قدري ♥

Part 01 :

فلاش باك:

كانت الدنيا شتاء و الجو بارد...مجموعة من الاطفال الصغار يلعبو بكرات الثلج ويصنعو في رجل ثلج و اصوات ضحكهم مالية المكان...و في وسطهم كانت هيا قاعدة قدام طابلة صغيرة فيها ألعاب وتنادي بصوتها الصغير بش يجيو يشريو عليها دمى ورقية صغار بدينار واحد لابسة بوني في الابيض و شعرها على برا و مونتو في الغوز و ايديها الصغار مجمدين من البرد جاها مراد هاز شقالة فيها سباقيت سخونة قعد حذاها و صقصاها اذا باعت شيئ اما جاوبتو بلا وهبطت راسها حزينة ياخي طلعولها ورسملها ابتسامة في وجهها حتى ضحكت و قاللها بش تذوق من الماكلة هزت المغرف اما ملامح وجهها كانت كفيلة يعرف رايها وقاتلو الي هيا حامضة برشا اما عقب علاها بتقلاب عينيه وقاللها انها الحامضة ضحكو الزوز مبعد استوا روحو و طلب منها بكل طفولية و عفوية انها تبوسو ماشي في بالو انو شيئ عادي و هوما صغار و صحاب ياخي قامت هزت الشقالة وكبتها الكل على راسو وطرشقت بالضحك و قاتلو تستاهل ياخي قام يضحك حتى هوا بكل براءة خرجت بعدها من جيبها اوراق لعب لي هوما عبارة على بطاقات كل بطاقة فاها تحدي معين ووقت تختار انت بطاقة عشوائيا يلزم عليك تعمل التحدي هذاكا...هاذي كانت لعبتهم من صغرهم عبارة على لعبة صداقة تعبر على انو اي حد فيكم ينجم يعمل اي شيئ في خاطر الثاني...اختار بطاقة ياخي طلعتلو انو يلبس روبة متاع عرس و يخرج البرا ويقول انا بش نعرس

اند فلاش باك:

قاعدين في قهوتهم المعتادة المكان لي يقضيو فيه اجمل اوقاتهم من لي هوما صغار لتوا يضحكو وشايخين وكأنهم قاعدين وحدهم في المقهى وممعاهمش عباد اخرى تستغرب من علاقتهم القوية اما الكل يعرفو انهم اعز صحاب من الصغر لدرجة انهم يضربو بيهم المثل في الصداقة

نفس:ههههه اي نتذكرها هاذي...وتذكر انت وقت لبست لبسة الغواصين و خرجت بيها للشارع تسأل على البحر الابيض المتوسط وين جاي

ضحكو الزوز لين دموعهم سالو

مراد:ههههه كرينج والله....ووقت شفتي الكوبل في الجاردان قمتي ضربتي الراجل وقلتليلو يا خاين تبدلني بوحدة كيما هاذي

نفس:هههههه اششش اشش والله كرشي وجعتني....في بالك النهار اذاكا كون ماكنتش معايا راي صاحبتو عطاتني طريحة تاع كلاب

مراد:والله كان راح نكملو معاها اللعبة هاذي منا على سمانة نباتو في الحبس

استوات قعدتها ووجهتلو صبعها في وجهو تهدد فيه

نفس:مراااد ما تنساش قطعنا وعد لبعضنا اننا نكملو بيها حتى يتمو البطاقات الكل

رجع لتالي تكا على الفوتاي وحط يديه ورا رقبتو

مراد:مزلت عند وعدي انا...اما خايف عليك انتي لا يسلسلوك للحبس

نفس:متخافش حتى كان سلسلوني نورطك معايا نقوللهم هوا صاحب الفكرة

مراد:بربي...شكون طلع بيها فكرة اللعبة الاول

نفس:انا...اما شكون وافق ومعارضش انو نلعبوها

مراد:وافقت انو نلعبوها مشو انها تدينا للحبس

نفس:نفس الشيئ انت قاعد تخاطر هكا ولا هكا يعني حتى كان موصلتش للحبس باينة كاين عواقب وخيمة اخرى

خزرلها في عينها وقرب وجهو لوجهها وتبسم

مراد:ياخي ماتخافش انتي

بعدتلو وجهو بايديها وضحكت

نفس:علاش عندي بش نخاف...تعرفني نعمل كان لي في مخي

مراد:اي و على هذاكا يلزمك تخاف لانو المخ هذاكا بش يديك للهاوية بأفكارو

نفس:تتكلم وكأنو انت بعقلك وماكش مشاركني فيهم الأفكار جملة

مراد:ولي يعاشر وحدة مجنونة كيفك ينجم يقعد بعقلو

ضحكت بالقوي لين قفللها فمها

مراد:سكر فمك يا سخطة ديما فاضحتنا

نفس:سامحونا حالة لا ارادية الله غالب

ضحك على هبالها وكملو يحكيو بلا ما يفيقو بالوقت كيفاش يتعدا