الثامنة
رويدة فتحت عيونها علي وسعهم لما استوعبت الاسم اللي قاله فارس وعيونها تعبو دموع: ايوه بالضبط يافارس أميرة...اميرة هي اللي تحبها مش دودة...دودة مجرد إنسانة غبية حباتك وانت ماتستاهلش حبها...دودة وقفت معاك في الحلوة والمرة بس انت احساسك اتجاهها احساس اخوة بس...دودة اللي لماعرفت انها مريضة سخفت عليها وقلت خلي نتزوجها جبر خواطر...دودة اللي توا تكرهك تكرهك من قلبها يافااااارس
فارس: أسف والله أسف مش قصدي صدقيني غلطة مش عارف كيف صارت
رويدة: ديما اللي في القلب يقوله اللسان يافارس...اصلا متأكدة اللي صار امس بينا هو غلطة و كنت تتخيل فيا اميرة مش رويدة
فارس: لا والله لا يارويدة امس كنت معاك انتي واللي صار بينا كان صادق أني متأكد يادودة والله متأكد
رويدة: فارس كان عندي ولو ذرة معزة في قلبك طلقني وخليني نعيش حياتي بعيد عليك بالك نرتاح من حبك...اني تعذبت معاك بما فيه الكفاية سادني
فارس: انتي شن تقولي؟؟ مانقدرش نعيش بدونك مانقدرش
رويدة: لا حتقدر يافارس..كنت حتتزوج اميرة وتبعد انتي وياها يعني تقدر تستغني علي دودة
فارس:كنت غبي واعمي يادودة بالله عليك.... وشدلها إيدها
رويدة فكت ايدها منه وخشت للتواليت وسكراته عليها وانهدت بكي
فارس يخبط ع الباب بشويا عشان مايسمعوه لبرا: دودة باهي ماتبكيش خلاص اللي تبيه حاضر ماتقطعليش قلبي
رويدة زادت في البكي ومازادتش ولا كلمة.
فارس عرف انها مش حتفتحله لانه عارف انه جرحها.... قعمز ع السرير وهو يحك في راسه: اني واحد غبي والله غبي...
طلع فارس من الدار عشان رويدة تطلع من الحمام لانه طول ماهو قاعد مش رح تطلع..
الحاجة امنة: صباح الخير فروووسة
فارس قعمز ع الكنبة: صباح الخير احنينة...وين خالي ومرت خالي؟؟
الحاجة امنة: خالك نزل تحت قال بيجيب حاجات...ومرت خالك في المطبخ هاوينا تجهز في الفطور...رويدة وين؟؟؟
فارس تنهد: رويدة زعلانة مني يااحنينة
الحاجة امنة: اللطف شن درتلها
فارس: اني حمار والله حمار
الحاجة امنة: حشاك شن هالكلام
فارس: احنينة خشي واسطة بيناتنا بالله عليك...قالتلي تبي تتطلق
الحاجة امنة: اعوذ بالله من الشيطان شن هالكلام...خلاص خلاص تو نكلمها غير ماتبين شي لخالك
فارس: بااااه....وهما قاعدين يتكلمو طلعت رويدة من الدار...فارس وشوش لحناه: هيا جت كلميها احنينة اني بنمشي نساعد مرت خالي
الحاجة امنة أشرتله بأيدها معناها خلاص غير امشي...
رويدة قعمزت وكان باين علي عيونها انها كانت تبكي..
الحاجة امنة: رويدة بنيتي خيرك اللطف
رويدة: شي يااحنينة شكله العلاج وجعلي راسي
الحاجة امنة: سلامتك ابنيتي...كان هاذا خلي فارس يرجعك للعيادة يشوفو شن المشكلة
رويدة: لا لا تو نولي كويسة
الحاجة امنة: باه براحتك....كيف حالك انتي وفارس؟؟
رويدة: كويسين
الحاجة امنة: متأكدة
رويدة تحاول تغير الموضوع: ماما وين؟؟
الحاجة امنة: قاعدة تجهز في الفطور
رويدة: خلي نمشي نساعدها...وناضت رويدة خشت للمطبخ ولقت فارس قاعد يقرض في الطماطم فارتبكت تبي تطلع...
الحاجة امنة من برا: انتصار ياانتصار تعالي نبيك....تبي تفضي الجو لرويدة وفارس..
انتصار: تعالي رويدة كملي قلي الدحي
رويدة: حاضر
طلعت انتصار لعمتها...وقعد فارس ورويدة بروحهم
فارس: دودة نساعدك في شي؟؟
رويدة: لا سلامتك
فارس: دودة قال خالي بيروح غدوة...قتله خلي يروحو هما واحني نلحقوهم شن رايك؟؟
رويدة: بنروح معاهم وكلامي ماتغيرش وقاعدة عند طلبي
فارس ناض من مكانه وقرب منها: دودة والله نحبك ورحمة بوي وامي نحبك علاش اديري فيا هكي
رويدة: كان تحبني ريحني...فارس ضروري نبعد عليك هالايام والله مانقدر صعب صعب
فارس تنهد: اوكي براحتك يادودة...وطلع من المطبخ طايرتله خش للدار خدي الجاكيت متاعه وطلع
انتصار: خيره فارس اللطف طلع من غير فطور
الحاجة أمنة: بالك بيمشي يجيب حاجة من تحت
فات اليوم بطوله وفارس مارجعش للشقة.ورويدة كانت قالقة عليه بس ماتبيش اطيح نفسها وتتصل بيه...
خالد: غريبة فارس لعند توا مازال ماروحش
الحاجة امنة: اتصلي بيه رويدة
رويدة: أه... نتصل بيه ومايردش ممكن مشغول
خالد: بالك يحجزلنا في التذاكر لغدوة... قال انتم بتقعدو
رويدة: لا لا ماصارش بنروح معاكم
الحاجة امنة: اقعدو ياابنيتي غيرو جو
رويدة: معاش نقدر يااحنينة العمل مايخلونيش
هما قاعدين يتكلمو خش عليهم فارس: السلام عليكم
الحاجة امنة: عليكم السلام اوليدي
فارس: اهم التذاكر ياخالي حجزتلكم كلكم...بالنسبة ليا أني مش حنروح معاكم..
الحاجة أمنة: وعلاش؟؟؟
فارس: عندي شوية شغل يااحنينة...هي تصبحو علي خير
رويدة قلبها ياكل فيها علي فارس ومش هاين عليها تروح وتخليه ومش عارفة شن إدير....
انتصار: تي كيف راجلك بيقعد اهني بروحه...شن في بينكم يابنت؟؟
رويدة: شن بيكون في يعني..
الحاجة امنة: بري شوفيه رويدة
رويدة: حاضر..وخشت رويدة للدار لقت فارس مقعمز ع السرير ويدخن
رويدة دروحها ترتب في الزيانة:حقا بتقعد اهني
فارس: انتي مش هكي تبي
رويدة: بس علي اساس بنروحو كلنا مع بعض
فارس: خليني ان شاء الله ننحرق بنار
رويدة: بعيد الشر...وقربت خدت الدخان من فمه: مية مرة قتلك سيبه هاذا
فارس ابتسم: قصدك خايفة عليا
رويدة ارتبكت: امتي موعد الطيارة غدوة
فارس عصب: ماتخافيش...موعدها بدري...تحمليني بس هالساعات وخدي مخدة وشرشف وامتد ع الكنبة ورقد...
&&&&&&&&&&&&&&&&&&&
ثاني يوم الصبح ناض فارس بدري قبل رويدة وكتبلها ورقة وحطها جنبها ع السرير وغير حوايجه وطلع...واتصل بخاله قاله انه مش حيقدر يودعهم لان عنده اجتماع عمل مهم...
ناضت رويدة لانها كانت معدلة النقال واول مافتحت عيونها شافت الورقة تفاجأت وقرتها...
لقت فارس كاتبلها" نحبك يادودة...وطلعت لاني مانقدرش نودعك مانقدرش ونتمني تزيدي تفكري في مستقبل علاقتنا ارجوك "
رويدة دموعها نزلو لانها مازال تحب فارس وتموت فيه وصعب جدا تكرها...بس تبي ترتاح تعبت من حب من طرف واحد...وخايفة تكون مشاعر فارس ليها توا بس علي خاطر موجوع من أميرة وهي بديل ليها عشان تنسيه جروحه...فقررت افضل شي تبعد هالفترة
جهزو شناطيهم وضمو الشقة...وخدو تاكسي وامشو للمطار وطول الطريق رويدة قلبها مطبق ع الاخر...وصلو للمطار ونزلو ورويدة طول الوقت تدور اهني واهني لعل وعسي تشوف فارس...وفارس كان موجود بس يراقب فيها من بعيد ومش قادر يقرب..
ركبو في الطيارة وطارت...وطار قلب فارس معاها...
مع العصر وصلو لليبيا وكان صالح وحسان يستنو فيهم في المطار وامشو للحوش..
رويدة ركبت لحوشهم علي طول وهي مضايقة
اميرة: رودي الحمد لله ع السلامة
رويدة: الله يسلمك
اميرة: رويدة سامحيني
رويدة قعمزت ع السرير ونحت وشاحها: علي شنو بنسامحك؟؟
اميرة: ماكانش قصدي يصير اللي صار...وتورطتي انتي في الموضوع
رويدة: بنسألك وجاوبيني بصراحة..انتي علاش درتي هكي
اميرة نزلت راسها: مانعرفش..يمكن طمعت في الفلوس وحسان زادني.. بس ماكنتش نتخيل الحكاية بتوصل لهكي
رويدة: فارس شن ناقصه علشان وجه متشوه يعني
اميرة: ممكن...ويمكن علي خاطر عمري مافكرت فيه كحبيب
رويدة: امالا منو اللي مرة سألتيني عليه وعلي مشاعرك تجاهه شن معناها؟؟
اميرة: كنت نتكلم علي حسان الصراحة
رويدة: حسان؟؟؟ تو بالله عليك حسان بيجي حتي في ربع فارس
اميرةعصبت : معاش تقولو هكي هاذا اللي كره حسان في فارس كلامهم هاذا عليه... اووووف ...وطلعت اميرة حامقة
رويدة امتدت ع السرير وتشوف للسقف تفكر في فارس...فجأة ضرب نقالها مكالمة فايبر وكان رقم فارس... فرحت قريب طارت بس تمالكت روحها وردت: ايوه فارس
فارس: دودة....وكان صوته واضح عليه انه تعبان ومضايق
رويدة: فارس خيرك؟؟؟
فارس: فاقدك يادودة
رويدة سكتت....فارس: وصلتو للحوش
رويدة: اييه
فارس: الحمد لله ع السلامة
رويدة: الله يسلمك....
فارس: رويدة.وسكت.......
رويدة: نعم
فارس: لا شي ديري بالك علي روحك...هي سلام توا
رويدة بحزن: اوكي سلام
&&&&&&&&&&&&&&&&&
مر أكثر من أسبوعين علي رجعة رويدة من المانيا وفارس معاش اتصل بيها بكل ..وكل ماتتصل بيه رقمه مقفل وعلي ماحاولت معاش قدرت تحصله بكل..وطبعا هالموضوع زاد ضايقها لان هاذي اطول فترة تغيب فيها علي فارس وماتكلماش
وفي يوم هي في العمل الصبح..وكالعادة متنكدة ومادة بوزها .
اريج: باه مادامك تحبيه للدرجة هاذي علاش تقوليله ننفصلو
رويدة: ماتزدنيش ياروجي علي مابيا...حتي لو قتله ممكن قلتها في ساعة حمق وهو شوره ماصدق سكر تليفونه وانقطعت اخباره معقولة
اريج: فارس حساس. انتي عارفتيه اكيدة فكر انك حتي انتي زي أميرة ماتبيشي علي خاطر التشوه اللي في وجه
رويدة: بس هو عارفني اني مش هكي عارفني
اريج: انتي تسرعتي يارودي مفروض حليتو الموضوع بطريقة غير هكي
رويدة تنهدت: مانعرفش بس حاسة حاجة كبيرة في حياتي ناقصة بجد
وهما يهدرزو خبط الباب وكان عامل القهوة البنقلاديشي موصينيه علي فطور من برا
اريج: مشكور ياخان
البنقلاديشي: عفوا مدام مافيش مشكل
اريج حطت الهامبورغا علي طاولة رويدة: هاك افطري وغيري جو
رويدة: افيييي خيره ريحتها هكي هاذي شكلها امطولة
اريج قرنت حواجبها: خيرها مافيها شي..ترا نشوف...انتي تتدلعي مافيها شي
رويدة قربتها لخشمها: تو بالله عليك هاذي...وقبل ماتكمل كلامها مشت تجري للحمام ترجع
اريج: بسم الله خيرها هاذي ؟؟؟
طلعت رويدة من الحمام ورجعت للمكتب وهي حاسة بروحها بتطلع
اريج: بسم الله شن جاك رودي
رويدة: مانعرفش شكلي بناخد إذن وبنروح
اريج: عطيني مفاتيح سياركي خلي نرفعك لاقرب عيادة نشوفو شن المشكلة
رويدة: ياودي مايستحقش
اريج: ماتقوليش هكي...انتي مفروض بعد الرعايش اللي صارو فينا من مرضك المرة الاولي ابسط تعب طول تمشي للعيادة...هيا نوضي
رويدة: باهي...خلي نستأذنو من حد بس
اريج: اوكي...وخدت اريج المفاتيح ونزلت ومعاها رويدة وبعد تحاليل وفحوصات نادتهم الدكتورة
خشت رويدة ومعاها اريج.. الدكتورة: تفضلو
قعمزو رويدة واريج... الدكتورة: كم ليك متزوجة مدام رويدة
رويدة استغربت من السؤال : ماسكرتش شهر... يمكن توا 3 اسابيع
الدكتورة ابتسمت: ماشاء الله ...بالسرعة هاذي...مبروك انتي حامل
رويدة: نعم 0_0
اريج ضحكت: بجد يادكتورة
الدكتورة: اي ليها ممكن اسبوع توا... الف مبروك وهاذا رقمي عشان أتابعي معايا لو تحبي
رويدة كانت مبلمة وخلاص...وماردتش ولا كلمة
اريج: اعذريها يادكتورة اكيدة فرحانة ههههههه...خلاص ان شاء الله خير
طلعو اريج ورويدة وركبو في السيارة ورويدة ولا كلمة...اريج: تي مبروك يادعوة بتولي ماما
رويدة شافتلها بصدمة وبعدين عيونها تعبو دموع وانهدت ابكي...
اريج: بسم الله خيرك
رويدة: ارفعيني للحوش روجي وتقولي لحد نقتلك
اريج: وعلاش بسم الله...
رويدة: ديري اللي قتلك عليه واسكتي
وصلت رويدة للحوش واستغربت من وجود سيارة غريبة قدام حوشهم...فنزلت هي واريج واول ماخشت من باب الحوش تسمع في ضحك...ولما مشت للصالة في حوش حناها انصدمت من اللي شافاته واقف قدامها...
رويدة: فاااااااارس
وقف فارس وكان عيونه كلهم شوق ولهفة علي رويدة...وكان خاطره يحضنها بس متحشم...
رويدة استغربت من شكل فارس كانت عينه اللي خسرها في الحادث رجعت زي ماهيا والندبة اللي في خده ياذوبك باينه
الحاجة امنة: رويدة اللطف تعالي سلمي علي راجلك
رويدة: الحمد لله ع سلامتك
فارس: الله يسلمك... بس اني جاي نوعدك لاني قررت بنستقر في كندا ..اني عذبتك معايا هلبا يارويدة ولازم ترتاحي مني..وتعيشي حياتك...بالرغم من ان حبك ومعزتك في قلبي مستحيل تتحول...
اريج: انت شن تقول...راه رويدة.......وقاطعتها رويدة بعصبية: اريج خلاص ساد... والتفتت لفارس وعيونها دموع: مع السلامة يافارس مع السلامة
