ဂန္တဝင်ဂိုဏ်းချုပ် အတွဲ(၅) End (Unicode)

၁၂၁၁-၁၂၁၂

စာစဥ် ၆၃ : အပိုင်း ၁

အပိုင်း ၁၂၁၁ : ကောင်းကင်ဖျက်ဆီး ဓားမဟုတ်သော အံ့ဖွယ် ကောင်းကင်ဘုံဂိုဏ်း၏ ဓားကွက်

ခရမ်းရောင် ဓားအရိပ် တစ်လွှာပြီးမှ တစ်လွှာတို့သည် ကောင်းကင်နှင့် မြေကြီးတို့၏ အကြားတွင် လင်းလက်နေ၍ အစိမ်းရောင် အလင်းတန်းများနှင့် အဆက်မပြတ် ရင်ဆိုင်နေကြသည်။ အစိမ်းရောင် အလင်းတန်းများသည် လော်ချင်းဝူ၏ အင်မော်တယ် ဝိညာဥ်ဖြင့် ဖန်ဆင်းထားသော ထိုက်ကျိရုပ်ပုံနှင့် သူမ၏ ခရမ်းရောင် အလင်းတန်းများကြောင့် အမျက်ထွက်နေသည်။

သို့ရာတွင် ထက်မြက်လှသည့် ခရမ်းရောင် အလင်းတန်းများသည် ပမာဏ နည်းပါးနေသော်လည်း အရည်အသွေးပို၍ အထက်တန်း ကျနေ၏။ သူမ၏ တောက်ပလှသော ဓားဆန္ဒများသည် သူတော်စင် ကောင်းကင် ကမ္ဘာဦး ဓားဝင်္ကပါ၏ အစိမ်းရောင် အလင်းတန်းများကို ခုခံနေ၍ တစ်ဘက်ကမှ အလျှော့မပေးခဲ့ပေ။

ကျူးကော်ကျန်းသည် တစ်ဘက်မှနေ၍ လော်ချင်းဝူအား ထောက်ပံ့နေရင်း သူမက အင်မော်တယ် ဝိညာဥ် အဆင့်သို့ တက်လှမ်းအပြီးတွင် သူမ၏ ထူးခြားဆန်းကြယ်၍ စစ်မှန်သော ဓားဆန္ဒကို ခံစားလိုက်ရ၍ သူ၏ခေါင်းကို အဆက်မပြတ် ညိတ်မိလိုက်သည်။ "သူမက အခုကလေးတင်မှ အင်မော်တယ် ဝိညာဥ် အဆင့်ကို ရောက်ရှိနိုင်ခဲ့ပေမဲ့ အမတန်မှ အထင်ကြီးဖွယ်ရာ ကောင်းလှတယ်"

ရွှမ်းချီဓားနှင့် ရတနာ ခုနစ်ပါး ဝါးမီးကြိမ်လုံးတို့သည် ထိုက်ကျိရုပ်ပုံအတွင်းသို့ ဝင်ရောက်သွားသည်။ ထိုက်ကျိရုပ်ပုံသည် ဟင်းလင်းပြင်နှင့် ကောင်းကင်ပေါ်မှ ခရမ်းရောင် အလင်းတန်းများ အတွင်း၌ တစ်ချက် လည်ပတ်လိုက်ကာ လော်ချင်းဝူသည် သူမ၏ မူလပုံစံသို့ ပြန်ပြောင်းလိုက်သည်။

ကောင်မလေးသည် ဟင်းလင်းပြင် အတွင်းတွင် နေရာယူလိုက်ကာ ခရမ်းရောင် ဝတ်စုံအား ဝတ်ဆင်ထားဆဲပင် ရှိသေးသည်။ သူမ၏ အနောက်တွင် လွင့်မျောနေသော အနက်ရောင် ဆံပင်များအား အဖြူရောင် ကျောက်စိမ်း ဆံထိုးတစ်ခုဖြင့် ချည်နှောင်ထား၏။

ဤအချိန်တွင် သူမ၏ ခေါင်းကပင် တောက်ပလှသော ခရမ်းရောင် အလင်းတန်းများဖြင့် လင်းလက်လျက်ရှိသည်။