ذيب بابل

[المشــــهد الاول]

اصوات غريبة همسات ، هلاهل ، دنابگ ، صياح ، شعوذة تقشعر الابدان
كلهن اسمعهن يرنن بإذني بالرغم بس احنة الثلاثة الگاعدين بهالغرفة بس ذني الاصوات شنو؟؟؟ مادري....

ثانيه ركباتي وگاعده بالگاع، اباوعلهه تسوي حركات غريبة ولون عيونهة نگلبن الى بياض ويرجعن طبيعي..

جسمي يرجف مثل السعفة گبالهة وهي تسوي حركات شيطانية على الطفل اللي حاطي على الفراش

صار صوت بي رهبة وبحة قشعر جسمي ووجهي شحب بخوف ياربي شجابني على هالبيت شوازاني اخاف يگعد ويحس عليه مموجودة بالفراش سترك ربي!

قاطع تفكيري حركة غريبة صدرت منهه، فزيت من مكاني واني اباوعلهة منقرفة من محياها، حچت بنبره راجفة وابتسامه خبيثة مرسومه ؏ وجهها...

-هذا راح يصير شي چبير وصاحب مركز عالي بالمستقبل!! الاجسام راح تتراجف برهبة بس يسمعون باسمه!!!

بلعت ريگي وحچيت...

- لـ.. ليش... شنو حيكون؟؟؟

بقت منزلة راسهه ورفعت عيونهه الجاحظة تباوعلي، حچت مُحذرة...

-ماكدر احچي ، بس ديري بالج من هالطفل هذا يرفعكم لسابع سما وينزلكم لسابع ارض !!!

ظليت مركزة ويه كلامهه وهيه استرسلت...

-هذا الطفل مو صاحي ملعون الشياطين مراح تلعنچ ؏ عملتچ رح توگع براسه

قاطعتهه...

-بَـس اني معـ.....
قاطعتني العرافة بنترة قوية....

-مبين علي راح يتلوع بعشگ مسودن ويزرف گلبه مثل ما ابوه زرف گلبچ

فتحت عيوني بتوسع من السمعته ونصيت راسي للطفل وبداخلي محروگ گلبي علي، سألت مترقبة جوابهه...

-زين ماعرفتي منو ابو؟

-ههههههههههههههههه ادري ادري

-زين منو؟

-معليچ

نترت بيه وگامت وگفت بزاويه الغرفه وتتهامس وحدهه واني حاظنه الطفل وگاعده، رجعتلي وگالت بجمود...

-مانعرف ابو طلعت غلطانه بس الاعرفه راح يجي يوم ويدخل بهالمكان ويتعده من هالدروب!

شهگت بخوف وضربت ؏ صدري..

-شعنده بهالدروب هاي اماكن كلهه شعوذة وبيوت دعارة! معقوله حيحن لأصله!

فاجأتني من حطت اصبعهه السبابه ع شفايفهه الغليظة وگالت...

-هششششش هسة يسمعون!!!

جسمي يرجف وگلبي مينبض اظنه وگف لو رح يوگف من الخوف، گمت من مكاني وترخصت منهه وطلعت اركض اريد اطلع من هالبيت اتلاحگ لروحي قبل لا اتخبل..

نزيت من شفت بزونه سودة بوجهي وعتوي يعوي وينوح.. ظليت بمكاني حايرة ماندل وين الباب منين طبيت انييي شجابني لهلخرابه!! طلعت ام جحبذ العرافة من الغرفة، چانت تباوعلي وتضحك گالت بصوت يشبه الفحيح...

-هااا تيهتي الباب؟

اشرت براسي اي ميطلع الحجي مني حسيت انبلع لساني، مبتسمة تك خد وتأشر بحواجبهه الكثيفة على زاوية..

درت وجهي اباوع شفت برده..
ركضت عليهه زحتهه شفت الباب الدخلت منهه اللهم لك الحمد

طلعت من البيت اللهث ادعي ربي ميعترظلي احد بهالليل..

عبرت بيتهه واحس عيون تراقبني اتلفت بس ماكو احد، تعديت من كم بيت واني اسمع اصوات بنات الليل تتعالى ضحكهن وعياطهن..

تعوذت من الشيطان وطلبت من خالقي الستر ماريد شي بس خليني اطلع من هالدرب بسلامة..

تعثرت بشي قوي صحت "آآه" بألم مكتوم خوفاً احد يسمعني، نزلت نظراتي لرجلي وتخربطت اوضاعي من شفت بطل زجاجي مكسور سترك ربي هذا بطل خمر!!

من الخرعة حسيت بدموعي تنزل اسمع همسات ورايه اخاف اللتفت واشوف منو...
ارتاحيت من سمعت صوت اذان الفجر جاي من جامع بعيد.. يارب بجاه هالاذان استرهه ويايه وخلصني من هالمصيبه، حسيت بالطفل يتحرك كام يبچي بصوت مخنوگ حظنته بقوة واهزه اريده يسكت اخاف احد يسمعه..

سمعت صوت رجال ورايه..

الرجال بلسان ثگيل: ها كبد شو وحدچ؟

منطيته ظهري مادرت وجهي اخاف يشوفني شابه ويفترسني.. اركض بخطوات ثگيله بسبب اصابة رجلي.. الطفل زاد بكاءه واني سرعت خطواتي بَـس للاسف لقطني، حسيت بأيده قوية تجرني.. سفطني على الحايط واني حاظنه الطفل، مغمظة عيوني وانخه شريفه بت الحسن تساعدني... انفاسه النتنه الواضح شارب مشروب تضرب وجهي..

تفآجأت من سمعته يكول...

-سَحَر؟؟؟!

فتحت عيوني اباوعله، هذا... هذا... هذا هلال!! گلت بعدم وعي...

-هلاال!!! شتسوي هنا؟؟

يباوعلي ويباوع للطفل، ابتسم بخبث وگال...

-عرفتچ ما خاليه وعندچ سوالف يا مرت اخويه

-هلال بس خليني افهمك!!

ابتعد عني ونتر بعبوس...

-منو هالابن الحرام البيدچ؟!

يتبع...

**