الحلقة 01
#سنمار_يحكي:
يقولو الحياة تاخد بالحجم لي تعطي فيه...أما أنا لا 32 سنة و أنا نشوف فالحياة تاخذ مني و كهو...خذات مني حاضري مستقلبي سعادتي و الاهم خذات مني بابا...يمكن ماقريتش و تعلمت كيما أندادي...يمكن معنديش خدمة باهية...يمكن منسكنش في فيلا...أما هذا ميعنيش اني فقير...علخاطر أنا نملك حاجة قليل وين تلقاها عند الناس..."دفى لعايلة" الحب الاحترام الاهتمام حاجات بسيطة زي هذي هي لي تشجع الإنسان بش يتمم فلي يعمل فيه...أما كان تسألوني عن سعادتي...سعادتي الحقيقية هي وقت نشوف نظرات الفخر في عينين امي...ضحكت خويا...و راحة اختي...غير هكا ميهمنيش...
حطيت آخر صندوق من يدي و رجعت للقارب نتفقد فيه...شديت منشفة نمسح في طرافو لي توسخت...هزيت راسي على صوتو يحكي
يحيى:يا جماعة أنا بديت نغير
أنا:خير يا @@@ شجابك لعندي
يحيى:هذا جزاتي كي نحبك و غاير عليك من بابورك
أنا:برا سيب بلاك بعيد عليا
يحيى:صاااار جيت بش نقولك امي تنادي عليك لفطور حاضر
أنا:باهي امشي توا نلحق عليك
يحيى:و قالتلي ماترجع كان معاه و يدك في يدو
أنا:نرجع معاك اي أما مش يدي في يدك عاد
يحيى:ههههه تعرفها
قدم مني شدني من ذراعي يمشي فيا معاه...سليت روحي منو...تلفت عندي و قحرلي يحكي
يحيى:كأنو قاتل روحك بش نشدك ريحتك خايبة فيبالك!!
أنا:نعرف هات الجديد
يحيى:شبيك عاقدها يا راجل اضحك لدنيا تضحكلك
أنا:لحظة نكلم عم حاتم
يحيى:كيفاش كان ليوم
أنا:كي لعادة ماصيدناش ياسر ليوم تقريبا لبحر فارغ
يحيى:علاه
أنا:يمكن صيدوه قبلنا ولا مندري عليهم و معادش تسألني
يحيى: نشكي بيك لربي يا ظالم
قحرتلو على جنب و دقيت فالباب متاع الكوخ مرتين...جاني صوتو من داخل بش ندخل...حليت لباب و دخلت نحكي
أنا:مرحبا عم حاتم
حاتم:اهلا ولدي سنمار تحتاج حاجة!! فيبالي بيك رحت من بكري
أنا:لا صراحة مامشيتش حملت صنادق بش يجوك ساهلين يعني
حاتم:علاه تعبت روحك كنت بش نحملهم وحدي
أنا:حاشا مفيهاش تعب..ااه شي ليوم ماصيدناش ياسر ياريت لمرة لجاية نخرجو بكري شوية
حاتم:الوقت لي نجمعو فيه كمية مليحة هو الليل أما عارف ياسر مخطر
أنا:باهي ميسالش ربي يعينك
يحيى:هيا برك بطينا على وردة
حاتم:بلغوها سلامي لوردة
يحيى:وردة ااه
حاتم:محسوب راهي اختي و مرت صاحبي ندرا ليمن طالع انت
يحيى:ايي كنت عارف منيش ولدهم
ضحك عليه و تلفت عندي يحكي
حاتم:برا روحو ولدي بالسلامة و كي لعادة وقت نبيع السمكات نجيبلك سهمتك
هزيتلو براسي باهي و خرجت...لحقني بالوقت شدني من يدي يحكي
يحيى:ازرب روحك بش نموت مالجوع
أنا:ميسالش تسيبلي يدي نعرف نمشي وحدي
يحيى:تؤ أوامر وردة ذي منجمش نخالفها
أنا:ياريت تسمع كلامها في كلشي
يحيى: تجرح فيا راك ايمت خالفت اوامرها أنا
أنا: وقت تقولك ماتسهرش برا مع صحابك المنحرفين اذوك
يحيى: معنديش صحاب منغيرك تعرف مليح هذوكم ولاد الحومة
أنا: حتى أنا معنديش منغيرك أما كي تكون غايب منمشيش عندهم بش نفوت الوقت
يحيى: أنا منغيبش عليك انت لي تغيب عليا
أنا: مضطر الله غالب كان بيدي منفارقكش نهار بطولو
يحيى: وين كنت مخبي الرومانسية هذي الكل يا صاحبي
أنا: هههههه ¤¤¤¤ حيوان
يحيى: لااا ماتكفرش قدامي مزلت صغير
أنا: اممم تستعرف مالا
يحيى: صحيح صغير عليك أما مش لدرجة يقولولي بوك سنمار
أنا: ●●●● شكون قال
يحيى:ههههه نفذلك بيناتنا 4 سنين و 6 شهر و يومين و 5 ساعات ميبانش فارق العمر
أنا: لا ميبانش عليك شاطر فالمات
يحيى:ههههه نعجبك ماكملتش قرايتي باطل أما ندمت والله ياريت...
قاطعتو نحكي
أنا: ماتقولش هكذا تو يجي نهار و تستنفع بيها
يحيى: هاك انت مقريتش و قاعد تخدم
أنا: اي شفت محلاها لخدمة لي نخدم فيها
يحيى: شخصها المهم قاعدين نوكلو منها كان مش انت منعرفش منين كنا بش نعيشو
أنا: فكنا مالسيرة هذي
هزلي براسو باهي و سكت...نعرفو وقت يكبش مايسيب...تبسمت معاه و حضنتو على جنب راجعين للدار.
