- لم يرشدنا أحدهم يوماً إلى الطريق ، لقد تعلمنا كل شيء بالتجربة والخطأ🥀🔕..................
السلام عليكم خواتي 😊🖐
بغداد /الثلاثاء ١٠ مايو /٢٠٢٢/الساعة الرابعة فجرا ابتدأت اكتب ما بداخلي واعبر عن حياتي &
صراحة ماعرف شلون ابدي الكلام كاعدة ومجايني نوم واجتني فكرة اكتب عن حياتي واستمع لرأيكم ماعرف شوكت راح أكملها وشوكت راح انشرها اكتب واللة كريم .
حبيت أشارك حياتي ومعاناتي وياكم وماعرف اصلا منو راح يقرأ القصة ولا عندي متابعين ولا ادور شهرة ولا كاتبة قبل مجرد حبيت احجي لبداخلي كأي بنت عادية 🤷♀️
"اني رغد من بغداد عمري ٢٠ سنة متزوجة وأم لولدين اللة يحفضلكم أولادكم يارب.
احنة عائلة تتكون من ١٢ نفر بابا وماما و٣ ولد ٧ بنات
اني المرتبة السادسة بالبنات اني طبعي مثل ما يكولون عني فطيرة احب اضحك واتشاقة طول الوقت انجرح بس اغلس واسمع كلام لاكن اتغاضى عنة هواي يأذوني بكلامهم لان اكول عادي ما بيها شي واقنع نفسي انو شقا ما يزعل🙂
"سنة ال ٢٠٠٩ اتوفى والدي وكان عمري بوقتها ٨ سنوات صف ثاني ابتدائي صح ما عشت وياه هواي لاكن اذكر شكلة وضحكته وصوتة اذكر جان يجي تعبان ويجي شايل الركية على جتفه ونتلكاه ويكعد يشيفها النه ونكعد داير مدايرة ونأكل وهوة يباوع علينة ويروح كل التعب منة جان يكول يلة كلجن كومن دلكن رجلية واحنة نكيف ٢ يدلكن رجليه و٢ على ايده وحدة فوك رأسه بس جنه نحب نخبث شوية ندلكة حيل وهوة يكول ليش ولجن ليش هيج هاي مال خباثة ومرة من المرات ما انسة هالموقف كال دلكن ضهري ووحدة من خواتي جرحته بأضفرها عمت عيني تأذى بس ما بين ماما حجت علينة بس هوة ما قبل كال عوفيهن اني ارتاح من اشوفهن. المهم جانت حياتنا حلوة حيل بوجود ابوي جان مدللنه كلش وشنطلب ونتمنى يجيب ويخلي جان صاحب شأن ومقامه عالي عند الناس وتحترمه العالم وتهابه ويشيروه بكل صغيرة وجبيرة جان وين ما يروح الناس تسمي شيخ فلان وهوة مو شيخ لاكن والدة جدي اللة يرحمة كان شيخ ومعروف عند الناس من بعد ما اتوفى جدي والدي ما قبل يستلم المشيخة لانهو كانت حالته المادية مو كلش قوية وايضا كان عندة عمله ومرتبط بي مجان فارغ للمشيخه بذاك الوقت لذالك انطوها لاخو جدي يعني عم ابوي .
جان ابوي عمت عيني يحب البنات كلما ماما تخلف بنيه يذبح ذبيحة لوجه الله يكلها البنات عزيزات وحنينات جان يموت علينة ومدللنة حيل عمت عيني واذا واحد من اخواني يأذينه يطرده حتى من البيت.
بيوم وليلة صار الما متوقعينة ابد ولا ببالنة ابد
اجانة خبر وفاته اثناء عملة جان يطلع محافضات هوة
اجانة خبرة وهدم حياتنة رأس على عقب
جنت هستوني حالة من المدرسة اني واختي الأكبر مني رهف اثناء رجعتنا من المدرسة بالطريق اجة اخوية عمره ١٠ سنوات يركض بأتجاهنا ويبجي وحلكة يرجف جان يكول بابا مات 😔احنة من الصدمة شمرنا الجنط من ادينا وركض للبيت هوة ركض وهوة بجي وصياح بالشارع لان سندنا وراح ضلمت الدنيا بينا.
وصلت للبيت شفت باب اهلي مفتوح والناس ملتمة وتبجي منتضرين الجنازة توصل جانت هواي عالم مكسورة على وفاته لان جان زارع طيب وياهم وخير وصاحب عزوبية وهلا.
فتت اركض للبيت وجان المنضر ما ينوصف شما احجي امي مفرعة وما مبقية شعراية ما هالستها وما باقي خد ما خارطته والثوب مشكوك وتدك وتلطم وخواتي داير مدايرها مو اقل من حالتها. بيومها بليل رحنا لبيت جدي اهل ابوي وللصبح منتضرين الجنازة توصل لان بغير محافظة توفى عمت عيني. وصار الصبح ونزلو التابوت وبعد ماكدر اوصف الصار من هول المنضر واليوم الما انساه طول حياتي راح خيمتنا وراح سندنا 🤚وتيتمنا على زغر وما شبعنا منه.
"عمود الخيمه طاح وطاحت الخيمه "
"الهوى والماي بعدك مالهن قيمه"👨👧
