مرة رحت وية اختي لكليتهم اختي تجامل وتضحك اني كاعدة على صفحة واتصفح بموبايلي يحجون وياي ارفع راسي اجاوب وارجع ما الي بهذا الجو ومكان غريب عليه اني مرحلة ثالثة صباحي بغير كلية واختي اخر مرحلة مسائي بس من اطلع من الكلية فترة اسبوع اختي تمر علية تاخذني بسيارتها لان ابو الخط مالي عطلان بقيت اروح واجي وياها شفت شخص اول ما صارت عيني بعينة بدون مبالغة عبالك مثل الأفلام انجذبت الة بشكل فضيع
يحجون وياي ما منتبهة بعدين سالت اختي سويت نفسي عادي عود هيج ما مهتمة كلتلتها منو هذا باوعت علية كالت ليش تسالين كلتلها لا هيج كالت هذا واحد شايف نفسة ومو بحال وحدة هذا طالب دكتوراه وكل الموجودات جربن حظهن وياه هذا تجي وياه وحدة كل فترة يمكن الكبل مالتة وهم مثلة شايفة نفسها
بعد ما رحت للكلية رجع الخط مالي بس بقت صورة الشخص ابالي بعد فترة اتحججت ورحت وية اختي اريد اشوفة لان ما طلع من راسي عبالك بيه سحر فضيع حتى كمت احلم بيه المهم رحت وياها بس هالمرة ما انشغلت بالموبايل بقيت اباوع علرايح والجاي بلكي اشوفة
سمعت صوت وراية واحد يكول جاي تدورين علية
التفتت شفتة وراية مخلي الموبايل على اذنة وكمل كلام ومشة بعد دقايق اجة ووياه وحدة اني انغثيت كلش سالت اختي منو هاي لوياه اختي كالت هاي الي كتلج عليها يمكن الحب اني كلش انقهرت كلت لاختي راح اطلع صديقتي خابرتني عندي امتحان اريد اخذ الملزمة منها كالت ابقي نطلع سوة عفتها ورحت امشي ضايجة
قبل ما اوصل للشارع سمعت هورن وراية التفتت وشفت الشخص نفسة ما احجيلكم فرحتي وضوجتي بنفس الوقت المهم سويت نفسي ما مهتمة بس اقدم رجل واخر رجل كال تحتاجين اوصلج كتلة لا شكرا بقيت امشي وهو مخفف وراية كال شبيج كتلة اعرفك تعرفني وتسأل كال لا ما اعرفج بس اني الي تجين علمودة للكلية اني تبسمرت ابمكاني هذا شمديه وشلون هيج يكول المهم عفتة ورحت بقيت ايام افكر بالموضوع ومصدومة واستحيت بعد ما رحت وية أختي بعد فترة راسلني رقم غريب اول مسج شلونها الزعلانة استغربت منو هذا سويت للرقم تحقيق طلع مامسجل وماكو صورة بالواتس عفتة رجع باليل دزلي شدعوة متسوة هالزعل كتلة منو انتة وشتريد كال انتي الي تريدين مو اني وكلت اسهل عليج الموضوع ما ادري ليش اجة ابالي هالشخص بس كلت لا منيلة رقمي المهم عفتة لان كلت مستحيل الي ابالي كعدت الصبح كاتب الحلو اليوم يجي نشوفة لو بعدة زعلان اني كلت هذآ عرف كتلة منو انتة راح اسويلك حظر اذا متحجي كال اذا اكولج منو مستحيل تسوين حظر بقيت دايخة منو هذا وليش هيج يحجي بثقة
كتلة كولي يا سلطان منو حظرتك المهم بقة يجي يحجي كلمات كل يوم يومين مال واحد يعرفني وعندة ثقة بنفسة من يحجي اني الصدك ما كدرت احظرة لحد ما اتأكد بقة اكثر من شهر على نفس الحال واني ضجت لان مترددة منة وبنفس الوقت صار عدنا حالة وفاة بنت خالتي والتهينا اسبوع اني ممداومة ولا اختي والموبايل ما لازمتة اجيت لكيت كوووومة مسجات منة كلها مال واحد قلق وضال بالة وكال سارة طمنيني ترة راح اجي لبيتكم اذا متحجين شصاير هذا منين يعرف اسمي ويندل بيتنا كتلة انتة منو كال شصاير وياج ليش صار سبوع ما متصلة بالنت واختج ممداومة اني سكتت سكتة طويلة يعني هذا من كلية اختي رجعت كتلة منو انتة؟ كال اني أمجد انصددددمت عرفتة هو سويت نفسي ما اعرف كتلة ياامجد كال سارة لا تلعبين باعصابي تعرفيني كلش زين كتلة ما اعرفك وباي
جان رأسا يرسل صورتة اني صار عندي عيد هذا الإنسان الي جان حلم بخيالي وهيج جاي يحجي المهم اني شرحت حالتنا والوفاة كال اريد اشوفج كتلة ما اكدر كال ضروري كتلة مو هسة كال اجي لبيتكم كتلة منين تندل بيتنا كال من اشوفج كلشي احجيلج المهم اني بين لهفة وحزن على بنت خالتي الله يرحمها المهم اريد اروح للكلية وشلون راح اشوفة واختي صارمة شوية مو مال الأحداث تصير كدامها بعد كم يوم اتفقنا يشوفني علساس بعدني حايرة شلون يشوفني اول مداومت الي نص ساعة طابة محاضرة مكتب العميد دزو علية دخت شصاير العميدد يخووف رحت طبيت شفت امجد كاعد ورجل على رجل اني اتكهربت هاي شنو طبعا العميد شايفتة بس بالصور العميد كال تعالي بابا خير سمعت احد مضوجج دكتور حازم يكول
باوعت دكتور حازم مبتسم غمزلي الي فهمتة يريدني امشي الموضوع كتلة لا دكتور عادي انحلت ما اعرف شسوي المهم العميد كال يلا امجد اني عندي اجتماع اني طلعت وكلشي مفاهمة احس روحي بفلم هندي طلعت اجة امجد وراية اسمع اقدام وراية بس قلبي يدك سريع اميز هذا العطر بقيت امشي صار كلش قريب علية وهمس باذني مشتاقلج اني كمزت ووكفت بعد ماكدرت أمشي بس اباوع عليه وابالي هواي أسألة وما اعرف بشنو ابدي كال لا تدوخين راح اسولفلج كلشي عزمني بالكافتريا رحنا طبعآ شخصيتة وثقتة بنفسة تخليني صافنة كعدنا كال اي سروتي ليش هيج تقلقيني عليج
ياربي هذا شدايحجي دخت بالزايد بقيت اسمع الة بس كتلة شلون وصلت لكليتي ومنين جبت رقمي وشنو سروتي كال على كيفج وية نفسج هسة احجيلج تذكرين العام هنا بالكافتريا من اخذتي عصير وانكلب عليج وكمتي تبجين مثل الطفلة صفنت صح صاير وياي هذا الموقف
كتلة ايييي كال اني جنت كلش ضايج وصار بيج هذا الموقف ضحكت بس من كمتي تبجين اجيت ردت اساعدج من اجوي عليج اصدقائج رحت لان كسرتي كلبي جنتي كلش بريئة لدرجة بدون شعور اجيتج بس رحت كتلة ما شفتك كال انتي خايفة على قميصج البنفسجي وين تشوفيني كتلة وحافظ لونة كال حافظ كلشي بيج استغربت كتلة بس اني مبجيت على القميص بجيت من الموقف المحرج كال اعرف انتي كلش خجولة سكتت كتلة ايي وشلون حافظني كال بعدها اجيت كعدت بالحديقة وانتي كاعدة كدامي وتتشاقين وية صديقتج بقيت صافن عليج كتلة واني وين ليش مشفتك كال بعدها اني ما حبيت تشوفيني كمت اراقبج من بعيد كتلة وشلون يخلوك تدخل للكلية كال ايكولون اني ابن العميد كتلة جذذذذذب كام يضحك كال وموصي عليج دكتور حازم ميخلي احد يضوجج اذا احد فكر يضوجج اصيرلة عزائيل اني الكلام اسمعة بس ما مستوعبتة شلون هيج واني عبالي شايفتة واعرفة قبل ما يعرفني كتلة زين ليش من اجيت لكليتكم انت ما تفاجأت من شفتني وتجاهلتني كال لان اني الي اسبوع مراقبج وانتي مدنكة بالموبايل اخر مرة تقصدت افوت من يمج وشفتج شلون باوعتي علية وادري راح بعدها تجين علمودي لهذا كتلج جاي تدورين علية كتلة يعني ما جنت تحجي بالموبايل كال لا بقينة نحجي وراح الوقت ورجعت للبيت تذكرت البنية الي دائمآ وياه ردت اسال بس كابرت بس باقية تدك بكلبي المهم راحت ايام واجت ايام علاقتنا كلش قوووية صارت يجيني للكلية ومن ازعلة ويكوم ميجي اروح وية اختي ابقى اباوعلة من بعيد وهو يرسلي مسج ما يصبر وثاني يوم يجي للكلية بعدين عرفت هاي الابنية الي وياه مرات تجي هاي بنت خالتة متخرجة بس تجي وياه وحسيت بيها تحبة سالتة كال بابا هاي مثل اختي اني ما مرتاحتلها احسها من نظراتها الة من تقربها تحبة
فد يوم من الأيام طلعت اني واختي عدها شغل علساس للسوك واني هيج كتلة بعدين اختي غيرت رايها ورحنا للمول اخذنا ابن عمي بسيارتة هناك كعدنا بمطعم اختي اجاها تلفون طلعت تخابر اجتني رسالة من امجد انتي وين بدون سلام ولا كلام
ما ادري ليش ما حجيتلة الصدك واخاف اجيب سيرة هذا ابن عمي لان ادري بيه ما يطيقة لان رأيدني واني انجبرت اطلع وية أختي كتلة بالسوك وية اختي رسل مسج كال باوعي وراج التفتت امجد عيونة تطلع شرار اني انشليت وما عرفت شنو اسوي ردت اكوم هو راح بس احس روحي طلعت كمت ابجي ابن عمي كال شبيج صرخت بيه وخر اجتي اختي شكوو كلتلهم اريد ارجع رجعت وهمة يحجون يمي واني بغير عالم راسي مسطور وشلون راح يصدك اذا اكولة رجعت اخابر مغلق الموبايل بقيت كاعد للصبح رحت للكلية ما اجة هسة اريدة بس يجي يصيح يعاتب يزعل المهم اريد اوضح الموقف اسبوع مختفي اطب على صفحتة اخر منشور من جنة نحجي بقيت انتظر وكلبي ناااار بعد ١٠ ايام اجتي اختي اني رجعت من الكلية من وكت لان ايست يجي لاكتني اختي طالعة جان تضحك كالت ابن الاكابر خطب هي تسميه ابن الاكابر اني ما استوعبت احجايتها بعدني صافنة هي طلعت ورجعت طلعت وراها ماكو رايحة حرت وين اروح الحكها للكلية شنو اسوي ما ادري
رحت للكلية ورة اختي وجانت حالتي كلش سيئة شافتني اختي اتخبلت كالت شبيج كلتلها اريد اشوف أمجد كالت تخبلتي وين تشوفيه وليش شنو علاقتج بيه اني ماعندي طاقة احجيلها وافصل ولا مهتمة شنو راح تحجي كلتلها وينة كالت شمعرفني سحبتني للسيارة صعدتني وطلعت ما ادري وين وكفت تصيح شنو بينج وبينة حجيتلها ضلت تهدد بيه وراح احجي لامج ولابوج واخليهم يتصرفون وياج كلتلها امجد وين اريد اشوفة رادت توصلني للبيت وترجع للكلية كلتلها اني ارجع عفتها تروح واني رجعت لكليتي حتى اشوف دكتور حازم يفهمني لكيتهم طالعين بقيت كاعدة كبالها ما اعرف شسوي احس الحزن مخيم على كلبي خابرتني اختي واجتني يم كليتي طلع أمجد خاطب بنت خالتة الي مثل اختة
اختي سكتت عني لان شافتني وضعي ما يسمح تأنيب رحت ٤ ايام ما الي واهس اداوم بعدين كلت اخاف هذا كلة جذب اريد اروح اتأكد داومت رحت لدكتور حازم أسألة كالي عوفيه الولد شاف حياتة بعدني اريد ارجع بقيت افتر مخنوكة ورة كم ساعة خابرت اختي كالت مو تريدين تشوفين ابن الاوادم تعالي هذا مداوم رحت بتكسي اريد بس اوصل طبيت لكيتها تنتظرني اباب الكلية كالت اي تصرف ابهذل احوالج لا تشوهين صورتنا رحت ردت بس اتأكد صدك لو لا شفتة اجة من بعيد يمشي ووياه بنت خالتة الي مثل اختة ومن شافني كادها ولابسين حلقات احس روحي تريد تطلع ما اكدر اوصف احساسي بذيج اللحظة اختي لازمتني من ايدي عبالها عندي قوة لاي فعل ما تدري اني اذا اموت مراح اموت بهذا المكان سحبتني ورحنا للسيارة رجعت حتى ما اكدر ابجي هي هم ما حجت طبيت الحمدلله البيت محد بيه صعدت الغرفتي وسديت الباب واحس جهنم بكلبي طبيت على صفحتة ماكو شي طبيت على صفحتها لكيتها مخلية صورة لايدهم خلفية والناس تبارك ويسولة تاكات صار بكلبي انتقام فضيع
الحب الي بداخلي صار غضب
طبعا رجعت والوقت ما يمشي الساعة تمر علية سنة ايام عيني ما شافت النوم مرة اشتاق ومرات الانتقام بداخلي يشعل بكلبي نار اريد اكعد والكة كل هذا حلم اغفة وافز هو ابالي تنغصت حيآتي ايام ما اكدر أطلع من غرفتي واني كل كلمة حجاها الية ترن باذني واتخيل يحجيها لهاي الانسانة الي حاولت بكل الطرق توكع بينة وهو جان يكول مثل اختي اتخيل شلون يغازلها ويباوعلها
الغيرة الي بية خلتني ما اشوف اي شي كدامي كمت اهلوس بيه افكر شلون اخليه يتوجع بس دماغي مشلول كل الي كدام عيني ذيج الصورة الي ايدة بايدها شلون كدر هيج يسوي بيه وليش اهلي كامو يسألون شبية اختي تكولهم مرة امتحانات ومرة تكلهم صديقتها مريضة اعذار مو مقنعة وامي نظراتها بيها اسئلة بس ما تكدر تسأل بقيت ايام وليالي على نفس الموضوع صديقتي تخابرني اكولها ليش هيج سوة امجد مرة احجيها واني مكسورة ومرة احجيها بانتقام واكوللها شوفي شراح اسوي بيه بقيت اسبوعين بعدين خابرتني صديقتي كالت هواي فاتت مواد عليج وامتحنا ٣ امتحانات ودكتور حازم يكول خلي اداوم ارجع اعيد امتحانها سألتها هم شفتي امجد كالت سارة ما عرفتج هيج ضعيفة عبالي قوية شنو امجد نمونة انسيه كلتلها والله اذا ما ارجعلة الضربة بالف ما ارجع سارة الي تعرفيها كالت الأيام علاج كلتلها السم الي بداخلي لو يموتني لو انتقم بقيت مرة اضعف ومرة اقوة وطول هاي الفترة اني اطب على صفحاتهم بيوم طبيت عليهم ولكيت خطيبتة ناشرة الموقع هي وياه بكليتنا اني هنا صار عندي صلابة وشجعت نفسي اكوم على حيلي جذب اذا اكول راسا رجعت بس حاولت اصنع القوة وداومت ما شفتهم
اجة دكتور حازم سال عني وضل يسولف اني ادري كل كلمة راح توصل الة ما حجيت شي كتلة شوكت تمتحني كال الاربعاء الجاي كتلة لا خليهة الخميس كال مثل ما تحبين اني صديقتي كالت سارة شنو ابالج كلتلها ماكو شيء كالت ديربالج اي تصرف غبي انتي الي تتاذين ترة محد غيرج رجعت للبيت خابرت ابن عمي كتلة اريد أروح للمكتبة خلي حسن يجي ياخذني على اخوه
كال لا حسن نايم اني راح اجيج اني ردت اروح اشتري ملازم من صديق ولد عمي اجاني ابن عمي ورحنا اني طبعا ماعندي اسلوب حلو وياه لان ما اريد يفكر اتوددلة ورة ما صعدت كال سارة شبيج شنو الي ماخذ لونج كتلة مابية امتحانات
بقة يسال ما اهتميت اخر شي ضجت كتلة شبيك ليش تلح كال مو تعرفين اني احبج ورايدج اتذكرت امجد وشلون جان مانعني حتى اسلم عليه كتلة اي وبعدين كال شنو بعدين اريدج زوجة كتلة ما افيدك كال والله احبج هواي لو شنو اطلبين اسويلج كتلة الخميس تخطبني
بقة ساكت انصدم كتلة آنسة جنك ما سمعت كال اوكفي شبيج اكيد ما تتشتاقين كتلة لا ما اشاقة كال باجر نروح نعقد ونشتري كلشي تريديه كتلة كلشي ما اريد بعدين شنو باجر نعقد والاهل شنو بكيفنا كال محد يعترض هو باقية بس موافقتج كتلة الي تريدة سويه واني احس بنفسي روحي بسجن ومن حجيت ووافقت اختنكت
كتلة شنو تريد تسوي سوي المهم الحفلة الخميس
كال الخميس الخميس اني بقيت اروح بهاي الفترة للكلية بس دعيت ربي ما يجي أمجد واشوفة وما جنت اطلع لاي مكان حتى ما اصادفة ولو عرفت هو بعد ما طب للكلية غير المرة الي نشرت موقعهم خطيبتة مشت الأيام واني عبالك ماكو روح كلشي بيه راح بريقة سوو الاجراءات عادي اني ما قبلت العقد مال شيخ الة يوم الخميس اختي بهاي الفترة تحجي علية تكولي ديربالج هيج تسوين بنفسج وانتي ما تحبيه وجاي تنتقمين من نفسج وشنو ذنب هذا الإنسان يحبج تخدعيه اني ما ابالي ولا اسمع سويت الي برأسي الاربعاء من داومت كلت لصديقتي باجر خطوبتي تعالي كالت سارة وجهج مابيه شقة شنو هاي الحجاية كلتلها تعالي بأجر بعد الدوام اريد من تجين تكولين لدكتور حازم اليوم سارة متكدر تجي تمتحن اليوم خطبتها كالت سارة جاي تسمعين شنو جاي تكولين كلتلها سوي الي اكولج عليه اذا صدك تحبيني بقت تحجي كالت انتي مو جاي تلعبين بالنار انتي طابة للنار بكل قوتج ليش هيج تسوين بنفسج كلتلها النار الي ما لاسعتج لا تحجين بيها
واذا متريدين تجين براحتج عفت الدوام وطلعت رحت ما اريد افكر غير اباجر لهذا الشخص وشنو راح يحس اجة ثاني يوم والكل فرحانة عداية احس جاي ينصبون مشنقتي بس مو مهم لان كل هذا هين عندي المهم يسمع هذا الشخص
اجتي ضحى ضايجة توسلت بيه قبل لا يجي الشيخ الغي الموضوع عندج وقت كلتلها بس تصير الحفلة تاخذين صور وتنزليها بصفحتج وتسويلي تاك ضلت ضحى تسولف عفتها ورحت بدلت المهم مشت الدقايق والتمو الاهل والكرايب واسمع اصوات هلاهل وضحك وناس تعاتب ناس وناس تضحك اطفال تلعب وتتعارك عبالك اني بنص فوضة كالو اجة الشيخ حضروني كمت ارجف اريد ابجي حتى الدمعة جفت بعيني من ورة الباب الشيخ لقن وصل اوافق وانت وكيلي اهنا روحي فرفحت ما جنت اتخيل هاي اللحظة وية غير أمجد وبنينة احلام وحياة واسماء اطفالنة هواي احلام بقت معلكة على أعتاب الخذلان والوجع وصارت كوابيس
الشيخ عاد الجملة كم مرة اختي واكفة وراية ضربتني برجلها كلت اوافق صارت هلاهل وجكليت احساسي عبالك جاي اندفن والناس تعيط وتراب مو جكليت يهلون علية هيج صارت بعيني اللحظات كمت رحت للحمام كعدت ابجي اجتي اختي وصديقتي وراية كالو ليش هيج سويتي ضحى كالت يلا مو رديتها انتقام كملي للاخير بعد ما يرهم انسحاب
اختي عدلت مكياجي ضحى كالت مو ردتي اصوركم هزيت راسي كالت يلا اريدج تضحكين رجعنا صور وهاي الإجراءات كمت رحت وكملت الأشياء اني طبعا بهذا الوقت كلتلها انشري هية نشرت وسوتلي مشاركة اني وافقت نزلت بصفحتي وغلقت الجهاز وكلتلها اي شي يجيج كوليلي التهيت اريد بس الناس يروحون تعرفون كرايب من يلتمون نصهم بقو اني ابيتنة رحت بدلت وصعدت اني وضحى للغرفة جاي نحجي دك عليها دكتور حازم كلتلها جاوبي وشنو يسال جاوبي كالها بدون اي مقدمات صدك سارة نخطبت كالتلة اي منو خطبها كلتلة ابن عمها هي فاتحة اسبيكر اسمع اشياء كامت تتكسر وانسد الموبايل عرفت امجد يمة وفاتح سبيكر كلتلها اخاف يتواصل وياج امجد لا تردين ورة شوية رجع خابر دكتور حازم كلها اذا السالفة بس إنتقام ديربالج من هاي اللعبة كالتلة شنو دكتور انتقام البنية انخطبت واني هسة طلعت من الحفلة هي بعدها يمي يكوللها هذا أمجد يمي وكوة لازمة يريد يجي لبيتهم إني اعرف هو ما يندل بيتنا بس عود يسال ويوصل ضحى خوفتة للدكتور كالتلة والعميد يدري بامجد يريد يتهجم على بيت طالبة عندة هو تلعثم هي تريد تخوفة لأن كالت سارة مو كتلج خربتيها كلتلها لو الدنيا تحترك بالي بيها ما اهتم كالت كافي سارة حاولي تلتفتين لنفسج وتحبين ابن عمج هو يحبج
ثاني يوم مكدرت اداوم لان خاف يصير تصرف منة بالجامعة بعد يومين اختي كالت امشي اوصلج اريد اشوف ابوه كلتلها ديربالج ترة يفصلوني المهم بقيت كم يوم اختي تروح وياي اطببني للكلية وترجع علية تأخذني من اطلع علما يهدأ الجو مشفت امجد خلال هالكم يوم كلت اي عادي ضاج اول مرة لان اني ملكية مالتة جنت وهسة الموضوع عدة عادي طبعا دكتور حازم رسبني فصل ثاني وصار التعامل جاف وياي نزلولي انذار ما اهتميت
بقيت اروح وأجي فديوم جاي انزل من الخط اكو صبات فاصلة بين الشارع والكلية مسافة مشي
نزلت عالشارع جاي امشي للكلية حست ايد سحبتي بقوة وصعدتني بسيارة بالكشن الخلفي طلع امجد ومجتف ايدي وواحد يسوق طلع كبل بس امجد مو هذا الإنسان الي اعرفة غير شي يخوف ملابسة مبهذلة شعرة ممشط وعيونة حمر السيارة وكفت بمكان نزلني ضربني راجديات بقوة لحد ما حسيت راد يغمة علية اجة الي جان يسوق دفعة وكام يصيح كلة عوفها مو كلت بس احجي وياها عافنة وراح كلة وصلها للكلية وراح إني كمت احس امجد وحش مو البشر الحنين الي يحبني ويخاف علية من نفسة راح
هذا اجة كالي كومي صعدي اوصلج اني خفت اصعد كال ما اسويلج شي اني صديقة كالي عدكم مشكلة ويريد بس يحجي وياج ما ادري هيج راح يتصرف كتلة وصلني للسيارات صعدت وصلني قريب الكلية اخذت تكسي ورجعت للبيت وجهي مورم واحمر لاكتني امي اشبيج كلتلها يم الكلية جلب ركض وراية وضليت اركض ووكعت وكالت فوتي سبحي ضلت تكلب بيه عبالها عاضني رحت سبحت ونمت صارت احداث خلال هاي الفترة روتينية خطيبي اجة يشوفني كلتلهم كلولة نايمة كلولة
ماراح يريد يطمان المهم كعدت نص ليل البيت فارغ كلها نايمة طلعت للحديقة طلع علية الفجر واني ابجي برة
ورجعت فتت نمت كم يوم ورجعت داومت كامو يحاسبوني بالكلية على كلشي اجتي مرة وحدة بدون سبب سوت مشكلة وياي واني ما اعرفها علاساس اني حاجية عليها وخطيبي بصفحة يدرو طلعات ويريد نسولف بالموبايل واني روحي مو بحالها مرت ايام اجة أمجد وخطيبتة واني وصديقتي بالكافتريا طب كعد كدامنا وسوالف وضحك هو وياها واثنينهم يريدون يحركون كلبي صديقتي كالت كومي نطلع كلتلها لا ابقي هاي تمثيلية حلوة خلي نبقة نتفرج شوية وهي ما ادري شنو راوتة بموبايلها وكامو طلعو اني نار شاعلة بنص كلبي حتى الإنتقام الي سويتة احس ظلمت بيه انسان ما يستحق وفعلا حسيت نفسي انتقمت من نفسي بس ماعندي غير حل
فديوم اجة خطيبي واني بالجامعة يطلعني اني تفاجاة بيه وبجيتة مكالي لان يدري أمنعة اني وضحى نفتر عندنا استراحة اتصل علية كال اني بالكلية كتلة شجابك كال تعالي كتلة روح اكمل واجيك للباب لان قبل ساعة اني شفت امجد وخفت لا يتصادفون
كال لا تعالي ما اعرف شلون دخل وشنو كال للامن بالباب وطببوه رحتلة كلت بلكي امجد طالع
لاكيتة كتلة يلا نطلع بهاي الأثناء اجة امجد كالة منو انت وشلون فتت كلة اجيت الخطيبتي اني عرفت هنا راح تصير مشكلة كتلة امشي نطلع كالة شلون فتت للكلية بصوت عالي صارت بينهم شد وجر ومضارب اخذونا يم العميد الامنية عاقبوهم وغيروهم إني سمعتلي كم احجاية وما خلوني اطلع وخطيبي رادو يحسبوه كوة طلع منها وامجد كاعد كبالي يباوعلي صفح اني كمت اكرهة بشكل فضيع كلش استحقرني واذاني وطلعتنا للبيت سويت مشكلة وية خطيبي وفصخت لان اعرف راح اظلمة وياي ومراح اكدر أحبة رغم سوالي كلشي بس أدري الحب مو شفقة ما اكدر اهتم بيه عفتة افضل الة بس بقيت مخطوبة كدام الكل بس ضحى واهلي والكرايب يدرون فصخنا وكلتها ديربالج تجيبين طاري للموضوع حتى الحلقة ما نزعتها
بقيت اداوم قربت فترة الامتحانات لازم اشد حيلي درجاتي مو زينة بقيت اروح يم ضحى اقرا اريد اعوض الي فاتني امجد كمت ما اشوفة وانكطع كلشي وكلت هاي هي نسيتة والايام تنسي اقشمر بروحي بس من يجي اليل واطب على صفحتة الكة صورة الكلمات الي يرددها اتذكر نبرة صوتة كلش احب صوتة كلت حتى الصفحة اعوفها حتى انسى بس بقة بداخلي غضب قوي علية بس كلت حتى انساه لازم ابقة كارهتة ثاني يوم إمتحان قبل ما ادخل إمتحان مقرر القسم صاحني كال ما تفوتين اطلعي لابسة ألوان اني كلت رسبوني كتلة دكتور والله اليوم اضطريت لان صار عندي ظرف وما بتت بالبيت كال مشكلتج دمعت عيوني جاي اطلع اروح لاكاني امجد بوجهي ماكدرت ادير وجهي بقيت اباوع عليه هو ما باوعلي دار وجهة وراح كملت طريقي اريد اطلع من يم القاعات ليبرة صاحني المقرر رجعت كال دخلي امتحني بس هاي اخر مرة رجعلي الامل لان كلت هاي هي رسبت رجعت للقاعة امتحن كملنا طلعت من القاعة سمعت هوسة يم مكتب العميد ما اهتميت طلعت انتظر ضحى بعدين اجتي وطلعنة ثاني يوم التشديد على البس ماكو وعبالك صاير شي بس ما فهمت ضحى كالت امشي سارة ندخل وجههة ماعرف شبيه رحت للامتحان من طلعت اسمع الطلاب يسولفون وكل شوية وكالو اي خطية العميد بقيت انتظر ضحى بس صار قلق بداخلي ما ارتاحيت طلعت ضحى كلتلها شصاير كالت امشي نطلع من الكلية رجعت عدت سوالي كالت شعلينة أمشي اني زاد قلقي ما اعرف ليش وعليمن بس بقيت خايفة هية تسحب بية وتمشي صحت بيها ووكفت شصاير احجي كالت بالبيت نسولف اخر شي كالت أمجد انضرب طلقة كلتلهة ياامجد سكتت كلتها لج شبيج امجد البارحة اجة وادري بيه هو حاجة المقرر وخلاني امتحن كالت امشي معليج أنتي سحبتني اني ضعت وين اروح كلتلهة وين هسة هو كالت تخبلتي الدنيا مكلوبة وتحقيقات اكيد
شنو وين تريدن متخافين على نفسج كلتلها بس خلي اعرف حالتة اني كعدت على دجة بالكاع وما عندي طاقة ابقة واكفة كمت رحت لغرفة العميد مسدودة سالت على دكتور حازم ماموجود وما اعرف اي أحد خابرت على دكتور حازم مجاوب ما رجعت للبيت رحت وية ضحى وهي حجت وية امي وكالتلهة راح تتأخر يمي نبقة نقرا اني مقبلت اطلع من الكلية الة اعرف وين هو كلشي ما فاهمة بعد ساعة تقريبا اتصل علية دكتور حازم كال البارحة ضربوه وتعبان شوية كتلة وين دلاني على مستشفى ضحى كلتلها روحي واني طالعة للمستشفى
رحت للمستشفى هواية عالم وأمن مشددين ما خلوني افوت خابرت دكتور حازم اجة دخلني كتلة بس كلي مابيه شي كلشي ما اريد سكت رحنة مخليه بالعناية مكدرت اشوفة اباوع بالوجوه ما اعرف احد اريد اشوف امل بوجه اي واحد بيهم بقيت واكفة تعبت ونفسي كامت تلعب كلشي مماكلة اريد بس واحد يجي يحجي حجاية اجتي بعدين خطيبتة شافتني تهجمت علية وتصيح من وراج ياعكربة وتحاول تضربني سحبوها اني مو بحالهة بغير عالم
امة اجتي يمي حاقدة علية كالت ما اريد اشوفج هنا اطلعي اجة دكتور حازم كالها خالة مو وكتها تكولة نغصت حياة ابني دمرتة اني اباوع هاي شتحجي هي عبالها اني متونسة متدري اني ميتة من لحظة الي ابنها خطب راحت بقيت وحدي كل شوية يجي دكتور حازم يسال علية جابلي اكل ما كدرت اكل كتلة بس كلي شبيه طمني كال محد يكدر يأكد شي بعد يكولون ادعولة اني انهاريت بجي كتلة منو هيج سوة بيه كال مو هو المستهدف ابوه بس هو طلع بسيارة ابوه وضربوه كتلة شجابة هو مو راح شعندة راجع للكلية كال يعني متعرفين وسكت حسيتة يتهمني الي ما حجة بس بنظراتة
كل هذا الالم الي بية وهمة مايرحموني
اخر همي همة اني بس امجد خلي يصير زين كلشي ما اريد حتى الإنتقام نسيتة بس خلي يرجع زين ضليت اقرا قران وادعي كلت لدكتور حازم بس خلي اشوفة دقيقة كال ميصير كال روحي تأخرتي كتلة ما اكدر كال روحي لخاطرة اذا تعزيه لان راح تصيرلج مشكلة وية اهلج كتلة طمني وباجر اجي
رجعت تعبانة كبل طبيت انام بدون اكل وميتة تعب اتكلب بالفراش نمت من العصر فزيت باليل روحي مقبوضة اخذت الموبايل وخابرت دكتور حازم مجاوب رسلتلة رسالة وبقيت انتظر رجع ب١ باليل دزلي رسالة كاعدة كتلة اي خابرني كال نفس ما عفتيه كتلة راح يعيش كال كولي ان شاء الله وصيري قوية انتي اكثر وحدة يحتاجج قوية كتلة ليش منو اني بالنسبة الة كال هو يجاوبج كتلة كلشي ما اريد بس خلي يصير زين
سدة وبقيت اتكلب نمت الفجر ساعتين وكعدت بدلت قبل ما اطلع كلت لاهلي ارجع يم ضحى إقرأ للعصر كالو اقري زين اني ما أفكر بشي غير صحة امجد واخاف من موبايلي ومن كل اتصال اخاف حتى اطب صفحتة اخاف من كل دقيقة تعدي لا اسمع شيء مو زين
رحت امتحنت كلشي مقارية بس مجرد اريد اطلع واروح للمستشفى طلعت من الامتحان وصيت ضحى بحساب اني يمها
بحياتي ما سويت شي خطا ولا بدون علم اهلي بس اضطريت لان اموت اذا ما اروح رحت للمستشفى الناس اقل يعني بس امة وخالتة وبنت خالتة والباقين
ابوه ماكو ولد عمة ودكتور حازم الي هو يدخلني قلقت كتلة ليش ماكو احد كال المستشفى منعتهم
رجعو هواي عالم كتلة اريد اشوف امجد كال ميصير الطبيب ميقبل امة وخالتة وخطيبتة يباوعون علية بكره شديد محسسيني اني السبب ورة ساعتين اجة الدكتور كال اثنين ايفوتون بس لان حالتة متسمح طبعا طببو امة وخطيبتة اني كلت ما دام طببو احد يعني حالتة تحسنت سالت كال لا تسالين هسة بعد ايام يلا نكدر نكول تحسن او لا
بس لازم يطبون يشوفوه بقو يمة ربع ساعة وطلعو خطيبتة تشمر كلمات بس مجبورة اتحمل ما اكدر اعوف المكان
صار مثل وقت يومية رجعت للبيت وثاني يوم ورجعت نفس الموضوع اول ما طبيت لاكاني دكتور حازم كال ابشرج فتح عيونة اني انهاريت بجي كال يمعودة عوفي البجي بعدة تعبان بس المهم كام يستشعر بالموجودين اجيت وكفت شوية وكالو طبو بس لا تحجون يمة ولا تحاجوه تعبان بس خلي يحس بوجودكم
طبو الموجودين اني ما كدرت اطب شكد متلهفة اشوفة بس رجلي ما تساعدني اجاني دكتور حازم كال يلا مو تريدين تشوفيه وخابصتني تعالي شوفيه اني ساكتة بس عيوني تجري اجيت قريبة للباب رغم المستشفى وريحة الديتول ماكو شي غطة على ريحتة اشتميتها بس فتحت الباب وكفت ورة الباب من جوة ما اعرف شنو احساسي بين الم وحب واشتياق وشعور بالغربة شي الك وتحسة مو من حقك اباوع عليه هذا حبيبي الي نايم هنا هذا الي يخوف بنظرتة وصوتة وشخصيتة وغضبة مستسلم ومخلي المرض يسيطر عليه هواي اختنكت اريد اروح احضنة بس لا منحقي ولا اكدر وما اعرف من يصحى شنو راح يسوي يطردني لو هم مشتاقلي ضعت بشعوري
بقيت انتظر فرصة رجعتة للحياة بس اعرف بعد ما النة فرصة
يحجون وياه يغمض ويرجع يفتح ما شافني اجة الدكتور كال اتركوه يرتاح طلعت اول وحدة ورجعت وما اعرف اذا باجر اكدر ارجع لو راح يمنعوني اشوفة رحت وبقت روحي بالمكان رجعت للبيت لكيت اختي منتظرتني كالت وين جنتي كلتلها يم ضحى دخلتني للغرفة وسدت الباب كالت هسة رجعت من يم ضحى وين جنتي هي عرفت بالي صار لامجد وعرفت مراح اتركة راحت تشوفني وضحى مسولفتلها كالت ممنوع بعد رجليج تخطي المستشفى كمت ابجي واتوسل بيها كلشي ما اريد بس اشوفة يصير زين وبعد ما الي علاقة بيه اعرف كلشي انتهى كالت سارة هواي خربطتي ومجاي تعرفين مصلحتج باجر اني اوصلج للكلية واني ارجعج وراحت بقيت حايرة شلون راح اطمأن على امجد ثاني يوم ودتني للكلية ورجعت علية واعرف هواي تعبت وياي ما اكدر ادوس عليها بعد خابرت دكتور حازم وسالتة على امجد كال احسن من البارحة ثاني يوم نفس الشي اختي اخذتني ورجعتني بعد ما كدرت اتحمل خابرت ضحى وكلتلها شسوي فهميني كالت سارة عوفيه كلتلها ما اكدر ترة جاي اطلبون مني أموت كالت انسيه الكل يطلب مني النسيان عبالهم شي سهل
ثاني يوم صادف امتحان اختي عدها امتحانين توديني بس متكدر ترجعني وياها
وصتني ارجع للبيت وهي متأكدة مراح أسويها رحت للمستشفى بعد الإمتحان خابرت دكتور حازم كال ساعة واجي وصيت يفوتوج من تجين دخلت للمستشفى محد واكف على باب الغرفة فتت محد بالغرفة وامجد نايم تقربت منة وقلبي يرجف مثل اول لحظة شفتة بيها وصلت يمة اتمعن بوجهة اباوع على الباندج الي ملفوف على بطنة بدون شعور لزمت ايدة وابجي كتلة كوم أمجد كوم وكلشي ما أريد بس صير زين خليت ركبي بالكاع وانحنيت على ايدة وجف ايدي بايدة وراسي على ايدة وابجي حجيت وياه هواي ما اعرف اذا يسمعني او لا حجيت كلشي اتمنيت احجي من طلع من المول وما كدرت اشوفة حجيت هواي واحس نفسي من التعب غفيت على ايدة فزيت على صوت صياح خطيبتة كمت بسرعة ونسحبت ليورة وهي ما خلت كلمة ما حجتها وامة وامها واكفات دخل دكتور حازم كال شكو كلتلة هاي وين زوجها ما يلزمها حاول يسكتها طرتني بهاي اللحظة فتح امجد التهو وياه ونسوني بقيت واكفة هو باوع علية بنظرات ما كدرت افسرها او افهمها عيوني بيها الم ما اعرف اذا الم كلبة لو الرصاصة
التهو وياه واني على صفحة اباوع عليه بقت خطيبتة كل شوية تسمني بححاية لو حركة كل شوية تبوسة اني مكسورة من راسي لرجلية بس كدامهم اني واكفة اجة دكتور اني احس الدنيا جاي ادور بيه مكدرت ابقة واكفة لان احس راح يغمة علية ردت اطلع لان ما اريد يكولون جاي تمثل تخربطت اعرف الحجي والنظرات واني امشي وكعت بالكاع احسن شالوني اسمعهم بس اللساني ثكيل ما اعرف شكد وقت فتحت اني على سدية يمي دكتور حازم كال الحمدلله على السلامة معلكيلي مغذي كتلة امجد وين كال نايم بغرفتة ما اعرف شنو صار سالت على الوقت كال ليش هيج ماذية نفسج كتلة شكو دخل الدكتور بهاي الاثناء كلتلهم اريد اطلع كال وين خلصي المغدي بيه ابر كتلة دايخة كال مماكلة شي مو كتلة اي كال انخفاض بالسكر والضغط وغيرها عدج فقر دم حاد كتبتلج مجموعة علاجات ضروري تأخذها كتلة اي اني خفت لا يبقوني بالمستشفى اباوع للمغذي بيه ربع واباوع للساعة لا تصير المغرب دك موبايل دكتور حازم جاوب الو لا الامور كلها تمام هسة جايك حسيت وية امجد يحجي ما اعرف اذا امجد كادر يحجي لو اني اتمنى هيج
راح من يمي دخلت علية الممرضة كلتلها شيليلي الكانونة كالت ميصير خلي يكمل العلاج المغذي يمشي على كيف واني كلش اختنكت حاولت اسحبها من ايدي اجتي وخرت ايدي كالت لا تكسرين النيدل بيدج طلعتها من ايدي وكمت بعدها الدنيا ادور بية كعدت شوية وكمت طلعت بهاي الاثناء بالممر من بعيد شفت دكتور حازم حاضن امجد وجاي يمشي رحت عليه امشي مثل السكران وكفت كدامة كوة لازمة واكو ممرض يجر بتعلاكة المغدي وصلت يمهم امجد مد ايدة سحبني علية وخلة راسي على صدرة احس نفسي بحلم ما اريد اصحى منة ورجعت صحيت على نفس الصوت مال خطيبتة انسحبت وعيني بعين أمجد وروحي بعدها حاضنتة عفتهم ورحت بقيت اتلفت وعين امجد وراية احس رجعتلي الحياة ثواني
الطريق كلة واني بالتكسي وفاتحة الجامة وطالعة اغنية (لا ترحلين رائد جورج) جان امجد يسمعنياها ويكلي هاي الج انكتبت عبالك شي خيالي اسمعها وادموعي تطير وية الهوة كلماتها عبالك اول مرة تمر علية فعلا عبالك انكتبت النة
وصلت البيت الوقت متاخر عن يومية واختي واكفة هي وامي اول ما طبيت اختي كالت شدعوة واذا امتحانين عندج راح تصير المغرب عالجت الموقف رحت للغرفة اجتي وراية طبت شافتني كاعدة بالكاع وراسي عالجرباية تريد تحجي شافت ايدي ملزوكة سالت هاي شنو حجيت الها كالت وين الوصفة كلتلها بالجنطة اخذتها راحت جابت العلاج وضربتني ابرة هي تعرف
اجتي امي كلتلها متخربطة وموديها للمستشفى ضلت امي تحجي شلون هيج ومو جاي اصيح اكلي اشربي اني بهاي الفترة تقريبا نازلة ٥ كيلوات ووجهي اصفر المهم وكعت بين اللسان امي واختي المهم اريد بس أنام بدلت لزمت الموبايل اريد اخابر حازم
خابرتني ضحى حجيتلها مختصرات هم ضلت تنصح وتحجي عبالهم الاشياء بيدي اثناء ما احجي وياها خابر دكتور حازم سديتة منها وجاوبتة يريد يطمان كتلة زينة وراح أنام امجد شلونة كال زين سديت الموبايل ونمت اجتي اختي الصبح كعدتني ومسوية ريوك اجباري اكلت لكمتين ودتني للامتحان جان قبل الاخير واني ادري بنفسي راح اطلع اسوء النتائج رحت للامتحان اختي ودتني وجابتني ضحى رجعت وياي تريد تقريني اجباري اطمانيت على امجد متحسن بقة اخر يوم طلعت امتحن وتوسلت اختي اطلع اشوف امجد كالت اروح وياج انتظرج ١٠ دقايق وتطلعين كوة وافقت اني كلت ميخالف احسن من ماكو طبيت للمستشفى رحت للغرفة محد اكو سالت كالو اليوم الصبح طلع تحسنت حالتة بجيت وحمدت الله لان صار زين وبنفس الوقت تمنيت اشوفة رجعت لاختي كالت اول مرة تلتزمين بحجايتي كلتلها طالع كالت احسن لهنا وسدي الموضوع الولد صار زين وانتي هم صيري زينة وكافي بهذلة لنفسج والنة
مرت الايام بقة التواصل عن طريق دكتور حازم اسال يومية عن امجد وطلبت منة واخذت وعد ما يكول اني اسال عليه وهو يعرف اني مخطوبة يعني يعرف الموضوع ميؤوس منة
اجة يوم النتائج
متاكدة مراح انجح لان هواي صارت ظروف ما ساعدت اضافة الامتحانات ما جنت موفقة بيهن خايفة ومحبطة بس اكو دافع بداخلي خلاني اروح اجتني ضحى وطلعنة سوة طبينا صاير هوسة كعدنا بالحديقة علما يخف العدد اجتي ابالي كل ايام السنة من اولها لهذا اليوم جانت اصعب سنة بحياتي هواي صارت بيها احداث ما فات هواي وقت خابرني دكتور حازم كال وين انتي كتلة بالحديقة كال ادخلي اني كل الي ابالي راح اشوف أمجد وبصراحة هذا الدافع الي خلاني اجي طبينا اني وضحى واكف دكتور حازم برة وبيدة اوراق سلمنا عليه كال ها كسولة ليش جاية ضحكت انطاني الورقة باوعت بيها ناحجة كلش فرحت صح الدرجات مو مثل باقي المراحل بس اني شايلة من راسي انجح اعرف ما اديت بشكل صحيح
يمكن ساعدني الدكتور ويمكن أمجد ادخل اخذت النتيجة وعيني بكل مكان بلكي المح طرف من أمجد ضحى راحت للمقررية وية دكتور حازم تأخذ النتيجة اجتي فرحانة ناحجة بقينة بالكلية شوية وطلعنة أمجد ماكوو بس كلت لضحى ريحة أمجد بالنتيجة ضحكت علية كالت اي وشهادتي ما بيها ريحة حب منا منا بقت تصنف بعد كم يوم صادف نتيجة اختي هية بهاي الفترة جايين عليها ناس وخطبتها بعد أيام وجاي نحظرلها مكدرت تروح للنتيجة كالت سارة باجر نتيجتي قبل ما تكمل كلتلها اني اروح اجيبها باوعت علية كلتلها لا يضل بالج اني فصخت بس هو بعد خاطب كالت انسي المهم غيرت الموضوع واني افكر شيجيب باجر اكيد اشوف أمجد نمت ساعات قليلة وكعدت حضرت نفسي طلعت الصبح من وكت كلت اخاف ميجي رحت بس احساسي يكول راح اشوفة طبيت للكلية واول شخص اجت عيني علية أمجد واكف يم باب الدخول وراسة على حافة الباب وبعيونة كسرة جبيرة ما شفتها من قبل فتت وعلى كيفي امشي ما اريد الطريق يخلص واني مرة عيوني علية ومرة عالطريق وصلت يمة بطئت اكثر واكثر ما كدرت اتعداه وكفت مقابيلة كتلة شلون صرت حب وصححتها امجد سكت وعيونة جاوبت قبل ما يحجي كال بقايا امجد زين بقينة ساكتين وكلشي بينة يحجي داخلنة وعيونة ملامحنة اجة عليه صديقة كلة أمجد يريدك دكتور الفلاني هز راسة وما تحرك اني انسحبت من يمة رحت اخذ النتيجة مال اختي وهو دخل نفس الغرفة اني احجي وية الاستاذة وبالي يم حديث امجد الي فهمتة هم تاخر بالمناقشة هواي وبعد شهر لازم يناقش حبيبي راح يصير دكتور تذكرت من كلي انتي من الناس الي راح اذكرهم بالاهداء واول الحاضرين وجنا نخطط شلون نحتفل بهذا اليوم لان هو كلش تعب وهوة شاطر كلش بس هم الاشياء الي صارت اخذت منة هواي
اخذت النتيجة وطلعت خابرت اختي بشرتها هم تخرجت وخلصت طلعت ورجعت للبيت ومرت خطبة اختي بسرعة وبدو تجهيزات العرس ما ناوين يطولون الخطبة مر الشهر واجة يوم المناقشة بقيت ادعيلة لامجد بعد ساعات شفت الناس تباركلة وشفتة شلون طالع عريس بالقاط وشكد تلوكلة الدكتوراه انقهرت من بعض المعلقين يلا يوم عرسك ونفرح من هالكلام طبيت خطيبتة خابصة الجو منزلة صورة مصورةوهو يناقش شلون واكفة كدامة من بعيد ومصورة سيلفي طلعت مقهورة كلش بس فرحانة لامجد نص ليل طبيت على عليه شفتة مخلي حالة مكدرت افتحها خابرت ضخى ماعدها صداقة وياه كلتلها فوتي على حالتة مراح تبينين سويلها سكرين ودزيها هم سمعتني الموشحة مال كل مرة كتلها ضحى البية مكفيني سوي الكتلج بيه هسة
سديتة بعد شوية اجتني الصور على وتساب مال حالة مالتة مصور الإهداء وناشرة
ذاكر ابوه وامة واصدقائة واساتذتة وكل شخص دعمة
والجزء الابرز بالاهداء الية كاتب
الى الغائبة الحاضرة في كل مكان اولها عقلي وقلبي واخروها لساني الى من اعطت النور لقلبي وتركته في عتمة اليل الحالك في صحراء العاطفة التي جففتها مواقف الخذلان الى اول الحاضرين والمرافقين لي اين ما حللت
الى من احبتني واوجعتني حتى جعلت مني بقايا اليوم الى من سلبت راحتي وضحكتي واحلامي الى رفيقة حلمي ويقضتي الى من علقتها على ساتر هذا الكتاب لجُمل بها اوراقي وابهج بها كلماتي واختم بها حلم التعليم
شكرا لانكي تركتني ولم تغادريني
