رواية
" مُلاذ أمن "
الحلقة الثانية " 2 " ✨
فتحتلهم الفيديو وقعدوا يتفرجو بعد شافوه ويحاولوا يتفكروا بس معرفوش وبدات سفيان
- يوسف ( كإنه اتفكر شي ) : هاده مش نفسه يلي كان صاحب هشام من سنتين وهوينا صارت عركة كبيرة بيناتهم ؟ تقريبا هوا
- سبين ( بتأكيد ) : لالا يا يوسف هداكه عزيز نعرفه كويس من ايام الثانوي ديمة مع هشام قدام فشارعنا
- يوسف : والله ماني عارف بس شبهته ! ترا رقمه نشوفه ف الكاشف
- سفيان ( كان عنده الرقم بعد خداه من تلفون اخته ) : اهو شفته اني ، غير معروف 😕 عاطيك رقم غلط الكلب ، اتصل اتصل يوسف
- يوسف ( كتب الرقم واتصل ) : غير صحيح ولد الكلب، وراه قصة
شبحوله سبين وسفيان مع بعض
- سبين : انيي متأكدة شكله مار عليا شابحاته ف مكان بس مش متفكرة
- سفيان : يتهيالك مرات غر تتوهمي ،
- يوسف : توا خلونا منه هاده وتوا اختكم هادي كيف بنتصرفوا معاها
- سفيان : وديني وما نعبد لو مش امكم يلي كاسرتني راهو قددتها ونشرتها ع الحبل الحيوانة هادي
- يوسف : ريحلي روحك توا وهاتولي حاجة بالعقل
- سبين ( حطت ايدها ع راسها ووجها كله يأس ) : لامتى بس بياخدو مني حاجاتي ، نجلاء الاسبوع يلي فات بايعة ذهب امي وسنسلتي معاها ، حوايجي معاش نلقى فيهم كل شي خاص بيا واخدينه لاامتتتى ياربي بنعيش مع خواتي هكي
- يوسف ( شبحلها وكإنها يشجع فيها ) : نوضي نوضي توا نخلوها تردهم بالسيف
- سفيان : شن بدير ؟
- يوسف : متستعجلش صبر بالك
- سبين ( نزلت راسها ) : كان مقالتش خلاص فوتوهم مش لازمني
ناض سفيان وقف فوق راسها وخبطها بحركة خفيفة ع كتفها ويبي يغيرلها جوها : نوضيي نوضي وخراصاتك يكونوا عندك غضوة بادن الله
- يوسف : خلاص روحي توا وانتبهي ف الطريق وغضوة توا نشوفوا موضوع السيارة
- سبين ( وقفت وكانت فرحانة بخوتها ) : تمام اهو طالعة توصوني ع اكلة حاجة نطيبها ؟
- يوسف : كان اديريلي تشيز كيك وهوت شوكلت غضوة خاطري فيهم منك مش مشريات
- سفيان : جت النية فيها 🤤
- سبين ( تضحك وتشبحلهم وفرحانة بيهم ) : ههههههه توقعتكم تطلبوها توا نوتي ونتصل بيكم
- يوسف : بري بري وردي بالك ف الطريق
طلعت من جنبهم وهيا مطمنة ان خراصاتها يولولها مكانتش طامعة فيهم لانهم ذهب !
كانت كل همها انهم هدية من بوها يلي فقداته ، واخر ذكرى منه 💔
_____________
ام غزل : يا لُجييين يا لُجين تعاليي
- لجين : نعم خالتي
- ام غزل : بالله عليك شوفي غزل نوضيها ، راهو لا امس لا اول امس حطت حاجة ف فمها وهيا ادوخ اليوم وبس ،
- لجين : خليها يا خالتي ماصدقنا فشلت هيا وانسام ورقدوا ، توا كان بنوضها بتنوض حتى انسام
- ام غزل : باهي باه بس بري ديري طلة عليهم ، اني خايفة عليهم را وبالمرة تلقي نسيبة راقدة ع سرير خوها فوق شوفيها حتى هيا ، البنت صغيرة ومتعرفش راهو بري بري
