رشامة الحنة

البارت الرابع

➰رشـــــامـــة الـــــحنة 〰️
▪️البارت الــرابع
بقلمي: جيهان مرعشلي 🥇

فاطمة سولاتو و بقات تتسناو يجاوبهاا و تتشوفيه شوفات ممفهومينش
•غسان: بيني و بين مرتي مالازم على تاحد يدخل حنا مزوجين و العقل كاين الحمدلله ماشي مراهقين عاد غادي يتزوجو واش مفاهمين (هدر و مشا جلس فالكرسي
و هز تلفونو و هي بقات هاكاك تتشوفيه و دخلات عند حياة و هدى و عثمان الصغيور )
•فاطمة: بنتي حياة كيبقيتي شوية مزيان ,اتكوني رتاحيتي يااك ابنتي
•حياة: نحمد الله و نشكرو اخالتي رتاحيت و بزاف ههه (هدرات و شافت فولدها لي تيلعبو معاه النسا و هاد بداو يخرحو شوية بشوية و فاطمة معاهم تتعطيهم الصواب مني كيخرجو و تشكرهم و هادشي كلو دار فالصالون قريب لمسامع غسان )
•مراة:( شدات فاطمة من يديها و قربات من وذنيها تتهدر معاها) تباركالله على ولدك غسان القلب لكبير و لبيض شوف غا كيفاش دار معا حياة و ولدها بحالا تقولي و...
•فاطمة: لا الحاجة ولدي مزوج و بزينة النسا تاوحدة متعمر ليه عينيه انا هاد الخير راه كنديروه مع اي واحد و وحدة ماشي بضرورة حياة و لا ولدها نتمنى تكوني فهمتي و ربي يرض ليك مجيتك بساعة الخير (هدرات و تبسمات و المراة حشمات و خرجات من الدار اما غسان غا تيشوفيها و يخنزر على قصوحية هدرتها )

•فاطمة: انوض ندير ليها بعدا كاس الحليب سخون و حب الرشاد راه مزيان للنافسة و ديك ساعة ندير ليها شي حاجة تاكلها باينة مسكينة اتكون فيها جوع و حشمانة راه مابقا عندها جهد من ورا الولادة (تبسمات و مشات للكوزينة و غسان خرج من الدار و ركب فاللوطو ديالو و خرج قاصد واحد لبلاصة )

غا خرجت فاطمة من الكوزينة تلفتات للصالون مابانش ليها غسان و قالت مع راسها ايكون مشا لشي بيت و لا لصالة كيرتاح و لا راه ايكون غا فاللوطو لدلك مهتماتش
مشات بديك الصوينية لي فيديها فيها كويس لحليب للنافسة و مقوم على حقو و طريقو تا دخلات على حياة و هدى
•حياة: اا خاالتي (هدرات و تتحاول تنوض من على المخدة تا منعاتها فاطمة)
•فاطمة: لا لا ابنتي تي جلسي رتاحي ليك (حطات البلاطو و هزات الكاس) هاكي ابنتي هادا غادي يعاونك شوية تردي الجهد و راه مزيان للنافسات و راه ايدير لك لحليب (تبسمات و حياة خداتو بالضحكة فوجهها مبسمة و بدات تشرب تا كملاتو عاد حطاتو)
•حياة: الله على راحة ههه الله يعطيك الصحة اخالتي. (شافت فيها) فاطمة يااك ؟
•فاطمة: ااييه ابنيتي ههه اوا شوفي راه هادي دار خويا لكبير و راه هو لي مكلف بالجامع و هو الفقيه ديال هاد البلاصة مهم راه هدرت معاه راه وافق يخليك تبقاي هناا تا تشدي راسك و زيد عليها خطر عليك تخرجي و دوك الدياب تابعينك هنا اتبقا عينينا عليك و في نفس الوقت مطمنين عليك عا هو ابنتي هه راك عارفا الفقيه مهم بلاما نعاود ليك متكتريش الخريج و ادخيل فالدار (هدرات و حياة اومات ليها)
•حياة: شكراا بزاااف اخالتي فاطمة و الله منسا ليكم هاد لخير و كوني هانية (شدات ليها يديها و فاطمة تتضحك معاهاا تاا داز لوقت )
•فاطمة: اوا نخليك ابنتي نمشي نقلب على غسان باش نمشيو و نتي متحشميش راه لفقيه بحال الاب والله ميبخل عليك فحاجة و ردي البال لراسك
•حياة:(غوبشات بخفة) فين غادا اخالتي؟؟
•فاطمة: انا عندي داري انا ماعايشاش هنا غاا حيتاش خويا كان عندو شي شغل عليها كنجي انا و ولدي و هو كيؤذن فبلاصة الفقيه و انا تنجي ندور بالدار و نحل الشراجم و ليوم هو راه جا عليها صافي خاصني نمشي لداري ههه متخافيش دابا نبقا كل يومين و لا تلت ايام نجي نشد الطريق على قبلك و على قبل هاد الفن ديال عثمان و نشوفكم (دارت عند هدى) هه تا نتي ابنتي هدى هه متغيريش (هدى بدات تضحك و شكراتهاا و بقاو مدة تيهدرو و يشكيو همهم  تا شوية سمعو الدقان تلفتو كاملين لقاو غسان واقف عاد دخل محمل بين يديه لميكات و حطهم فالارض فاطمة غا تتشوف و سرطات ريقها بغضب)
•فاطمة: اش هادشي؟؟
•غسان: تزاد برزقو تباركالله(هدر مقوي صوتو بحالا كينبها تبدا تهدر عوتاني فنفس الموضوع)