#ليُحيا_بك_قلبي8
بقلم: ميامن أحمد
أثناء ما هو كان واقف بعاين لي وما قادر يتحرك قلبي بقى شغال عبارة عن دلوكة أنصاف مدني وأطرافي كانت متجمدة وبقيت ما حاسة بيهم بس كنتا واقفة ومشربكة أصابعيني في بعض وما قادرة أنطق بحرف واحد، هو لمن أدرك أنو دي أنا فعلا طوالي قبل على الجهة التانية وقال لي بصوت متقطع أن.. أنا جد أسف ما كنت مفتكر أنك ممكن تكوني واقفة وراي بدون نقاب يا ميامن .. لحظة قال إسمي أنا هنا ما عارفة الحصل لي شنو بالظبط لكن دخلت في حالة عجيبة غريبة وأتاكدت أنو هو عرفني إتوترت جداً وقلبي من الضرب الكتير لمن حسيتو نزل في رجليني، ويا خلعة ما تمت سمعت أصوات أولاد جايين من الصالة، قلت ليهو وااي أنا عاوزة أمشي فوق، قال لي لكن كدا الاولاد الجو هسي في الصالة ح يشوفك قلت ليهو وأنا أعمل شنو في الحالة دي😭! قال لي عايني ح أمش وأشغل بالهم وإنتي في المسافة دي أطلعي فوق سريع وما إستناني أرد زاتو وفات تقريبا هو كان متوتر أكتر مني، مشى بقى يشغل في الاولاد وشغال ليهم أووو جيتو ياداب نحنا لسه ما شربنا القهوة منتظرنكم ولفتهم عليهو وهما أدوني ظهرهم وهو كان مقبل تجاهي، جريت جري وبسرعة طلعت السلم لمن وصلت أخر درجة أتلفت عاينت ليهو لقيتو هو زاتو بعاين اللحظة ديك قلبي قال شحححح❤️حسيت بخطواتي تقيلة وأنا ماشة على الغرفة وكل دقيقة موقف لمن شافني بدون نقاب وبي بجامتي القصيرة ديك وشعري الفاكي بجي في مخيلتي وبتعاد قدامي كانو حصل مرة تانية وفي نفس الثانية، ما عارفة زاتي كيف قدرت أصل الغرفة، لقيت أفاق جات، قعدت في الكرسي ودموعي نزلو وقلت هسي بكون فكر عني شنو! ناس مهاد أتخلعو لمن شافوني ببكي وجو جارين علي، مهاد قالت لي ميامن بسم الله مالك بتبكي! قلت ليها قبل شوية وأنا ماشة على.... حكيت ليهم الحصل، مهاد قالت لي لا دقيقة هو كيف دخل البيت ساي كدة! أفاق قالت ليها أنا قلت لي ميامن تخلي لي الباب فاتح وصادفتو جاييكم ف جا داخل معااي قلت ليهم عانو حالتي عاملة كيف وهو شافني بي المنظر دا، أفاق قالت لي مش يحيى أخوي دا ما بكون ركز معاك قلت ليها الموقف محرج يااخي وبعدين أنا منقبة وهو شاف وشي😭، مهاد قالت لي عادي بتحصل قلت ليها لا ما عاادي قالت لي ميامن بطلي بكى على حاجة فارغة والله ما فيها شي قلت ليها فيها حاجات ما حاجة واحدة وخليني أبكى بي راحتي😭، قالت لي خلاص أبكي نشوف نهايتك دي حدها وين واحدة بكاية بس ما أكتر قلت ليها أيي أنا بكاية يلا زحو مني، مشيت رقدت في السرير وتابعت باقي البكى بتاعي، أصلا أنا ما عارفة مالي من أقل شي ببكي ودموعي طبيعي في طرف عيني وبس مستينة أقل بسبب عشان تنزل، بعد الحصل دا تاني ما نزلت تحت نهائي الا بعد أتاكدت أنهم مرقو..
اليوم التاني من الصباح طلعت بدري شددديد بس عشان ما أصادف دكتور يحيى لاني ما ح أقدر أخت عيني في عينو بعد الحصل، حتى صحباتي في المحطة ما أنتظرتهم وطوالي مشيت الشغل وضربت وريتهم أني فتا المستشفى، لمن جو الاء قالت لي الست هانم الليلة مالك حاسة بشنو جاية بدري كدة ولا كمان قبلينا! قلت ليها أسكتي بس حصل معاي موقف لا أحسد علية قالت لي مالك!، حكيت ليهم الحصل كلو، براءة قالت لي وااي قلتي لي شافك! قلت ليها تخيلي بسس قالت لي حاجة حلوة يااخ😢❤️قلت ليها حلوة في عينك يا وسخة، الاء قالت لي المواقف الزي دي بتحصل عادي ما تشغلي بالك كتتتير قلت ليها سيم سيم نفس الكلام مهاد أختي أمبارح، قالت لي عشان تعرفي أنو صح قلت ليها أمممم ح أحاول ما أفكر فيه، الاء قالت لينا عان الجو ظابط كيف شكلو ح تنزل أمطار غزيرة قلت ليها الجو دا نهائي ما جو شغل قالت لي فعلا قلت ليها الخريف يأدبو بداً أعملو حسابكم ح نظبط طلعة قالت لي قدام يا زولة وما تمت كلامها كداً تلفون براءة ضرب ألاغنية العاملها نغمة رنين كانت حلوة وعجبتني جداً مع أني بطلت أسمع أغاني لكن ما عارفة ليه ركزت مع الاغنية دي تحديداً، في قعدتنا ديك المطرة بدت تنقط والجو كان درعة❤️عملت جهدي عشان ما إتلاقى مع دكتور يحيى خالص لكن لسوء حظي الزفت اليوم دا بالذات كنا ح نبيت في المستشفى لانو عندنا ديوتي ليلي...
