#البطل_المغمور2 "زهور القمر"
#جمان_فريد
#الجزء_الخامس_والأربعين "وشاء الله"
قبل لتقروا الجزء اي حد فاتاته صلاة او جي بيقرا في وقت صلاة سيب كل شي وبرا صل وبعدين اقرا...
الصلاة اولا..
وصلوا ع الحبيب💖
💐💐💐💐💐💐💐💐💐💐💐💐💐💐💐💐💐
"غير شوفيهم يام بالله عليك"
عفاف:باهي باهي وطي صوتك مرات تنزل نوسه وتسمع .
عرفه بقلق:باهي كلميهم...
عفاف قامت تليفوتها وقالت بتوتر:ان شاء الله خير ..
وحطت ع رقم سارة واتصلت بيها..
🍁وسارة وقتها في العيادة اللي كانت اقرب مكان لشارعهم رفعت اختها ليه ...
ومعاها ريحان اللي كانت بتموت من الخوف ع اختها..
ريحان ودموعها ينزلوا:ديما نقوللها كولي كولي معاش تحرقي اعصابك بابا تو يرضى..الله يسامحه بابا..ومسحت دموعها ومازال ينزلوا .
وسارة مقعمزة وحاط راسها بين ايديها والخوف مسيطر عليها..
رن تليفونها في نفس الوقت اللي طلعت فيه الدكتورة..
جتها ريحان تجري:شن يادكتورة اختي خيرها!؟
سارة لما سمعت شن قالت اختها فزت وقدمت بسرعه للدكتورة وهي تقول بلهفه وخوف:شني يادكتورة شن؟
الدكتورة:شن كانت مضربه ع الطعام!
ريحان:ايه الفترة الاخيره شبه ماتاكلش ونفسيتها تاعبه..
الدكتورة:واضح علقلنالها السيروم توا..ضغطها هابط هلبه حرفيا لحقتوا عليها..
قلب سارة قريب وقف لما سمعت كلام الدكتورة الأخير..
وريحان دموعها ينزلوا ورا بعض سيل..
الدكتورة:لازم يكون في اهتمام اكبر من هكي..امها وين،؟!
سارة بلعت ريقها اللي نزل في زورها وكأنه سم وقالت:امك متوفيه دكتورة..
الدكتورة بأسف:الله يرحمها..لازم يكون في اهتمام بيها اكثر من هكي واضح اللي صار فيها نتيجة اهمال..
سارة تسمع في كلام الدكتورة ومحمله نفسها كل الذنب..
وريحان وجعتها التوأم متاعها وع قد وجعها عليها زعلت من بوها اللي قسوته معاهم وصلتها لهني..
وهدا كله وتليفون سارة يرن ومافيش من يرد عليه..
🍁عفاف:ماتردش ياولدي..
عرفه قعد يشبحلها والقلق مسيطر عليه بعدين قال:نمشي بروحي وخلاص..
ومشي طول...
وعفاف تنادي فيه؛وين ماشي ياعرفه انت عارف هي وين توا!؟
🍁🍁🍁🍁🍁
وسارة طول خبرت زياد..
وهو جي من فوره وكان القلق مسيطر عليه ..
وصل في العياده وخش يجري سأل عنها في الاستعلامات قالوله مكانها ومشالهم طول...
••زياد بضيق:لاحول ولاقوة الا بالله العلي العظيم..
سارة وهي تبكي:كان تشوفها ياروحي كيف رايحه..كله مني اني المهمله اني نسيتهم ولهيت بروحي..
زياد حط يده ع كتفها وقال؛ماتقوليش هكي وبعدين لو في حد يتحمل مسؤوليه كلنا مش بروحك..
مسحت سارة دموعها وقالتله؛ماقلتش لبابا خفت..
زياد؛لازم يعرف توا كان عرف بعدين توقعي ردة فعله..
تنهدت بحزن وقعدت ساكته..
وهو قام تليفونه بش يتصل ببوه وبعد عنها..
وهي مشت لحجرة اختها..
خشت عليها..لقت توأمها شاده يدها بإيديها الزوز وهي تشوفلها ودموعها ينزلوا..
مشتلها ضمتها وقعدت تمسح في دموعها وهي تقول؛خلاص حبيبتي سادك بكي حالها باهي..
ريحان؛الدكتورة قالت باهي اللي لحقتوا عليها! تخيلي انتي ماروحتيش بكري واني قعدت في الحمام ندوش ومانندريش عليها شن كان صار توا..
زادت ضمتها سارة وقالت؛خلاص اسكتي معاش تفكري في الحاجه هادي وقولي الحمد لله اللي نجاها..
ريحان بلعت ريقها وقالت؛الحمد لله...
🍁🍁🍁🍁🍁
ومجرد ماوصل الخبر لهيثم من زياد..
سيب كل شي عنده وتوجه للعياده...
مش عارف كيف وصل بالسيارة لغادي وهو يسوق...
وين خش في العياده ووصل في غرفة جنان بعد ماسأل عن مكانها..
شاف زياد واقف قدامها..
وزياد شافه ...
قدمله هيثم بيسأله وقف فجأه لما حس الدنيا لفت بيه
حط يده الحيط اللي جنبه بش مايطيحش..
وزياد جاه يجري وشده..
ع طلعة سارة من الغرفه وين شافاته قالت بفجعه:بابا..
وجاته تجري شداته مع خوها وقعمزوه ع الكراسي..
زياد بخوف:دقيقة وجاي..
ومشي بسرعه..
وساره شاده بوها وهي تقول:بابا حبيبي تسمع فيا..اني والله مانبيك تعرف.
هيثم وهو يتكلم بتعب:كيف..تبيني مانعرفش!؟
سارة بخوف:بابا جنان كويسه مافيها شي بابا..
وهيثم ماقدرش يقاوم فقد وعيه طول..
سارة بصرخه:بابا...!
🍁واسعفوه في العياده بسرعه..
من فجعته ع جنان هبطله السكر...ومش بس كان مفجوع..
حتى ضميره كان يأنب فيه حس ان اللي صار فيها بسبب قسوته عليها....
وهي مازال غارقه في النوم ومش حاسه بحاجه...
🍁🍁🍁🍁
وفي مكان تاني..
طلعت رتاج من المستشفى مع امها وولدها وروح بيهم رشيد..
طول الطريق وعقل رتاج مش معاها...
وين تجي سيرة جهاد لازم يخطر عليها الماضي بكل احداثه..
وديما تحس بشعور ماحستش بيه في حياتها مع غيره..
اما رشيد خوها..
فكان يفكر في تصرف جهاد وشن اللي دفعه بش يديره برغم كل شي صار بيناتهم...
اصلا هو كيف عرف!؟
كل هالأسئله واكثر قاعده دور في عقل رشيد ومش لاقيلها اجابه..
وصل امه واخته وولدها للفيلا..
وتحرك طول اتجاه الشركه...وهو في الطريق..
دار اتصال..
رشيد:نبي نعرف مكانه وين بالزبط بسرعه.......
نهي المكالمه وهو يتفكر في المرة اللي شافها فيها وين جي مع السواق وماكانش يعرفه.. وبعد ماسأل عنه وعرفه من يكون انطرحت في عقله نفس الاسئله ومالقاش اجابه واليوم مصر يعرفها...
🍁🍁🍁🍁
واقف في العياده وهو يدور بعيونه ع حد من عيلة هيثم بالك يعرف حتى من بعيد شن صار في جنان!
ولما تعب من الانتظار قرر يمشي يشوف بروحه...
وين وصل في اول الممر اللي يرفع لغرفتها لقاه فاضي منهم ومافيش غير ممرضه جايه من اخره..
وين قربت توصل وقفها وسألها..
عرفه:السلام عليكم..
الممرضه:وعليك السلام..
عرفه:بنسألك اختي عن حالة وحده اسمها جنان الكاتب..
الممرضه:اها بنت الوزير هيثم الكاتب لاهي حالها باهي توا بس بوها مسكين تعب في جرتها ورقدوه في وحده من الغرف...
عرفه بضيق:لاحول ولاقوة الابالله..
:تقربلهم..
عرفه:جيرانا..ع العموم بارك الله فيك..ولف ومشي بيرجع وين ماكان...
🍁🍁🍁🍁
"نظمتوا امورها السيارة هادي"
:ايه تامه..
جهاد هز راسه وقعد ساكت وهو يمرر في نظره عليهم ...
ع خشة سيارة فارهه للورشه..
شبحولها الشباب اللي يخدموا عنده..بعدين هو التفت وشافلها..عجباته وقعد يتفحص فيها بنظره..
شويه وانفتح الباب ونزل صاحبها..
لماشافه جهاد ارتسمت ع وجهه ابتسامة جانبيه..
واحد من اللي يخدموا عنده قدم لصاحب السيارة وهو يقول:تفضل ياخونا.
وقفه جهاد وقال:تو نشوفه اني..
الشاب؛تم...ورجع لشغله..
وجهاد قدم لصاحب السيارة وقال:تفضل بشن نقدر نخدمك؟
رشيد:نبيك ع انفراد معليشي..
هز جهاد راسه بالموافقه..
رشيد:تفضل اركب..
هز جهاد راسه تاني ومشي ركب السيارة..ورشيد ركب معاه..
وتباعد بالسيارة عن الورشه شويه..
لين وقف بيها في مكان مستخطي..
جهاد؛نسمع فيك..
رشيد؛شن اللي خلاك دير هكي!؟
جهاد؛اللي يخليك انت دير لو كنت مكاني..
رشيد شبحله شويه وقال؛باهي كيف عرفت؟
شبح جهاد لرشيد وقال:كان ماتعرفش اختك صاحبة اختي وطبيعي نعرف اللي صار منها..
رشيد تفاجئ لما عرف ان صداقة دانيه وتهاني مستمره لكن رد يقول؛اختي نفسها ماتعرفش..
جهاد؛الدكتور هيثم يعرف..
رشيد قعد يشبحله وهو ساكت ويفكر..
جهاد؛ماتعبش روحك بكثرة التفكير الموضوع ابسط من هكي الواحد لما تجيه فرصه يدير خير مايوخرش وهدا اللي صار معاي..ولو انت ع الماضي والثار اللي بينا انت تعرف وكلكم تعرفوا ان مافي ليه ذنب في اللي صار غير صاحب الذنب نفسه نلومكم ونعذركم ع موقفكم ونعاود ونقولك اللي درته معاكم ديره حتى انت لو كنت مكاني..
رفع رشيد وهز راسه بعدين قال:ع العموم لايشكر الله من لايشكر الناس وانت ربي سخرك بش ترد الولد لأمه..بارك الله فيك..
جهاد؛ماعنديش فيه جميل..بس هكي في حاجه بنقولها ردو بالكم عليه الولد لاقوة الابالله دماغ واسلوب ونبيه ربي يحفظه..
رشيد شبح القدام وهز راسه..
ابتسم جهاد وقال؛سامحني تعبتك في المشوار وبارك الله فيك ع جيتك...السلام عليكم..وفتح الباب ونزل..
رشيد؛وعليكم السلام..
وبعد ماجهاد سكر الباب...رشيد تحرك طول بالسيارة..
وهو قعد معاه بعيونه لين درق...بعدين تنهد ولف ومشي للورشه...
🍁🍁🍁🍁
"جنونه"..
هي وعيونها مغمضات وشبه واعيه سمعت صوت ينادي فيها ردت:امم..
ريحان وهي عند راسها؛جنو..
فتحت عيونها شويه شويه وقعدت تشبح لوجه اختها..
ريحان بإبتسامه وعيونها مليانات دموع؛جنونه حبيبتي..
جنان بصوت متعب؛شن في ريحان!؟
ريحان؛دختي من قلة الماكله يامختشه جبناك هني..
حركت جنان عيونها حواليها وقالت:بروحك!؟
ريحان؛لالا سارة وزياد وبابا هني..
جنان شبحتلها بفجعه؛بابا! حي اكيد عرف...شن صار فيه!؟
ريحان؛شي حبيبتي كويس بابا..
جنان دموعها تنزلوا وسكتت معاش قدرت تتكلم من التعب..
شويه ودق الباب بعدين انفتح وخشوا زياد وسارة..
قرب زياد من اخته ومسح ع راسها وهو يقول:جنونه قلبي شن جو توا..
جنان؛بابا وين؟
شبح لسارة وهي قالت:شويه وجاي حبيبتي المهم شن حالك انتي..
جنان بنبرة باكيه؛حالي مش باهي لين نشوف بابا عارفاته اني اكيد تعب بعد عرف اللي صارلي..
زياد مسح دموعها وهو يقول:اش...خلاص..بابا كويس مافيه شي..
جنان:نبي نشوفه بالله عليكم...
ريحان شبحتلهم بنظرات قلق وحزن..
وهما الزوز يشبحولها بضيق ومش عارفين شن يردوا..
فجأة انفتح باب الغرفه..
التفتوا شبحوله..وتفاجئوا ع الآخر..
جنان بلهفه شديدة؛بابا!
وبملامح ابتسامه مرسومه ع الوجه تصارع في ملامح التعب قربلها وقعمزت حداها وضمها لحضنه وقال:روح بابا ياعمري..
جنان وهي تبكي:بابا اني اسفه وعد والله وعد معاد نعاود اللي درته..وبابا اني موافقه انك تتزوج عادي بابا راهو وحتى لجين كويسه..
تفاجئت بيها ريحان..
وزياد وسارة يشوفولها بإبتسامة عطف..
هيثم مسح ع ظهرها وزاد ضمها وهو يقول بإبتسامة تعب:اني مانبي شي غيركم انتم بنتي لانبي نتزوج ولاهم يحزنون..عقلي وقلبي معاكم ومانبي حد يشاركم فيا بكل...هيا بحبحوا...
ضحكوا في عز ماكانوا متأثرين..
جنان؛نحب بابا هلبه هلبه..
هيثم؛واني نحبكم ياعمري هلبه هلبات..
ضحكوا تاني..
وكانت بالنسبه لهيثم هديكا اللحظات احلى لحظات حياته..
اساسا سعادته ولت في شوفة وجوه صغاره تضحك وبس..
🍀🍀🍀🍀🍀
ورجعت من جديد الايام الحلوة الصافيه من أي مشاكل ممكن تعكرها..
تعلموا جنان وريحان من غلطهم كويس..والاهم من هدا كله اطمنوا ان بوهم حيقعد ليهم برواحهم..
🍁انانيه حلوة 🍁
وهالأنانيه هيثم بدي يحبها هلبه...ويستمع بأي فعل يصدر عنها..
بس اللي كان مضايقه حال سارة..
بعد اللي صارله هو وجنان رجعت لنفس الحالة..
تتفقد فيه وهو راقد وتراقب في حركة انفاسه..وتراقب في جنان حتى..منظر جنان وهي طايحه وفاقده الوعي قدامها مش رايح من بالها وهالحادثه عززت جانب الخوف المرضي مع الأسف..وكل خوفه هالحاله تأثر على علاقتها بزوجها..
••مقعمز قدام مراية المدخل وهي وراه تمشطله في شعره الشايب وتهدرز عليه..
سارة:بابا ماتفكرش تصبغه..
هيثم:ابدا لايمكن..
ضحكت بعدين طبست باست راسه ورجعت تمشط فيه..
هيثم تنهد وقال:تراقبي فيها ولا؟.
شبحتله من المرايه وقالت:ايه كون مطمن بابا في كل وقت..
هيثم:ديريلها زي ماديريلي كل ليله تخشي الدار تحطي راسك ع صدري بش تتأكدي ان قلبي قاعد يدق..ومرات تحطي صبعك تحت انفي بش تتأكدي ان الهوا يخش ويطلع..
سارة نزلت المشط وع وجهها بدت ملامح الضيق وقالت:خلاص بابا هي نوض..
قعد ساكت وهو يشوفلها من المرايا بعدين ناض..
هي خدت الشال وحطاته ع رقبته..
هيثم وهو يشوفلها:بابا بنتي مايجيش هكي راهو قداش بيقعد يراجي الراجل..كان تشوفي فروحك قاعده صغيره هو كبر راهو..
سارة شبحتلها وقالت:شكالك؟!
هيثم:ابدا..والله ولالمح حتى..بس اني يابابا نعرف ونزبط من نظرة..وراهو عنده حق..
سارة خدت العطر وبخت لبوها وهي تقول؛باهي بعد تروح تو نهدرزوا في الموضوع...وحطت العطر ع تركينه..
هيثم:تمام بعد نروح ع طول نهدرزوا ..مش تحسابي بتمشيني زي قبل..
طلعت طروف حلوة وحطتهم في جيب جاكيته وقالت بضحكه:حاضر..
هيثم:تي ياودي عندي فالسيارة..
ومشي لكندرته يلبس فيها..
ساره:لما تطلع من السيارة تنسى فيها نعرفك..
ضحك وحرك راسه يمين ويسار..
سارة:لما توصل كلمني..
مشي للباب وفتحه..
سارة:رد بالك وانت تسوق حسيت روحك تعبان وقفها طول..
هيثم قاطعها وقال بتذمر؛ياودي باهي حاضر حاضر..
وكيف جي بيمشي..
سارة؛بابا..
التفت..
سارة:كان حسيت روحك تعبان اتصل بيا ولازياد..
هيثم:لا اله الا الله...
وطلع وصكر الباب..
ضحكت ساره بعدين فنصت وقالت:لالا مرات يدوخ وهو يسوق..نرفعه اني احسن...
ومشت تجري لدراها بش تاخد عبايتها وحجابها...
وطلعتله تجري وحاولت يخليها توصله بس هو سكر راسه وهزبها ..وركب السيارة وطلع..
بعد ماطلع..
مشت قعمزت ع الطاوله وقعدت تبكي..
مضايقه من وضعها ومن اللي تحس بيه وكل ماتشوف روحها بتولي احسن تزيد تنكتس..
وهالفترة مشغول هلبه..اعلانات..ع برامج ع لقاءات...
وهي مش قادره تعطله شي وماتبيش تشغله بيها وبوضعها ماتبيش تكون عائق وعالة عليه ويحس اتجاهها بالنفور...
وهي في عز همها..رن جرس الحوش..
تنهدت ومسحت دموعها وناضت ومشت للباب وقالت:مني.
"افتحي"
خدت نفس ورسمت ع وجهها ابتسامه وفتحت الباب وهي تقول؛ياأهلا..
خش وهو يشوف لوجهها وقال؛ايوه تحسابي بيفوت عليا..
وسكر الباب..
سارة؛شن مافهمتش!؟
فاتح قرب منها ومسح حواف عيونها بروس صوابعه وهو يقول:علاش تتهربي مني!؟
سارة بضحكه؛نتهرب منه...
مسح بإيديه ع شعرها وقال؛ايه وفايتيني ونحس فيك معاش مدروتيني بكل ولما نتصل بيك يدوب تقولي كلمتين وتنهي المكالمه ولو نقول بنجيك تحطي الف عذر وحجه..
سارة شدت ايديه وهي تضحك وقالت؛ابدا مافيش منه الكلام هدا..انت الفترة هادي مشغوله مانبيش نشغلك معاي ..
قعد يتأمل في ملامح وجهها وهو ساكت..
سارة بضحكه؛خيرك!
فاتح؛وجهك تاعب هلبه..وعيونك ذبلانات واضح البكي واخد فيك حصه...شن في سارة..
سارة؛ياودي شي..هدا من تعب..
قاطعها وقال؛سارة ماتكذبيش..
هي معاش قدرت تظاهر اكثر من هكي..طول انهارت بالبكي..
وهو قعد يهدي فيها..بعدين خداها معاها وقعمزها ع الكرسي وقعمز مقابلها..
قعد شاد ايديها وهو يمسح في دموعها ويقول:شن صاير معاك احكيلي..
سارة بنبرة باكيه:مافيش فايده فاتح مافيش ..
فاتح؛لافي ياقلبي ونص..قتلك اني البدايه صعبه ومع الوقت تو تتحسني.
سارة وهي ترشف:خايفه نقعد هكي..انت شن ذنبك قولي تقعد مع وحده مريضه تمرضك في جرتها..
فاتح؛ومن قالك اني مش مريض ياختشه..تي اني مريض بيك انت ياسمح ومانبيش نبرا..
ابتسمت سارة بخجل من بين دموعها..
فاتح بإبتسامه؛ايوه روحي خليك هكي ياعيوني اضحكي وعيشي حياتك وكله خليه ع الله تو يشفيك ويعافيك ويرفع عنك الابتلاء هدا..واسمعي في الجديد اني معاك في الجلسات راهو لامفر..
سارة؛وشغلك.
فاتح؛طز ..
سارة وهي تضحك وترشف:لاشن طز نهاري مستقبلك..
فاتح؛مستقبلي هو مقعمز قدامي..
نزلت عيونها وهي تضحك بخجل..
وهو ابتسم بحب وقرب منها وباس جبينها بعدين قال؛ربي مايحرمني من هالوجه..
سارة بإبتسامه حب؛ولامنك حبيبي..
فاتح فنص وقال؛قلبي!
وسارة تضحك عليه..
وهو ضحك معاها بعدين باس راسها وقال:هي نوضي البسي بش نطلعوا..
سارة وقفت وقالت؛باهي..وقعدت تلبس في عبايتها وهي تقول..وين بترفعني
فاتح؛بنرفعك لمكان تولي فيه هكي بنيه صغيره تلعبي وتنقزي وتهبلي وفوتي امه جو الدكتورة والاديبه اليوم انسيه بكل..
سارة بعد مالبست شاربتها ضحكت وقالت:خلاص اني اليوم سويرة بس..وتعنقت ذراعه..
هو ضحك ومشي معاها للباب وقال:شن سويرة هادي...سرو احلى..
سارة بضحكه؛خلاص سرو...
وطلعوا الزوز من الحوش..وركبوا السيارة وانطلقوا لرحلة كلها متعه وفرح وشوية طيش..
••وفي مكان تاني في نفس البلاد والمدينه..
واحد تاني يتفنن في اظهار مواعبه في النكد ع مرته ....
تهاني:يعني من جد انت!؟
زياد؛لامني عم...جديات مالاشني !؟
تهاني:تلاثه شهور هلبه زياد!
زياد؛والله كان ماسكرتيش راسك راك مسافره معاي توا..
تهاني بضيق وحزن؛معقوله زياد هكي نهون عليك 3شهور بعيد هلبه والله هلبه ..
زياد؛والله زي مااني هنت عليك..
عقدت حواجبها وقالت؛وانت هدا كل همك نفسك وبس اناني ومتعجرف..
فنص فيها وقال:هيه ردي بالك من كلامك!
هي خافت وغيرت عيونها عنه..
زياد؛اول واخر مرة تكلميني بالأسلوب هدا!.
شبحتله وقالت بحده:معاش بنتكلم وبرا دير اللي يعجبك...
ومشت عنه وخلاته..
زياد بعصبيه؛ام تسكير الراس اللي عندها...
ومشي وهو معصب ع الآخر..
🍁في جهة تانيه من نفس المستشفى..
خليل وهو يتكلم بالتليفون؛وتي روحك بعد ساعه جايك.
"كان مشغول مش لازم نأجلوها"
خليل؛لاوين تأجلي هدا موعد تابت نواستي مش اول عيل تعرفي عاد..
ضحكت وقالت..
"تمام خليلو نستنى فيك"
خليل بإبتسامه؛تمام..السلام عليكم..
"وعليكم السلام"..
وسكر ومشي يكمل باقي شغله ويشوف باقي الحالات..
🍁🍁🍁🍁🍁
فهالوقت كذلك..
درست قدام ورشه جهاد سيارة سودا عاليه وكبيرة..
انفتح الباب السحاب متاعها ونزل منها طفل صغير..
لما شافه جهاد ناض وقف وهو مبتسم..
والولد خش وهو يقول:السلام عليكم...
جهاد بإبتسامه:وعليكم السلام..اهلا يازعيم اهلا..
كنعان بأبتسامه:مش معطل..جيت نعطيك هادي مني اني..
خدي جهاد كيس الهديه وقال:شن هدا!،
كنعان؛بعدين تعرف..وتاني حاجه نبي نقولك شكرا..
جهاد:اللي درته واجب مايقولوش عليه شكرا..
كنعان؛زي ماتبي..السلام عليكم..
ولف ومشي يجري للسيارة..
وعيون جهاد معاه...لين شاف للباب المفتوح..
وبانت عليه هي..
كانت تشوفله بنظره صعب عليه فهمها..
وفيسع مااختفوا عيونها لما تسكر الباب..
وتحركت السيارة وهو قعد معاها بعيونه لين درقت..
بعدين شبح لكيس الهديه..
طلع منه البوكس وفتحه...لقاهم مجموعه سيارات صغيرة من جميع الموديلات ..رسمت ع وجهه ابتسامه حلوة هالهديه وخلت قلبه يدق بقوة من الفرح..
🍁وهي كان قلبها يدق دقات مشاعرها مختلفه ومش مفهمومه..
كان السواق يمشي بيهم مسافه طويله...لين طلعهم برا طرابلس لوحده من ضواحيها..
ماشيه لأهل ولدها..تلبية لرغبته...
•••همانه؛شن تبي جايه الخليقه هادي..
امها؛اكيد عندها كلمتين جايه تقولهم لكن وحق من خلقك لما نمسح بيها الوطا..
همانه؛تبيها الممسحه..
وخشوا عليها الزوز للصالون..
همانه؛خدت رجلك ع الحوش!؟
رتاج؛مش اني اللي جايتكم خوك..
همانه شبحن لكنعان بحده وقالت؛ماعنديش خوت غير خوتي الكبار..
كنعان وقف وقال وهو يحرك في يده؛اسمعي لو سمحتي لوسمحتي خليني نتكلم باهي.
امه ابتسمت..
وهما قعدوا يشبحوله بعدم تقبل..
هو حك خده وقال:اسمعي روحي انتي ولدك لبوه راهو بوه يحبه هلبه ..
همانه بسخريه؛حقه!ماناقص كان فرخ مازال ماطلعش من الدحيه يقولي شن ندير وشن مانديرش!
شبحتلها امه من فوق لتحت..
كنعان؛لالا اني مش صغير ونعرف..تو ولدك لما يكبر ويولي زيي ماعنداش بو يرفعه ويجيبه ويلعب معاه ويتكلم معاه يولي حزين هلبه والله..مهما تعطيه فلوس وتجيبيله العاب يقعد حزين ويبي بوه..سعدوده بوه قاعد حي يقدر يعرفه لكن اني لا..
همانه ماقدرتش تقاوم دموعها نزلوا غصب عنها وين تفكرت بوها..
وامها اثر فيهل كلام كنعان.
ورتاج تشبح لولدها بإبتسامة ألم وهي تمسح في دموعها..
كنعان:انتي علاش ماتبيش تروحي..
همانه رشفت وقالت؛بوه مش كويس ..
كنعان؛لالابوه طيب هلبه هكي اني شفته دارلي هلبه حاجات حلوة..شرالي حوايج عطاني نلعب بتليفونه خلاني نتفرج ع التلفزيون ومرات يلعب معاي..مش شرير بكل هو طيب
همانه قعدت تمسح في دموعها وتتفكر في ايامها الحلوة مع راجلها...
كنعان؛انت ماتحبنيش نعرف..
شبحوله الزوز.
كنعان؛لكن تحبي ولدك روحوا لحوشكم بش يعيد سعيد مش حزين زيي..
رتاج ناضت وضمت ولدها اللي كان يعبر عن مافي داخله اقوى تعبير بلغة الاطفال البريئة المحبوبه اللي تخش القلب.
وامه ومرت بوه كانوا متأثرين ع الإخر..
كنعان وهو في حضن امه يشوف لأخته قاللها؛تروحي؟
همانه غمضت عيونها وابتسمت بعدين فتحت عيونها وهزت راسها بالموافقه..
هو ابتسم بفرح وقال ابتهاجا:خشي...
هما ضحكوا من بين دموعهم...
🍁وطلعت رتاج من غادي بعد ماولت في بوادر علاقة اخوة بين ولدها وأخته..
اما هي لافكرت تاخد حقها ولاتنتقهم لإنها مش حتكسب شي وحتزيد ضيع ايام من عمرها ع الفاضي..
بس حيقعد انعدام العلاقه بينها وبين ضرتها سابقا وبنتها قائم....
🍁🍁🍁🍁
في النادي..
كانت تلعب في مباراة تدريبيه...
وماكانش في حد حاضر في المدرجات الا شخص واحد..
تكرر حضوره للنادي وهي ركزت عليه بس ماعرفتش من يكون..
اكثر شي ركزت عليه هو متابعته ليها في اللعب..
حست وكأنه مهتم بيها..
وهو في الحقيقه كان وين يشوف تخطر عليه اختها واهتماته بيها دافعه الاكبر اختها اللي مش قادر يحول ملامحها الحنونه والبريئة من بين عيونه..
ومافي الا لحظات حضر فيهم شويه ومشي ...
بعد ماتمت المباراة...
ريحان؛بنات..من هو هدا اللي ليه كم يوم يجي يحضر في المباريات متاعنا..
:حي قصدك ماتعرفيش هدا اللي شري النادي متاعنا..
ريحان وهي متفاجئة:حقه!
:والله حتى اسألي الكوتش..
هي قعدت ساكته ومتفاجئة هلبه تعرف رؤساء النوادي الرياضية غالبا شيابين اول مرة تشوف شاب صغير في العمر رئيس لنادي رياضي..!
🍁🍁🍁🍁
"تفضلوا تفضلوا"
قعمزوا مريم وامها وهما يقولوا:يزيد فضلك.
حنان:شويه يخش ياسر بالصغار ونطلعوا..
مريم؛مشوبه منها طلعة السوق..
حنان:وعلاش!
امها:تقول شن بندير الدبس واني بنطلع برا من بيعزمني ويشوفني..
حنان:كان هدا اجري العربي اجار لنهار المحضر..
مريم؛حتى اني قلت هكي..
امها:ايجار وعفن خيي..
ضحكت حنان وقالت؛نأجروها من احسن مكان عمتي..
امها:لو من وين تاخديهة تقعد ملبوسه قبلها..
مريم؛سكرت راسها معاش تحاولي..
امها:انتم اللي تسكروا في روسهم..
حنان بضحكه؛صلي ع النبي ياعمتي خلاص ماصار شي تو حني فالطلعة هادي ناخدوا المهم المهم..
مريم:ايوه هو هدا..
امها:ديروا مايعجبكم شن دخلي اني..
ضحكوا الزوز..
بعدين مريم قالت؛قاعد ياسر يمشي للوليد..
حنان؛مالا شنو ديما ربا عليه كبد خلاص..
مريم بإبتسامه:ربي يجعله في ميزان حسناته..
امها:تصخف كان خالتك خديجه مسكينه عقلها خف..
حنان؛باهي اللي قاعد فيها اصلا..
مريم قعدت تسمع في كلامهم وهي تفكر بحزن بعدين قالت:لاحول ولاقوة الا بالله...
🍁🍁🍁🍁
فتحت باب الفيلا الدخلاني..
وخشت هي ولدها..
تلقتها امها وهي تقول؛وينك هدا كله..
رتاج؛مش عارفه اني ماشيه ل*****
سدينه؛عارفه...لكن راجلك داخل ليه نص يراجي فيك..
رتاج؛عبدالحميد!..
سدينه؛خشي خشي شوفيه..
رتاج هزت راسها وقالت؛وينه هو
سدينه؛فالصالون...
رتاج؛تمام...خلي كنعان معاك..
خدت سدينه كنعان..ورتاج مشت بإتجاه الصالون..
وصلت فيه وخشت وهي تقول؛السلام عليكم..
عبدالحميد ناض وقف يحسابها بتسلم عليه لقاها قعمزت طول ومااهتمتش لأمره..
حس بالإحراج ولى قعمز وهو يقول:وعليكم السلام..
رتاج بإبتسامة استغراب متهكمه:كأنه مازال بكري علاش جاي توا..
غمض عيونه وتنهد بعدين فتحهم و قال:كانت طايرتلي منك هلبه..حسيتك مش مدورتني ولاهامك امري..
رتاج؛اني خسرت ولدنا يعني مش حاجه عاديه بس تتعامل معاها هكي..توقعت نفتح عيوني نلقاك فوق راسي..وللأسف فتحت وشفت كل الوجوه ماعدا وجهك انت وجه راجلي!
عبدالحميد؛عندك حق تزعلي لكن صدقني حتى اني صدمني اللي صار وتوقعت انك تبي تخلصي مني وخلاص..
بإبتسامةقهر قالت؛قبل كنت متمسكة بيك ع قد ماشفت منك تقدير واحترام ومعامله راقيه..بس بعد كل اللي صار بديت نحس اني معاش متمسكه بيك زي زمان.
ملامح وجهه تغيروا...
رتاج؛طلقني عبدالحميد..الاحسن ليا وليك انك طلقني..
هو قعد يشبحلها بصدمه..
وهي تشوفله ببرود...
شويه وتبدلت ملامح وجهه للحده وقال...
"انتي طالق"..
وناض ومشي طلع من حداها...
وهي قعدت تبع فيه بعيونها لين درق..
وشويه وسمعت باب الفيلا انفتح وتسكر..
ع خشة امها عليها وهي تقول بصدمه:حي عليا خير دعوتك هبلتي!
رتاج؛بعد اللي صار واللي داره مازال تبيني نقعد ع ذمته!؟
سدينه؛ماتكونيش ناكرة للعشرة يابنتي ياما دارلك ودار ع خاطرك الراجل..
رتاج؛في الوسع يام في الوسع ..بس وقت الضيق شفته ع حقيقته وكلكم شفتوه شن دار..وفوقها اللي داراته بنته اني خلاص معاش عندي ليه خلوق طاح من عيني معاش زي قبل يام..مانقدرش نعيش مع راجل طايح من عيني...
ومشت طول للدروج وخلتها..
سدينه بحسرة؛ياحليلي ياربي مرة ارمله مرة مطلقه شن هالحظ اللي عندك يابنتي بس!..
🍁🍁🍁🍁🍁
الساعه الثامنة مساءا..
"بست جنو"
جنان:نعم..
قعمزت ريحان مقابلتها وقالت:اسمعي بنحكيلك حاجه وحي عليك تتسهوكي ولاتعلقي تعليق بارد زي وجهك..
جنان بضحكه:باهي احكي..
حطت ريحان شعرها ورا وذنها وبلعت ريقها وقالت؛من فترة..في النادي.
جنان؛ايه..
ريحان؛ايه..المهم..في حاجه غريبه تصير في الاول ماعدلتش باهي بس بعدين حسيت الوضع غريب هكي ووقفت عنده.
جنان:باهي احكي نشفتيلي دمي..
ريحان؛اهو نحكي يادراه الكبد شن ندير .
جنان:خشي في الموضوع طول..
ريحان؛ااففف منك مانحبش هكي..وخرت شعرها للخلف وقالت..في واحد هكي..
جنان فتحت عيونها ع وسعهم وقالت:ايه..
ريحان؛وترتيني...خليني نحكي زي الناس..
جنان بضحكه؛باهي احكي هي..
ريحان؛احمم..المهم هو يعني يجي يتفرج علينا وين ندربوا وع مبارياتنا لما مشيت سألت قتلهم من هدا..قالوا صاحب النادي..
جنان؛باهي وبعدين شني..
ريحان؛هو مش كبير راهو صغير قريب عمره من عمر المثنى ولد عمو احسان.. جنان؛باهي ريحان حبيبتي الوضع الغريب وينه في اللي تحكي وينه انا لاأراه..
ريحان حركت عيونها حواليها وقالت؛يعني..شبحتلها...هدا اللي قتلك عليه..نحس فيه مركز عليا..
جنان بدت تضحك..
ضربتها ريحان ع يدها وقالت...ياحقيرة..
جنان هدت ضحك وقالت؛تعرفي اني ع شن نضحك..ع ان انتي ع قد ماعندك معجبين اول مرة تلاحظي واحد فيهم..
ريحان اشرت ع روحها وقالت:اني عندي معجبين!!!
تعبوا عيون جنان وهي مبتسمه وهزت راسها بإيجاب وقالت؛هلبه..غير انتي ماتشبحيش فيهم..
ريحان حركت يدها للخلف بلامبالاة وقالت؛فوتيني منهم توا..المهم اني ركزت على هدا لأنه غريب..
جنان:امم..شن رايك نحكوا لسارة..
ريحان بخوف:لالالا...خلاص انسي ماحكيت شي..
جنان بضحكه؛جبانه....
جاهم صوت سارة من دارها..
"هيا جنان ريحان ابدوا وتوا العشي"
جنان:بابا بيتعشى معانا!؟
"لالابابا عشاه برا حتى زيزو"
الزوز مع بعض قالوا:باهي باهي..
وناضوا بسرعه طلعوا من الصاله للكوجينه..
🍁🍁🍁🍁
وفي حوش جيرانهم..
كان كل حد يغني ع ليلاه...
تهاني حابسه روحها في دارها وتبكي
وامها سهرانه تتفرج ع التلفزيون وحداها بدر يتفرج حتى هو...
اما جهاد فكانت متكي حدا عرفه اللي كان يقرا بجد واجتهاد خلاص امتحانات الشهاده قربوا...
🌼وفوق في شقة خليل..
خشت نسيبه للدار بعد ماكانت في الكوجينه دير في عشي..
تفاجئت وين شافت بوكس هدايا كبير شكله حلو محطوط ع السرير..
ع جية خليل ابتسم وقال؛بري افتحيها..
نسيبه بإبتسامة حماس:شن فيها؟
خليل:شوفي بروحك..
هي شبحتله شويه بإبتسامة ريبه..
بعدين مشت للبوكس وبدت تفتح فيه...
بعد ماحولت الغطا..لقت البوكس معبي ورد قعد تضحك..
بعدين بانت عليها حاجه حمراء كان واضح بوكسنج..
قامت وهي تضحك وتقول:الله قداش ليا عليهم..
وهو يتأمل في ردات فعلها بإبتسامه.
حطت البوكسينج ع تركينه وبدت تحول في الورد لأنه لاحظت تحته شي..
طلعتهم...وقعدت تتفحص فيهم...
طلعوا خمارات لتغطية الوجه..لون بني غامق..ولون بنفسجي غامق..
شبحت لخليل..
خليل:تتفكري قبل لما رقيتك رتبه في الحجاب من وشاح وعباية عادي...لشاربه وعبايه شرعيه..وتو بتحصلي ع ترقية جديده..
وحط عيونه ع الخمارات..
هي شبحتله هلبه وقعدت تفكر..
خليل؛مش فارض عليك شي تبي تترقي او ترفضي الترقيه براحتك..
رسمت ع وجهها ابتسامه حلوة وقالت:اكيد قبلتها ياافندينا الشيخ..
ضحك وقربلها وحاوط راسها بيده وباسه بعدين قال:ربي يباركلي فيك.....
" ياحب عمري"
🍁🍁🍁🍁🍁
ومن حب العمر لفرصة عمر..
بعد مايعدي شهر كامل...
عطلوا فيه البنات عن المدارس وتفرغوا للتجهيز لعرس اسيد خو فاتح..
فهالشهر كان زياد برا البلاد ورافض يتواصل مع تهاني ولاهي تبي تعبره..
عكسهم فاتح وسارة اللي كانوا عايشين احلا ايامهم...
وكل مالهم يزيدوا يقربوا من بعض..
•• "ياهلا"
سارة بإبتسامه:فاضي ولا
فاتح:مش فاضي نفضى لحب قلبي
ضحكت وقالت:تمام...وجهت الكاميرا ع سريرها وقالت..اختار ترا الوردي الغامق ولاسكري..
فاتح وهو يشوفلهم:امممم..سكري فوتيه وفوتي جو منافسة العروسه خيرلك..
ضحكت
فاتح:الحلوي فوتيه مارتحتلاش افتحي دولابك وخليني نشوف بروحي ..
سارة:شن ماارتحتلاش هادي بنخدمه معاك اني!؟
فاتح:افتحي الدولاب قلنا..
سارة بإستفزاز:ممباااهي .
ومشت للدولاب وقعدت توريله في القفاطين
فاتح:اهوا اهوا هذا القهوي اللي يلمع مش عادي..
سارة:لبسته في عرس صاحبتي قبل..مايجيش..
فاتح:خلاص مالا اني تو نجيبلك واحد زيه ع ذوقي تمام..
وجهت الكاميرا ليها وهي تشوفله..
رفع حواجبه ونزلهم وهو يقول:مافيش نقاش..
سارة:مممباااهي..
فاتح:معاش تقوليها قلنا ولا!؟
سارة بضحكه:مممبااهي..معاش نقولها..
رفع حواجبه وقال:انتي هكي! باهي اصبري خلي نبعتلك رساله ..
سارة بضحكه:لالالا خلاص انبصر معاش نعاودها...
فاتح وهو يأشرلها بيدع:باااااي..وسكر عليها...
وسارة تضحك..
شويه وجتها رساله..
"زيدي اظحكي اظحكي اظحكي مادام الظحك بالبلاش"
تقشعر جسم سارة وهي تقول؛لاياربي لايحتمل...
وكتبتله طول التصحيح وبعتاته ....
"اضحك ضحكتك ديما حلوة"
اتصل بيها طول وهي ضحكت وقالت؛حرام عليك والله التعطيله فهالعرس خلاص ياقلبي نبيك تكوني رفيقتي واني مانمشي..
سارة بإبتسامة:اصبر الصبر حلو..
تنهد وقال..
"ربي يعطيني الصبر "
#تفسير
#البطل_المغمور2
