العروبي و عروس الريح

الجزء 15

🌾العروبي و عروسة الريح 🌾
💄الخنساء 💄

رشيدة عندها عادي مولفة بلعراسات..
و لعيالات لي كاينا لي تجيب معاها بوواطات دلبلاستيك گاااع..
و تعمرهم بلماكلة و تعاود ترجعهم لساكها..

رشيدة كادفع لحليمة:هزي هزي ليك من هنا لاهيلا رطييطب..

حليمة شدات من عندها:سيري الله يرضي عليك نديو عا لحباباتنا ندوقوهم.. ما عرفنا تكون شي وحدة موحمة و تشم فينا الريحة..

رشيدة :عندك الصح.. عا هزي ما كاين لي غايرجع لهادشي..

الزاهية هازا نيفها :لا تباااركالله على وليدي.. خلا لخيورات عا مدفگاا..

رشيدة عوجات شنافتها و قالت بزز :همم.. تباركاالله تباركالله

خواو الطبسيل عاد خلاوهم يهزوه..
ما دازتش خمسة الدقايق تا كانو حطو ليهم طبسيل جديد..

الزاهية و حليمة رجعو لور ما عندهش مع هاد التخربيق..
جاب الله عمرو كروشهم قبل أما كانو يتقولبو فهادي..

لالة خديجة و نجمة غي كايتفرجو فديك لبصطيلة لي محطوطة قدامهم..
طلعات ليهم الزعاف
....
في حين الناس لخرين طاحو فيها عميين..
كانت ديال لحوت عامرة مزيااان..
و ما كاينش حس الشعرية الصينية.. غي لحوتة على ختها..

باااينا بوبكر حط فلووس هي على هاد لعشيوة..

لي نفسها تحطات حتى لهادوك لي خلى فلفيلا..
غي حشم أما كان يخليهم كاينقزو تما.. بلحق ما جاتش تاني هوما جايين مكبرين بيه بطريقة الزاهية عهه...
و هو يتكرفس عليهم..

رشيدة:وا هزي عا هاد لمعيلقة.. عا دوقي

الزاهية حاطا يديها على فمها :لواه لواه.. حرام عليا نحط هاد لورقة بين سناني..
عا كولو بصحتكم..

رشيدة دارت لي عليها و دارت عليهم كاطلب زعما باش ياكلو و ملي ما بغاوش حنات راسها على طبسيلها لهلا يقلب فشي حد..

سامية لقاتها فرصة؛ الزاهية ما كانتش تخليها دير لبسطيلة گاتلك ما ماكلك ما والو..
و دابا عاد لقات الفرصة تكتاشف مكوناتها على خاطرها..

كاتحط اللقمة ففمها و تبقا شحال عاد تسرطها..
بقد ما هي مزيج بين لبنة لمالحة و الحارة بقد ما كاتقدريش تميزي إينا وحدة غالبة كثر..
منساجمين مع بعضهم و عاطين مذاق هااائل..

كلها و كيف دارت للماكلة كاينا لي كاتهز بلفرشيطة و كاينا لي مدايرا عا يديها..

هوما كاياكلو و نجمة متكية هي و خديجة دايرين الراس حدا الراس كايتذاكرو على الموضوع لي مالحقوش يكملوه قبيلة..

خديجة:إييه.. لا صافي تانا عا يساليو هادشي نگول لحسنا تديني نجيب داكشي لي قلتي ليا را لبرودة هلكات ليا عظامي..