قسما بالله عقدني النت من نبدري نحاول ومافيش فايدة...حتي الصور ماقدرتش ناخدهم من القوقل... سامحوني للتأخير والله اعلم امتي تنزلكم...
السادسة
بعد ماارتاحو من السفر ورقدو....ناضت
رويدة مع المغرب ولقت فارس راقد ع الكنبة في جنبها: حي ياناري تو يوجعه ظهره...وقربت منه بشويا: فرووسة فروووسة نوض كمل نومك ع السرير
فتح فارس عيونه: دودة...الساعة كم توا؟؟
رويدة: مانعرفش بس الدنيا ظلمت
فارس: خلي انوض نشوف احنينة وانتي جهزيلنا حاجة من تحت ايدياتك الحلوة
رويدة: اي اي زيد لسن زيد
فارس: ههههههههه حرام عليك جيعان
رويدة: باه برا شوف احنينة وتو نجهز حاجة ناكلوها
فارس: ربي يحفظك يادودة...قالها فارس وقلبها بيتقطع عليها مش مستوعب ان رويدة ممكن تغيب علي حياته
امشت رويدة للمطبخ.. وفارس امشي لحناه بيكلمها خبط الباب وخش..لقاها تصلي
فارس: تقبل الله يااحنينة...بس كيف عرفتي الوقت
الحاجة امنة: توا سمعت جامع يأذن
فارس: اها اي اغلب سكان الحي هاذا عرب
الحاجة امنة: باهي يااوليدي احسن شي فكيتنا من اليهود
فارس: ههههههههههه جو عليك انتي يااحنينة
الحاجة امنة: خليني توا مني أني ....انت امتي قررت بدير عمليتك
فارس وقف سكر باب الدار وقرب من حناه: شوفي يااحنينة بنقولك سر ونبيه يقعد بيني وبينك
الحاجة امنة: قول شنو حسك رعشتني؟؟؟
فارس سكت شويا: دودة يااحنينة دودة
الحاجة امنة: خيرها ؟؟
فارس تنهد: عندها ورم في راسها
الحاجة امنة بصوت عالي : شنوووووو
فارس ارتبك: نقصي صوتك يااحنينة هي ماتعرفش
الحاجة امنة: ياحليلي علي ابنيتي...ووووه عليا اصغيرة... ياربي ماذوقني نار الفراق مرة ثانية يارب
فارس تأثر بكلام حناه: دودة حتعيش يااحنينة مستحيل مستحيل نخليها تضيع منا
الحاجة امنة: انت من قالك وخالد يعرف او لا.... قول يافارس تكلم
فارس: اني بس نعلم بالموضوع وتوا انتي
الحاجة امنة: تي كيف ماتقول لاهلها كيف؟؟
فارس: كان بنقوللهم مستحيل بيدسو عليها.. وبيقعدو يسخفو عليها ومش عارفة شنو ورويدة ماتحبش هكي عارفها حتموت بالعرق من نظرتهم ليها
الحاجة امنة: بس مهما كان هاذم امها وبوها يافارس
فارس يحك في شعره: مانعرفش كيف اتصرفت هكي المهم كنت نبي نسافر اني وياها باسرع وقت لان الوقت مش في صالحنا
الحاجة امنة: ياكبدي ياابنيتي ياكبدي...منين بتلقيها والا منين من قلبك المجروح والا هالمرض اللي طلع فجأة
فارس: خيره قلبها كيف مجروح؟؟؟ هي حكتلك حاجة احنينة... هي تحب حد؟؟؟
الحاجة امنة: ياحليلي ياحليلي نندب.. ماحكتلي شي خلاص غير الموضوع
فارس: تي احكيلي يااحنينة بالك نساعدها
الحاجة امنة: هاذا ياحنة تحب واحد بس هو شن بنقولك غبي والا مايهون عليا...لكن كاسرلي رقبتي ومش حاس بيها
فارس: هاذا غبي وحمار معاها معقولة مش عارف قيمة اللي عنده
الحاجة امنة خبطت علي رجليها: ياحليلي ياحليلي ياناس.... توا خليني من هاذا كله شن بيصير توا وبترفعها لدكتور والا كيف قولي حسه ركبت فيا النار
فارس: اي اتفقت مع دكتور اهني وهو بتابع حالتها
الحاجة امنة: فروسة يااوليدي مادسش عليا في أمل صح؟؟؟
فارس نزل راسه: ضروري يكون في أمل ضروري...المهم يااحنينة بالله عليك ماتحسسيها بحاجة
الحاجة امنة: فروسة بغلاوتي عندك يااوليدي ماتسيبها راهو رويدة...........وقطعت عليهم رويدة الكلام وفتحت الباب: شنو تقولو عليا
الحاجة امنة: اللطف ياابنيتي شن بنقولو عليك
رويدة ضحكت : انبصر يااحنينة نبصر...هيا نوضو العشي واتي
فارس: هيا احنينة...هيا انتي الثانية يادودة وكرها من شعرها
رويدة: احيييي فارس ارخي بلا برادة... فاااارس
بعد العشي.طلع فارس قعمز في البالكونة وحناه ورويدة يتفرجو ع التلفزيون... وكانت رويدة راقدة علي رجل حناها اللي تمسحلها علي شعرها ودمعتها في عينها من اللي سمعاته من فارس علي مرضها
رويدة: خيره فارس يااحنينة...نحس فيه متغشش زعما قاعد متأثر من موضوع أميرة
الحاجة امنة تنهدت: اي اي اكيدة..بري شوفيه وهدرزي عليه بالك تخففي عليه
رويدة ناضت قعمزت: زعما؟؟؟
الحاجة امنة ابتسمت: اي فارس مايرتاح الا لما يفضفضلك
رويدة: اوكي.......ونطت فرحانة امشت لفارس: فروووسة في شنو سارح؟؟؟
فارس ابتسم: في هالدنيا يادودة
رويدة: رتبت لامور عمليتك فروووسة؟؟
فارس: اه..اي اي مازال شوي.....حقا شن رايك مادام احني اهني اديري فحوصات علي خاطر هالصداع اللي ديما يجيك
رويدة: فكني منه توا المهم انت
فارس: بلا تسكير راس...بكرة بنمشي علي خاطر فحوصات عمليتي حتمشي معاي واديري اللي نقولك عليه
رويدة: فروووسة......
فارس: معاش تزيدي ولاحرف خلاص قلنا بكرة يعني بكرة
رويدة: اوووووف عناد انت...خلاص بكرة يصير خير
فارس قعد يشوف للشارع والسيارات اللي تمر وسرح...
رويدة: خلاص يافروووسة انسي ربي حيعوضك بغيرها متأكدة
فارس: نحس في قلبي مستحيل مازال ينفتح للحب مرة ثانية...خلاص سكرت عليه للأبد وماعاش نبي نحب لا بنات لا كلام زايد
رويدة ناضت بعصبية ودمعتها في عينها: اوكي تصبح علي خير....
فارس: تي خيرها هاذي...دودة يادودة
خشت رويدة للدار وارتمت ع السرير وحطت راسها تحت المخدة وانهدت ابكي" هاذا امتي بيحس بيا ياربي"
&&&&&&&&&&&&&&&&&
شويا ولحقها فارس...فتح الباب: دودة خيرك مريضة والا شنو؟؟؟؟قصدك امصدعة؟؟
رويدة: لا مافيا شي خليني بنرقد...فارس لو سمحت
فارس: اوووكي وخدي غطا ووسادة وطلع للصالون لبرا
في الصبح ناض فارس زي المخلوع لانه تأخر علي موعد الدكتور رمي الغطا من عليه وامشي للدار يجري فتح الباب وكانت رويدة كيف تلبس في قميصها وتحشمت: فااااارس
فارس التفت وارتبك: اسف يادودة اسف هيا بسرعة وقت ع موعدنا مع الدكتور
رويدة: باهي اطلع نكمل باقي حوايجي
فارس: اووكي خلي نمشي نشوف احنينة....فارس كان متحشم ع الاخر ووجه متحمرط
علي طلعة حناه من الدار: صباح الخير فروووسة
فارس: صباحو احنينة
الحاجة امنة: خيرك متحمرط
فارس:اه... لا لا شي...
الحاجة امنة: اااه ياقلبي والله طول الليل مارقدت قلبي واجعني....بس ضروري نتصلو بخالد ونكلموه
فارس: أجليها توا... خلي نشوف الدكتور شن يقول قبل
الحاجة امنة: ربي يستر وخلاص
رويدة: هيا اني واتية....امشي غير حوايجك علي ماوتيت الفطور
فارس قاعد مرتبك: بااااه....وطار يجري للدار فطرو فارس ورويدة وطلعو عشان يمشو للعيادة....والحاجة امنة قعمزت تراجي فيهم علي نار
ركبو في تاكسي ووصلو للعيادة وعلي طول الدكتور طلب الفحوصات من رويدة وطلب يدخلوها للصورة.... ورويدة كانت مستغربة ان فارس ناسي موضوعه ولاهي بيها
كملت رويدة الفحوصات..وفارس ناداه الدكتور
الحوار كان بالانجليزي... هههههههههه
فارس: هاطمني يادكتور
الدكتور: بالنسبة للورم واضح في الصورة في كتله في راسها وتقدر تشوفها...ومدله الصورة
فارس: لاحول ولاقوة الا بالله.... معقولة
الدكتور: مازال التحليلات... وبعدين حنفتحولها وناخدو عينة من الورم
فارس: لا لا عمليات لا....مانبيشهاش تتبهدل... وسكت ورفع راسه بحزن: كم مازالها يادكتور
الدكتور: الاعمار بيد الله يااستاذ فارس
فارس وقف: اوكي مشكور يادكتور...امتي تطلع نتيجة الفحوصات
الدكتور: بعد يومين ان شاء الله
فارس: يادكتور بالله عليك قولي قداش نسبة شفائها
الدكتور نزل راسه: ان شاء الله خير
فارس يحاول يشد دموعه: مشكور يادكتور... طلع فارس وحاول مايبينش حزنه لرويدة
رويدة لما شافاته وقفت: اخيرا جيت... اووووف مليت بروحي هاشن قال الدكتور
فارس: لا غير كنت نتناقش معاه علي عمليتي
رويدة: باه شن قالك؟؟؟
فارس: تعالي نطلعو نتمشو ونهدرزو
رويدة: ماشي....وطلعو من العيادة وقعدو يتمشو في برلين وفي الطرق...وفارس كان طول الوقت ساكت...ورويدة فرحانة ومبتسمة....
رويدة: هييييي وين امشيت؟؟
فارس يتصنع الابتسامة: معاك يادودة
رويدة: باه علاش ساكت تكلم
فارس: ماخاطريش،
رويدة: فارس الدكتور قالك شي خطير علي عمليتك ماتخوفنيش،
فارس: مش ملاحظة انك تسألي عليا اني بس وفحوصاتك ولادورتيها
ريدة: المهم انت عندي
فارس بأبتسامة: نهمك للدرجة هاذي
رويدة حاولت تغير الموضوع: حيييييه غزل البنات نبي منه
فارس: باه اقعدي اهني وتو نجيبلك.... وامشي فارس اشري وحدة ولما التفت مالقاش رويدة في مكانها خاف: رويدة رويدة وقعد يدور فيها...رويدة رويدة وينك وين امشيتي... قعد يسأل في الناس ويعطي في ملامحها ويسأل فيهم لو شافوها
الدنيا ظلمت في عيون فارس وخاف تكون رويدة ضاعت او خطفوفها وعيط بصوت عالي: روووويدة
رويدة: هههههههه خوفتك صح
فارس التفت ومن غير وعي حضنها: دودة دودة انتي بخير...خوفتيني بالله عليك خليك معايا بالله عليك
رويدة جمدت من موقف فارس ومستغربة من كلامه...بس عجبها،حضنه الدافي وحست بخوفه عليها
فارس بعد عليها وعيونه امدمعة: علاش درتي فيا هكي حرام عليك
رويدة تفاجأت: اني أسفة مش قصدي
فارس.بعصبية : روحي كانت حتطلع مني يادودة وحضرتك تبصري
رويدة تشوفله وخلاص ماردتش ولا كلمة "معقولة هاذا كله مش حب. خوفه عليا واهتمامه بيا.. معقولة بس لانه يعتبرني زي اخته"
فارس حس روحه انفعل عليها: خلاص حصل خير يادودة بس معاش تعاوديها..
رويدة: حااااااضر
فارس انتبه لكيس غزل البنات في ايده اللي عجنه بدون مايحس: هاك اللي تبيه
رويدة: ههههههههههه صحيت
&&&&&&&&&&&&&&&&
روحو للشقة وفارس حكي لحناه علي صار وبكت وخبطت قريب طارت علي رويدة وهاذاكا اليوم ماطلعتش من دارها بكل حزينة علي حفيدتها...
رويدة: خيرها احنينة متغششة اليوم
فارس: يمكن استاحشت خوالي
رويدة: معاك انت ماادور في حد اصلا ههههههههههه
فارس: خلي نمشي نشوفها انتي خشي ارتاحي من المشي طول النهار اكيدة رجليك وجعوك،
رويدة: اي صح.. نوضني بعد ساعة ماتخلنيش نرقد خلي نجهز العشي
فارس: ارتاحي تو نطلب جاهز
رويدة: يسلمو ياغالي... خلاص نمشي نرتاح ولما يوصل الجاهز نوضني هههههههه
فارس خش لحناه ولقاها متنكدة: هاذي ارادة ربي يااحنينة...بس ماتخافيش والله ماحنسيبها حتي لو اضطريت نلف بيها العالم
الحاجة امنة: واجعتني هالبنت حياتها اقصيرة ومالحقت تشوف شي زبها زي كل هالبنيات وتكون عيلة
فارس: غير تصح بس يااحنينة واللي تبيه حنديرولها.... ونزوجها من اللي تحبه نمشيله لعنده ونخليه يتزوجها بالسيف
الحاجة امنة: ووووه عليا افهم ياولد افهم رويدة تحبك انت
فارس انصدم: نعم
الحاجة امنة: اي يااعمي رويدة تحبك وميتة فيك معاها شن مش ملاحظ اهتمامها بيك وتصرفاتها معاك...مش ملاحظ قداش تنكدت وتغيرت لما خطبت اميرة...مش ملاحظ انها وافقت عليك كزوج وهي عارفة انك تحب اختها....هاذا كله علاش يعني عشان تحبك ياهمي...ماعاد خليتو فيها حشم ياكبدي ااااه وخلاص
فارس: بس.....
الحاجة امنة: لا بس لا خس اسكت ساد
فارس: معقولة
الحاجة امنة: فروووسة البنية ربك يعلم مازال باقيلها فرحها يااوليدي بالله عليك
فارس حاسس بدماغه وقف ومش قادر يفكر...معقولة هو غبي للدرجة هاذي...وناض ووقف في البالكونة ويفكر وقعد يسترجع في مواقف رويدة كلهم معاه خوفها عليه دفاعها عنه...سبب تغيرها المفاجئ عليه لما خطب اميرة...توا فهم كل شي
ضرب جرس الباب وكان العشي...فتح فارس وحطه ع الطاولة وكلم حناه...وخش بينوض رويدة...قعد واقف يتأمل فيها وهي راقدة وكلام حناه يدور في راسه وحس بروحه قداش حقير لانه معذبها معاه
قرب منها: دودة نوضي العشي جي
فتحت رويدة عيونها وقعمزت..وكان شعرها كل شعرة في تركينة
فارس: ههههههههه غووولة...نوضي تعشي
رويدة ضرباته بالمخدة: بلا برادة
فارس خدي المخدي وقعد يضرب فيها وهي هربت منه: ههههههه حول يابارد حول
فارس: عشان نوريك...وقاعد يخبط فيها
رويدة اختل توازنها وفي لحظة حست الدنيا اادور بيها وطاحت
فارس ارمي المخدة وجاها يجري ويبعد في شعرها المتناثر علي وجها: رويدة رويدة ردي عليا
وطبها وطلع بيها يجري للصالون حطها ع الكنبة: يااحنينة خليك في جنبها نوقف تاكسي ونجيك
الحاجة امنة: ووووووه عليا خيرها البنت خيرها
نزل فارس يجري زي المهبول ووقف تاكسي ورجع قام رويدة ونزل: يااحنينة انتي خليك اهني وتو نجي
الحاجة امنة: ماتنسانيش طمني عليها يافروسة بالله عليك
فارس: حاضر....وصلو للمستشفي وودخلوها للطوارئ وفارس لبرا يستني علي نار
طلع الدكتور ومشاله فارس يجري: هاطمني يادكتور
الدكتور: أني من رأي تتصل بأمها وبوها خير.
فارس: علاش يادكتور علاش
الدكتور: الورم ضروري،من استئصاله وعمليتها صعبة شوي...فضروري يكونو اهلها متواجدين
فارس معاش قدر يوقف علي رجليه وطاح ع الكرسي زي الجثة وحط ايديه علي راسه: لا لا مستحيل مستحيل
