هنصعد سلم الالتزام معا🥺💜🌸

نهايه البدايه2

#قصة_نهاية_البداية_بالعامية_إيمان_شلبي
#الدار_الآخرة
#المرحلة_الأولى_الموت
#الحلقة_الثانية
#صعود_روح_المؤمن_وروح_الكافر_للسماء

تخيل إنك هتيجي عليك لحظة إما إنك هتحب لقاء الله؛ فربنا هيحب لقائك، أو هتكره لقائه والعياذ بالله؛ فسيكره الله لقائك هو كمان👌

لما ملائكة الرحمة تيجي عشان تقبض روحك ويبشروك بالجنة هتفرح وهتحب لقاء الله،
قال رسول الله ﷺ:
"الْمُؤْمِن إِذَا حَضَرَهُ الْمَوْتُ بُشِّرَ بِرِضْوَانِ اللَّهِ وَكَرَامَتِهِ فَلَيْسَ شَيْءٌ أَحَبَّ إِلَيْهِ مِمَّا أَمَامَهُ فَأَحَبَّ لِقَاءَ اللَّهِ وَأَحَبَّ اللَّهُ لِقَاءهُ...."
《صحيح البخاري》
فالملائكة هتاخد روحك وتنطلق إلى السماء وتتفتح لها أبواب السماء السبع، وكل ما روحك توصل لسماء هيشيّع روحك المقربون إلى الله في السماء دي للسماء إللي بعدها،
وكل ما روحك تعدي على مجموعة من الملائكة؛ يقولوا إيه الروح الطيبة دي؟
فتقول الملائكة إللي معاها روحك: دي روح فلان بن فلان، ويسموك بأحسن اسم كنت بتتسمى بيه في الدنيا.

☆انت لو ماشي في الدنيا وحاطط عطر ريحته جميلة جدا وطول ما انت ماشي الناس عمالة تكلمك وتقولك الله ريحتك حلوة أوي؛ إحساسك هيبقى عامل إزاي؟
أهه وانت طالع السماء؛ الملائكة بتمدح في ريحة روحك الطيبة دي👌
قال رسول الله ﷺ:
"فيَصْعَدُونَ بِها فلا يمُرُّونَ بها على مَلَكٍ من الملائِكَةِ، إلَّا قالُوا: ما هذا الرُّوحُ الطَّيِّبُ؟
فيقولُونَ : فُلَانُ بنُ فُلَانٍ بأَحْسَنِ أسمائِه التي كانُوا يُسَمُّونَه بها في الدُّنْيَا....."
《صحيح الجامع》
ويقول أهل السماء:
روح طيبة جاءت من ناحية الأرض، صلى الله عليكِ وعلى جسد كنت تَعمُرينه،
《صحيح مسلم》
تخيل إن أهل السماء بيدعو لروحك بالرحمة👌
وتفضل روحك تصعد من سماء لسماء لحد ما تصل إلى السماء السابعة وتصل عند العرش، وهنا يقول الله عز وجل:
"اكْتُبُوا كِتابَ عبدِي في علِّيِّينَ ، وأَعِيدُوا عَبدِي إلى الأرضِ، فإِنِّي مِنها خَلَقتُهم ، وفِيها أُعِيدُهُم ، ومِنها أُخْرِجُهم تارةً أُخْرَى"
《صحيح الجامع》

علِّيِّينَ!
"وَمَا أَدْرَاكَ مَا عِلِّيُّونَ ۩ كِتَابٌ مَّرْقُومٌ ۩ يَشْهَدُهُ الْمُقَرَّبُونَ"
《سورة المطففين: (19⬅️21)》

يعني ربنا بيقول للملائكة إنها تسجل صحيفتك في الدرجات العالية من الجنة، ويبقى اسمك من ضمن الأبرار،
ومهما اتوصف لك المنازل العالية من الجنة دي؛ عقلك مش هيُدرك ولا هيستوعب ولا هيتصور قمة الجمال والنعيم إللي هيكون فيه هؤلاء الأبرار،
ويكفيك فخرا واعتزاز إن الملائكة المقربون إلى الله عز وجل يشهدوا على أعمالك الصالحة الموجودة في صحيفتك👌

وركزوا كده معايا في النقطة دي:
ربنا لما أخبر الملائكة إنه هيجعل في الأرض خليفة؛ قالوا إن البشر دول هياكلوا حقوق بعض ويقتلوا بعض،
فهنا بقى لما الأبرار دول حافظوا على حقوق الناس وكانوا بيتعاملوا بفضل وبيعطوا للناس حقوقهم؛ ربنا هيباهي بهم الملائكة ويقول لهم
انظروا إلى هؤلاء الذين قلتم عنهم كذا وكذا،
فتخيل نفسك وربنا بيباهي بيك الملائكة وبإنك صبرت على الطاعة ولم تضيّع حقوق الناس👌
بعد ما تستقبل البشارة بالدرجات العالية من الجنة ربنا يأمر الملائكة إنها ترجّع روحك لجسدك عشان لسه عندك اختبار وبعد ما تنجح في الاختبار؛ روحك هتستنى في المَكانِ إللي اتجهز لها تنتظر فيه
حتى قيام الساعة،
وقبل ما نعرف إيه هو الاختبار وإزاي هتنجح فيه؛ خلينا نشوف حالتك كانت هتكون إيه لو كنت من عباد الله الكفار أو الفجار أو من إللي غلبت سيئاته حسناته وكانت أكثر منها والعياذ بالله 😞