الخامسة
فارس طلع برا بالتليفون وهو قريب ينجن: انت شن تقول؟؟
الدكتور: زي ماسمعت يااستاذ فارس وياريت تجيبها في اسرع وقت عشان نشوفو لو محتاجة كيماوي نبدولها في الجرعات
فارس شاد شعره ومش مصدق: تي كيماوي شنو...يادكتور بالك غالط
الدكتور: الحاجات هاذي مافيها غلط اني قتلك وانت تصرف
سكر فارس من الدكتور وخش لداخل لقاهم حايسين في بعض....انتصار تخبط وتعيط وخالد مقعمز وايديه علي راسه ومش قادر يفكر.وسعاد قريب تطير علي خاطر ولدها متورط في الموضوع ..قعد فارس يشوف لرويدة وكان يلقي يمشي يحضنها ويبكي
ورويدة كانت تبكي وجعوها بوها وامها كيف حالتهم
صالح جي من المربوعة: هيا التريس والشيخ يستنو ياخالد
خالد: ياعليك عار شن بنقول للناس شن بنقول ياحشمتي
فارس: خالي ماتكدرش روحك ياخالي...واني لو ماعندكش مانع يشرفني نطلب رويدة
الكل انصدمو وقعد يشوفو لفارس واولهم رويدة
خالد: شن تقول انت يافارس شن نلعبو اهني كان ماصارش من الاولي تاخد اختها
فارس: لا حشاك ياخالي...بس هاذا احسن حل مايخليش راسك في الوطا قدام الناس...واني نتشرف برويدة
رويدة تشوف لاريج وهي فاتحة فمها من اللي تسمع فيه.
خالد: لكن.......واهني قاطعاته الحاجة امنة: خلاص ياخالد كلام فارس عين العقل هاذا احسن حل والا تبي سيرتنا علي كل لسان
رويدة حست روحها كبش فداء بس مش علي شان فارس يحبها...لا بس عشان ينقذ سمعة العيلة طلبها
رويدة: وشني اني ماعنديش راي
التفت الكل لرويدة...خالد: البنت عندها حق رايها هو المهم
الحاجة امنة: اكيدة رايك مهم حبيبتي شن رايك؟؟؟
رويدة: لا مش موافقة نكون كبش فداء واضحو بيا....مش موافقة ان شخص مايحبنيش يتزوجني غصبا عنا... وكانت رويدة تبكي بألم لانها تحب فارس بجنون بس ماتقدرش تكون بديل لاختها
فارس: بعد اذنك شويا ياخالي....وشد رويدة من ايدها ودخلها لداره
رويدة دموعها علي خدها: شن تبي مني....معقولة اديرني زي الشكورطة يافارس
فارس: حاشاك يادودة حشاك....والله انت اغلي من عيوني....بس نبيك جنبي يادودة مافيش غيرك حد يقدر يحس بيا
رويدة: جنبك في شنو
فارس: بعد عملت اميرة هاذي ..بنسافر وضروري اندير العملية لوجهي اني متأكد ان اميرة رفضتني للسبب هادا فنبي نرمم وجهي بالك نقدر نرمم جراحي... ونبي فترة نبعد فيها علي اهني عشان نقدر ننسي اللي صار
رويدة وجعها فارس: فروسة اميرة غبية انها ضيعت حبك
فارس: باه ماضيعيش انتي المعزة اللي بينا ووافقي..لاني مش حنقدر ندير اللي في راسي كان انتي مش معايا...انتي جنبي ديما في كل شي ماتتخليش عليا توا
رويدة: بس....
فارس: نوعدك نكونو اخوة وبس... واول مانكمل عمليتي نرجعو لليبيا ونطلقو... واي شاب يتقدملك اني نشرحله كل شي
رويدة حست بموس انغرس في قلبها من كلام فارس...توقعت يقول انه غلط باختياره لاميرة وانه حس بحبها اخيرا.: لا لا مش موافقة
فارس ودموعه في عيونه: بالله عليك يارويدة وافقي بالله عليك...وهاذي كانت اول مرة فارس ينادي رويدة باسمها مش دودة....فارس كان أعمي بجد في هاذيكا اللحظة وماشافش حب رويدة ليه بس كان يفكر في شي اهم وهو مرض رويدة وكان يبي اي طريقة عشان يطلعها برا ويعالجها...وبدون ماتكون مرته مش حيقدر... وماكانش يبي حد من العيلة يعرف بمرضها
رويدة تجمدت لما شافت دموع فارس..ماترضي فيه حتي دقة الشوكة ونزلت راسها: اوكي موافقة
فارس تنهد: شكرا يادودة شكرا
رويدة في خاطرها" والله نحبك نحبك ومانقدر نشوف دمعه في عيونك...مش زيك انت مبهدلني في حبك"
طلع فارس ورويدة من الدار...وقالو للعيلة ع القرار.... والكل كان متنكد من هالقرار الا الحاجة امنة كانت في داخلها فرحانة...لان اللي تبيه صار وفروسة نور عيونها خدي رويدة حبيبة قلبها...
كتب الشيخ العقد بعد ماسمع من رويدة..وتم كل شي وروحو الرجالة
خش خالد لداخل زي المجنون: قسما بالله اميرة هاذي كان نلقاها بنشرب من دمها
انتصار: تعوذ من الشيطان ياراجل
خالد: هاذي عملة اديرها والله نهارها احرف غلي راسها وين بتهرب مني وين؟؟؟
صالح: ولدي حشمني معاك ياخوي سامحني
خالد: حتي بنتي مشاركة وغلطانة زي ولدك.ياريتها غير جتني كلمتني مش هكي تحشمني
الحاجة امنة: وين بيمشو يعني صايروهم بيرجعو...حسان مفلس ماعنده وين ايطير
رويدة كانت في المطبخ هي واريج...رويدة: شفتي اللي صار ياروجي نحس في روحي نحلم
اريج: اللي تبيه صار افرحي
رويدة بعصبية: لا يااريج لا مش هاذا اللي نبيه... نبي يتزوجني لانه يحبني ويموت فيا... مش لاني ديما في جنبه ومتعود عليا...مش علي خاطر اختي هربت نكون اني في مكانها... اني كيف وافقت بس كيف؟؟
اريج: خلاص يارودي توا اللي صار صار..خيرك... وماتندريش ممكن مع الايام يحبك
رويدة: نحس في قلبي انجرح اكثر يااريج...اني كيف رضيت لنفسي هكي كيف
اريج: الله غالب يارودي...وانتي بتصرفك هاذا انقذتي عيلتك من كلام وتفتفيت الناس
وهما قاعدين يتكلمو خش عليهم فارس...اريج: مبروك فارس....
فارس: الله يبارك فيك...قالها بحزن
اريج:امممممممم خلي نمشي نشوف خالتي انتصار بالك تبي مساعدة...وطلعت
كانت رويدة مقعمزة ع الكرسي وباين علي وجها الحزن والتعب...خدي فارس كرسي وقعمز مقابلها: معقولة هالحزن هاذا كله لانك تزوجتيني...نحس في روحي وحش فعلا زي مايقول حسان
رفعت رويدة عيونها في فارس بعتب: شن هالكلام...انت تخرف والا شنو
فارس: باه علاش متنكدة احني اتفقنا علي كل شي
رويدة: نحس في منطري بايخ يافارس...
فارس: وعلاش بالعكس انتي ضحيتي بنفسك وارضيتي تتزوجي واحد زيني.. عشان بس توقفي معاه لما طلب منك
رويدة نزلت راسها" لاني نحبك يافارس افهمها نحبك...امتي بتحس بيها": خلاص اسكت والا نزعل منك خلاص
فارس: دودة نبي جوازك غدوة بنتم الاجراءات وبعد غدوة نسافرو
رويدة تفاجأت: بالسرعة هاذي
فارس: ايه خير البر عاجله
رويدة: بس شغلي...وبابا بتقوله قبل.و....مانعرفش بس نحس مازال نبو وقت
فارس: دودة مش قادر نتحمل القعدة اهني بالله عليك افهميني
رويدة: باهي يصير خير ان شاء الله
فارس: اوكي اني بنمشي نرقد نحس في نفسيتي صفر
رويدة حطت ايدها علي ايده: تبات نار تصبح رماد فروسة...
فارس ابتسم : مغلاك عليا يابنت
رويدة تحشمت وحاولت ماتوضحش: نوض نوض كان بترقد
خش فارس لداره ع اساس بيرقد بس ماقدرش حاسس بجرح في قلبه من اللي داراته اميرة اليوم وحاسس بالقهر...
ضمت رويدة الحوسة هي وامها وباقي النساويين...وكانو يشوفولها بنظرة شفقة علي صارلها وهي كانت مضايقة من الموضوع وبمجرد كملت ركبت طول لدارها واتقلبت اتقلبت بعدين غلبها النوم ورقدت
&&&&&&&&&&&&&&&&&&&
فاقت رويدة الصبح ع صوت عياط ونزلت تجري بتشوف شن في...
لقت عمها صالح جايب حسان ويضرب فيه.وخالد شاد اميرة ويضرب فيها: بتنزلي راسي للوطا يابنت الكلب
النساويين يتعايطو وفارس طلع يجري من داره حتي هوا وقعد يحز: ساد ياخالي ساد وفك اميرة منه
حسان: ماتحطش ايدك عليها نحي نحي
صالح: ومازال عندك عين تتكلم وزاد يضرب فيه
جي فارس حز بينهم....وحسان فلت من بوه وامشي بعيد ...واميرة عقلت علي حناها
الحاجة امنة: علاش درتي هكي علاش،مش عيب عليك اللي درتيه
حسان: ماتبيش تتزوجه شن بالسيف
صالح: وانت شن دخلك ياحمار...وهاذي عملة اديرها تهرب انت وياها ياكلب
حسان: احسن مايتزوجها الوحش هي البنت ماتبيشي شن بالسيف
خالد: وعلاش ماقالت هالكلام من الاول...
حسان: خافت منكم
فارس: كان قالتلي حتي اني،ماكانش صار هكي
حسان:هههههههه حتي ولو عاد انت فروسة حبيب الكل من يقدر يرفضلك طلب...واني متأكد لو قالتلك كان عمي اجبرها
صالح: سكر فمك وتحشم ياولد
حسان زاد بعد خايف من بوه: هاذي الحقيقة يابوي...كلكم عندكم فارس بالدنيا ومايهمكم الا رضاه والباقي ان شاء الله ينحرقو
فارس: انت علاش تكرهني هكي
حسان: لانك من يوم جيت لحوشنا وانت الابن المدلل للعيلة...حتي احنينة فضلاتك عليا بالرغم من اني حفيد العيلة وانت اللي براني.. بوي وعمي شوف فارس كون زي فارس ريت فارس...فارس فارس فارس نكرهك نكرهك يافارس وطلع وخبط الباب وراه
فارس سكت ومازادش ولا كلمة مصدوم من حقد وكره حسان ليه..
صالح: قليل الادب والله لما نربيه من اول وجديد هالكلب
الحاجة امنة: فروسة ماتعدلش عليه هاذا متروشق....
خالد: انتي امشي انتلفي لدارك وتطلعي برا منها نهارك....
ركبت اميرة تجري لحوشهم خايفة من بوها ولحقتها أميرة...وركب وراهم فارس يبي يسأل اميرة علاش دارت فيه هكي..وكان باب الحوش مفتوح
ارتمت اميرة ع السرير وتبكي...رويدة: علاش درتي هكي مش حرام عليك فارس
اميرة بعصبية: فكيني منه هالاعور... اصلا اني مانحباش هالمقزز...
رويدة: ضمي فمك وتكلمي بادب هاذا ولد عمتك ومادام ماتحبيشي علاش توافقي عليه
اميرة: لاني كنت غبية ومانعرفش نتصرف كان هاذا معقولة نتزوج هاذا
رويدة: قصدك عادي عندك تجرحي الناس وتهنيهم
اميرة: فكيني يارويدة فكيني....سادني اللي فيا
فارس انصدم من اللي سمعه صدمة عمره ماتوقعش لهالدرجة اميرة تكرهه وهو اللي حبها من قلبه وكانت حبه الاول..نزل وخش لداره وخدي شنطة لم فيها بعض الحاجات وطلع من الحوش بدون ماينتبهله حد
&&&&&&&&&&&&&&&&&&&
هدت الاجواء شويا ونزلت اميرة تحت لحوش حناها لانهم كلهم كانو قاعدين غاديكا
انتصار: رقدت اختك
خالد: مرقد ان شاء الله ماعاد تنوض
الحاجة امنة: خلاص ياخالد خلاص...رويدة خشي شوفي فارس لو نايض خلي نصبوله يتغدي مع خواله
رويدة : حاضر....وخشت لدار فارس وتفاجأت لما لقت الدولاب مفتوح والحوايج مهناش...وطلعت تجري تعيط: فارس امشي يااحنينة امشي
نطت الحاجة امنة: انتي شن تقولي؟؟
رويدة: لم حوايجه كلهم وامشي..
الحاجة امنه: وووووه عليا اوليدي
خالد: غير وسعي بالك يام تو نتصلو بيه. واتصل بيه خالد وقاله فارس ان معاش يقدر يرجع للحوش وحكاله علي موضوع السفر وانه بيكمل اجراءات رويدة وبيسفرها معاه.. وسكر خالد منه وحكي لامه علي قاله فارس
الحاجة امنه: حي عليا حي ولدي ضاع من ايدي
خالد: علاش تقولي هكي يام...قال بيسافر علي خاطر العملية...احسن فيها خيرة شن ناسية قداش ضغطنا عليه عشان يوافق عليها
الحاجة امنة: واني كيف بندير بلاه مانقدرش والله مانقدر
انتصار: وكيف رويدة بتسافر معاه؟؟؟.
خالد: اكيدة امالا بتخلي راجلها
انتصار: هكي راجلها من غير لاعرس ولاشي
خالد: فاتحتهم وانقرت شن مازال ناقص
انتصار: لكن....
خالد: مافيش لكن....غدوة انتملها اجراءاتها وخلي تتوكل
الحاجة امنة: تملي حتي اني معاهم مانقدرش نخليه يمشي بروحه.
صالح: لكن يام.....
الحاجة امنة: مافيش لكن....عطوني التليفون تو نكلمه بروحي عطوني
وكلماته حناه وبعد دموع وبكاوات...وافق فارس ان حناه تمشي معاهم ع الاقل يصارحها بمرض رويدة ويلقي حد يخمم معاه
&&&&&&&&&&&&&&&&&&
كمل فارس اجراءات رويدة ع السريع وكان بقد ماهو مجروح من عملة اميرة...بس قلبه كان بيتمزق علي رويدة وقصة مرضها.
حسان روح للحوش بعد ماكلي طريحة ثانية من بوه ههههههههههه...واميرة بوها محرمها الطلوع برا الدار
وبعد يومين بالضبط..سافر فارس ومعاه رويدة وحناه لالمانيا بعد مارتب كل شي غاديكا من السكن...والمستشفي والدكتور اللي بيشرف علي حالة رويدة
وصلو للمطار وخدو تاكسي وامشو لشقة كانت في برلين...زغنطوطة فيها دارين وصالة ومطبخ وبلكونة حلوة..وكل دار بحمامها...فارس لما حجز الشقة كان قبل مايعرف ان حناه بتجي معاهم.. وكان حاسب حسبة هو دار ورويدة دار بس تغير المخطط ^_*
الحاجة امنة: اه ياكريعاتي اه نحس فيهم بينقصو...
فارس: خشي ارتاحي لداخل في الدار يااحنينة
الحاجة امنة: اي وحدة فيهم
فارس قعد يحك في شعره ويشوف لرويدة: الصغيرة يااحنينة فيها سرير فردي
رويدة دارت روحها لاهية في الشناطي...ماتبيش تبين لفارس استغرابها من الموضوع... وخشت الحاجة امنة ترتاح
فارس: اسف يادودة ماكنتش حاسب حساب احنينة والله
رويدة: عادي مافيش مشكلة فروسة خيرك فارس: مانبيش نكون واطي معاك اني وعدتك
رويدة: حاشاك...خلي نمشي نفضي الحوايج في الدولاب
فارس: اوكي..لو احتجتي شي ناديني.... خشت رويدة للدار واتصل فارس بالدكتور الالماني عشان يتفق معاه علي موضوع رويدة...وقاله انه يجيبها في اسرع وقت عشان الفحوصات والصور..
كملت رويدة ترتيب الحوايج ومن التعب ارتمت ع السرير ورقدت....خش فارس بيشوف شن صار فيها ولقاها راقدة....ابتسم وطلع غطا من الدولاب وغطاها وقعمز علي طرف السرير يتأمل في وجها" سبحان الله هالبنت قداش نحس براحة غريبة لماتكون جنبي...ونحس بالامان...ياربي ماتحرمني منها...لو دودة تغيب علي حياتي نموت"
