اشتريد اتسمّي...سمّينه....
تجسّر واكح اليدريك...واشخص ماين ابعينه...
وأخذ نوبك ولو للّوم ....للنجلات ما بينه...
جزرنه او حدّر السفّان...ما وجّه أعله شاطينّه...
ونشفنه ولا هرش بالروح....غزّر بي ملح طينّه....
اشعجب وهروشنه امن اتموت....
بيد الموت تبجينه....؟؟؟
ولو كل واحد ابدينه....
إلك بينه العمر منذور...
فرح عشرة وضحج ساعات...
واتمرجح ليالينه...
وهوانه وطيفنه الجذاب...والشوك البتل بينه...
إلك بينه...وإلك بينه....
ومشه المصيوب يتوجّه اعله عشرينه....
يحشّم وين المحبين...
وين الوفي اليوفينّه؟؟؟
يخوّتنه...يعشرتنه...
يشامتنه...ويواشينه...
وتبرّوا واليطيح ايكوم...
كون المستحه ابعينه...
يتل سنته ويدك الشوك....
وج يسنينّه اشبينه...؟؟؟
نشفنه ولا نداوة فيض...
بعد الموت تحيينه...
وتظل بس العتابة اطياف...
مجلوبه وتمنينه...
تمنينه...وتمنينه...
اوتمنينه العمر شمعة سهر...والريح تطفينه...
او تمنينه خيال ابماي راجد...روج يمحينه....
او تلملمنه او تبدينه...
او صبرنه اشيكدر المذبوح واشبيده اعله سجينه...؟؟؟
يصبري اتستر اعلينه...
مضيف الشوك يابو الشوك...
من نجرة فناجينه...
وعشير الماتهزه الريح...وك خفّت ميازينه...
نهاني او سنّع العشرين ...واختلّ بثلاثينه...
وحك وشلة توالينه...وحك وشلة توالينه...
لشاجج عيني ابعينه...
واكلله:الدغش بهواك ...
وك موش الدغش بينه...
هذوله احنه الزرعنه الطيب...
(شتسمينه....سمّينه....
