#ليُحيا_بك_قلبي26
بقلم: ميامن أحمد
من قال لي أنو هو نفسو الولد الانا لاقيتو قبل سنتين أتخلعت جداً لدرجة أني قمتا على حيلي وقلت ليهو بعدم أستعياب كيف يعني أنت نفس الزول! قال لي ركزي في ملامحي دي كويس وبعدها حتعرفيني وتعرفي أنك قابلتيني قبل كدة، عاينت ليهو وفعلا أتذكرت أني لاقيتو اليوم داك، دموعي نزلو وبقيت ببكي قال لي لييه البكى بس! أنا ما قصدي أبكيك .. ما كنت قادرة أرد عليهو قال لي ميامن ممكن تفهميني وتوريني الحصل معاك بالتفصيل وتوريني قصتك! يعني أنا لمن شفتك قبل سنتين ما كنتي منقبة وما كدة بس هسي متغيرة شددديد وريني الحكاية وخليني أرتاح، أنا نفسي أعرف إنتي مالك والحصل معاك قبل سنتين شنو!، أتنهدت تنهيدة طويلة وبعدها قلت ليهو كل القصة أنو هو كان ولد عمتي وحبييبي في نفس الوقت...
________
قبل سنتين:-
كنا عايشين في البيت الكبير مع عماتي الاتنين، أما عمتي التالتة فدي من عرست رحلت مع راجلها، أبوي ما كان حابب يبعد من أخواتو لانو جدو الله يرحمو وصاهو عليهم فعشان كدة عشنا طول فترة حياتنا معاهم، قصتي أبتدت من وأنا في أولى جامعة، هو كان ولد عمتي فاطمة، كنت دايما معاهو أربعة وعشرين ساعة نحنا مع بعض الصباح هو بوصلني الجامعة وقبل ما أدخل بيقول لي وصايا كتتيرة وبختمها بي " خلي بالك من نفسك "، ولمن أجي راجعة هو أول واحد بسال عنو، كنت بعتبرو أكتر زول مقرب لي من ناس البيت، صاح هو مستهتر وعاطل وما لاقي شغل لكن أنا ما بحب زول يتناقش معاهو ويزعلو وبالتحديد بابا لانو كان بشتكي منو ومن أستهتارو وعدم المسؤلية اللي هو فيها، ما كنتا قايلة نفسي بحبو وأكتشتفت الحاجة دي لمن لقيتو واقف مع بت جيرانا في الشارع وبضحك معاها وقتها نار الغيرة ولعت فيني ومن شدة ما غرت عليهو جيت جريتو من يدو ودخلتو البيت وقعدت أشاكل فيهو وهو شغال لي حاجة عادية إنتي منفعلة كدة ليه! كلامو نفرزني زيادة ومشيت منو وأنا بعضي في أصعبي من الغيظ والغيرة شوية وقلت في قلبي إيوة هي حاجة عادية زي ما قال أنا لييه مكبرة الموضوع ومنفعلة!، بقيت من اليوم داك كلو ما أشوفو مع بت بغير وبسال نفسي أنا ليه بعمل كدة ومن كتر المواقف دي أكتشتف أني بحبو وبغير عليهو، وما صدقت أنو هو كمان طلع ببادلني نفس المشاعر وطلع بحبني زي أنا ما بحبو، بعد أرتبطنا علاقتنا كانت ماشة حلوة وهو مهمتي بي شددديد ولو أطلب شنو داك بيجيبو لي رغم الوضع الصعب اللي هو مااري بيهو، أمي لمن عرفت أني بحبو شاكلتني وقالت لي أبعد منو أحسن لي، بس أنا راسي كان قوي وحبي ليهو عمي عيوني عن حاجات كتتيرة كانت بتحصل قدامي وأنا ما ركزت معاها، حبينا بعض لمدة أربعة سنين بأكملها، في الاربعة سنين دي نهائي ما شفت حاجة كعبة منو، كنت دايما أول أولياتو، حب، أهتمام، تمسك، حاجات كتتيرة أنا شفتها منو خلال كل السنين دي خلتني أحبو وأتعلق فيهو زيادة وأكون مستعدة أضحي عشانو في أي وقت...
