[COMPLETED] မြေခွေးရှစ်တိနှင့်ဗီလိန်ရှစ်ရှုန်း || ဘာသာပြန်

[၂၆] အထင်လွဲမှားမှုကိုဖြေရှင်းခြင်း|အထင္လြဲမွားမႈကိုေျဖရွင္းျခင္း

"အစ်ကိုရှုအသတ်ခံလိုက်ရပြီ၊ သူ့အလောင်းကဒီမှာပဲ!"

_________________________________________

ချင်းချိုး၊ လျို့ဝှက်နယ်ပယ်အတွင်း၌။

အုပ်စုသည်မင်ချီလိုအပ်သည့်ဆေးပင်များကိုရရှိလာကြပြီး သူတို့အားလုံးပျော်ရွှင်နေခဲ့ကြကာ လမ်းတလျှောက်လှည့်ပြန်လာခဲ့ကြ၏။ ဤလျို့ဝှက်နယ်မြေထဲတွင်ရုတ်တရက်ပေါက်ကွဲမှုဖြစ်ပွားပြီး ပြိုကျလာလိမ့်မည်ဟု မည်သူမျှမထင်ထားမိကြပေ။

ရွှယ်ရုန်နှင့်ရွှယ်ထိုင်ကား အစကတည်းကသခင်လေးကိုကာကွယ်ဖို့ရန် ချန်းနဥ်ကပို့လိုက်ခြင်းပင်။ သူတို့ထိုလှုပ်ရှားမှုကိုမြင်လိုက်ရသော် သူတို့ပြိုင်တူနောက်လှည့်ကြည့်လိုက်မိရာ အနောက်တွင်ကျောက်တုံးကျောက်စနှင့်မီးခိုးငွေ့များသာလျှင်ကျန်ရစ်တော့သည်ကိုမြင်လိုက်ကြရပေသည်။ နောက်ဆုံးကလျှောက်နေခဲ့သောရှုလင်ကျားမှာမရှိတော့ပေ။

သူတို့နှစ်ဦးသားထိတ်လန့်သွားကြကာ အခြားသောမြေခွေးလူသားတို့နှင့်အတူ အပြေးအလွှားသွားရောက်စစ်ဆေးမိကြသည်။

ရှုလင်ကျားသည်မြေခွေးမျိုးနွယ်စု၏သခင်လေးဖြစ်ရာ သူကားသာမန်ထက်ထူးခြားပေ၏။ ခုနကအပြုအမူများဟာသူ့ကိုယုံကြည်သွားလောက်စေသည်။ သူတစ်ခုခုဖြစ်သွားကြောင်းသိလိုက်ရသောအခါ မြေခွေးမျိုးနွယ်စုကလူများပင်စိုးရိမ်သွားရုံတင်မက လက်ရှိရှိနေသည့်အခြားလူများမှာလည်း ထိတ်လန့်သွားကြကာ စိုးရိမ်သောကရောက်စွာဖြင့်ပတ်ပတ်လည်၌ရှာဖွေမိကြသည်။

"သခင်လေး! သခင်လေး!"

ရွှယ်ရုန်မှာအလွန်စိတ်ပူနေမိသဖြင့် ငိုချမိလုနီးပါးပင်။
သူသည်လက်နှစ်ဖက်ဖြင့်ကျောက်တုံးအနည်းငယ်ကိုဖယ်လိုက်ရာ အောက်ခြေ၌ကျဥ်းမြောင်းသောအဟလေးကိုမြင်လိုက်ရသည်။

အောက်ဖက်တွင်မှင်ရည်ပမာနက်မှောင်လွန်းလှပြီး မှော်စွမ်းအင်ခပ်ဖျော့ဖျော့ရှိနေပေမဲ့ ထိုနေရာတွင်လူတစ်ယောက်မျှရှိမနေပေ။ ကျောက်တုံးကျောက်ခဲများကနေရာအနှံ့ပျံ့ကြဲနေပေကာ နေရာလွတ်တစ်ခုမျှပင်မရှိ။