اتوقع اصوات اطلاق نار
وبعدها نشر تغريده : نشره الاخبار كالت راح يرجع الطقس مثل ما چان بس لحد الان ماصار شي !
وبعدها نشر تغريده كال : انقطعت اشاره التلفزيون ولحد الان ماكو
وبعدها نشر تسويط : شنو رأيكم اطلع بره واشوف شنو الي ديصير ؟
جان اغلب المسوطين كالوله اي انو يطلع بره .
طلع بره وصور فديو ونشره وچانت الدنيا ضلمه جان شايل بيده ضوه ضل يمشي بالغابه وشاف ضوه احمر يرمش سريع وبي صوت عالي
وبعد مانشاف هذا  الفديو الناس ايست كالت خلاص بعد هذا اذا طلع بره راح يموت كالوله ليش ماتطلع بره تشوف النجوم ؟
بعدها رد عليهم بتغريده كاللهم : ما اكدر اشوف شي السما عباره عن شي سادها
ونشر تغريده ثانيه : حالياً جاي ارتجف بسبب الضوء الاحمر الي شفته المشكله جاي اشوفه بأكثر من مكان
ونشر تغريده بعدها وكال : هذا اليوم الثالث وماكو اي اثر للصباح ! واني وجاي اباوع من الشباك شفت واحد يركض بهستيريه والضوء الاحمر كاعد يلحكه !
بعدها غاب لمده يوم ونص او يومين والناس انكلبت عليه وافتقدوه وخافو عليه وين راح هذا ؟ مات ؟ شصار بي ؟
بعدين نزل تغريده وراها بيوم كال : اسف بس انكطع الاتصال
وبعدين نشر تغريده وكال : هذا اليوم هادئ وغريب مو مثل اول يوم اسمع صوت اطلاق نار وناس تصيح بس سمعت صوت مركبه فضائيه عبرت من فوك بيتي
وبعدين نشر فديو لصوت المركبه الفضائيه جان صوتها كلش عالي ومخيف .
بعدين نشر تغريده وكال : ما اكدر اميز شنو هذا الي عبر من فوك بيتي بس لمن فاتت حسيت بهوا حار اجه
بعدين نشر وكال : الحمدالله واحد من اصدقائي لحد الان حي ورد عليه
وبعدين نشر صور المحادثه بينه وبين صديقه دانيال
كاتب الصاحبه : رد عليه اذا انته حي لحد الان
وبعد فتره طويله رد عليه صاحبه وكال اله : يب اني حي
بعدين كال اله ليش مارديت عليه ؟ ليش خليتني اتصل عليك اربعين مره وما رديت عليه .. دانيال رد وكال : اسف بس جان تلفوني مابي شحن انتظرت ترجع الكهرباء وشحنته .. انته بعدك بالبيت ؟
رد وكال اله : اي اني بالبيت
دانيال كال اله : انته خليك بالبيت وانه راح اجيك بسيارتي بس هذا الوضع على ما اعتقد راح يطول يومين .
رد عليه : انته شنو تخبلت شنو تجي ماتشوف الوضع شلونه موزين !! على ما اعتقد هاي الفكره فاشله لا تجي
طبعاً دانيال ماسمع كلامه وكال اله اجيك يعني اجيك
بعدها نشر تغريده وكال بيها : اني خايف اكو شخص كاعد يباوعلي من الشباك واكف صارله ٦ ساعات متواصله ونشر صورته ..
بعدها وره ساعات نشر تغريده : هذا الشخص لحد الان واكف كبال الشباك وديشوفني واني هم كاعد اشوفه
بعدين كام وتقرب من الشباك يريد يشوف شكله وملامحه
يتبع ....