العروبي و عروس الريح

الجزء 33

🌾العروبي و عروسة الريح 🌾
💄الخنساء 💄

وجدان دخلات  نيشان لبيتها سرحات رجليها مابقات تلفتات فحتى واحد..
شادا تيليفونها كاتفرج فيه.. حتى داها النعاس و حطات راسها على مخدتها ترتاح..
بعدما خلات تيليفونها يتشارجا حداها..

محمد ساد عليه فبيتو كاينقز فوق الناموسية شاد بين يديه لعب و قصص عاد خداوهم ليه..
ملي كانو راجعين..

سامية شادا بيت عطاتو ليها وجدان.. حاطا تيليفونها حداها كاتسنا الاتصال لي ماتعطلش بزاف باش وصلها..

داز النهار عندهم عادي حتى من بوبكر تعطل..
و تاصل ب مصطفى باش يرجعو للدار فطاكسي.. حيث مايقدرش يجي لعندهم..

حسنا كيف خرجو من عندها تنفسات براحة..
وذنيها كايزدحو عليها بقوة لهضرة و الصداع..

ناضت كاتجمع فالروينة.. و كاترتب فبلاصة عبد الرحيم.. لي مشا مع الطبيب على قبل شي تحاليل.. من نهار دخل للسبيطار و هوما كايجبدو ليه فدمو.. بقا ليهم شوية وي صفيوها لگاع دوك لقطيرات لي جامع..

سالات حسنا الجميع ديالها و جلسات ترتاح..
حتى حلات عينيها و ناضت كاتجري تقلب على تيليفونها..

حسنا:ألو.. بلارج..
هااا ويلي تي خامرة؟
تگعدي وجدي للناس مايحنجرو.. يله و نسمعك درتي بحال لبارح نتفاهمو..
لعشا يطيب فالدار سمعتي..
واگولي لي واخا واخا.. راني ما كانعرفكش..
عا لقيتي الراحل درويش و بغيتي طيري..
مزيان تباركالله.. يله تگعدي..
آه و لي درتيها صوري ليا نشوفها..
و بلا داك الزواق ديالك را مايعرفوش ليه.. يله
بسلامة

وجدان حلات عينيها كاتشوف الجو بدا كايظلم من الشرجم.. :گاتلك الزواق.. على أنا باقا نعاود..
أووف.. منين تسلطو عليا هادو تاني..

بقات كاتخمم فشنو غادير تا طاحت فبالها سامية..

تبسمات براحة:نرجع واحد خمسة دقايق عاد نوض.. مال سامية ماطيبش على راسها ريشة النعام..

حاولات ترجع لنعاسها و والو.. بقات غي كاضور فعينيها..

سمعات الدقان..
و هي تجمع لوقفة.. بفضول..

حلات لباب دبيتها و قربات للدروج كاتسمع..

لتحت..

الزاهية جايا دايخا :هاو .. حايد حايدي من گدامي..

دخلات نيشان للطواليط كاترجع لي فمعدتها.. الطاكسي دوخهم مزياان..
فين ما كاين شي درب دوزهم منو..

عاد عرفهم ماشي ولاد لبلاد.. تقام عليهم بغسيل لفندق.. و حتى مصطفى ماتحاسبش معاه داكشي لي قاليه عطاه ليه..

عندو الزهر الزاهية كانت دايخا أما تشوهو تما..

سامية لمصطفى :مالها؟