يوم جديد،صحت نجد بدري تقريباً على الساعه ٦ الصباح توضت وصلت بعدها راحت تشوف مين الي صحى ومين الي ما صحى مالقت احد صاحي هي متعوده تصحى بدري راحت تستكشف المكان من زمان ما جت له كان المخيم كبير جداً عندهم اسبطل خيول وشبك غنم وشبك نياق رحت عند الخيول الخيول اربعه كلها حقتهم ونجد عندها واحد وحاكم وفهد ومُلهم بما انهم اكثر ناس يحبون الخيل دخلت الإسطبل واتجهت للخيل حقها" مهره"
نجد:هلا بمهرة قلبي هلا بلي له الخافق يهلي
أصدرت صوتها الي نجد تعودت عليه وكانت ترحب فيها
نجد: تصدقين اني اشتقت لتس اربع شهور ما خلوني اشوفتس ولله انهم ما يستحون بس معليتس بعوضها ان شاءالله
دخلت عندها وفكتها وطلعت برا الإسطبل مع الخيل راحت تتمشى وهي تسولف عليها وش صار كل هالاربع شهور
نجد تحب تسولف على الخيل كثير وتحسها قريبه منها
أكملت طريقها وهي تسولف وحست انها بعدت ورجعت،صحى وشاف الساعه كانت ٦:٤٠ص قام لبس ثوبه وراح يتوضى ويصلي بعد ما خلص صلاة راح خيمة المطبخ يبي اكل بس مشكلته ما يعرف يسوي الا شاهي انتظر لما احد يصحى راح يتمشى برا وشاف احد يمشي بأتجاهه بعد ما قرب الشخص طلع نجد تغطت نجد:صباح الخير زين في احد صحى ولا كنت بموت من الوحده
مُلهم ضحك عليها صح ما بينهم ميانه مره بس يرتاح لما يسولف معها: صباح النور غريبه صاحيه ذا الوقت
نجد: لا ماتدري عني انت معد صرت أتأخر بنوم صرت اقوم بدري،افطرت
مُلهم:لا ولله اذا يعني بتصلحين تسوين خير فيني تعرفين ما اعرف اطبخ وتسذا
دخلت نجد وهي تضحك:ابشر ابشر
راحت المطبخ ومُلهم دخل الخيمه سوت فول وشاهي وحطته بصينيه ودته لمُلهم اخذ منه الصينيه
مُلهم:تسلم يدتس ولله واضح من الريحه انه لذيذ
نجد:يلا بالعافيه
مُلهم:الله يعافيتس
بعد ما صحى الكل اتجهو البنات للمطبخ يجهزون الغدا جاهم
محسن:عمه نجد جدي يقول جيبي القهوه والشاهي وجيبو العود بيجون رجال
نجد:ابشر ياعيون عمه
خذت القهوه ومنيره خذت العود وراحو قسم الرجال تغطو قبل يدخلون قال الجد اول ماشاف نجد ومنيره هم اعز حفيداته
الجد ناصر:يامرحبا ولله ومسهلا تو ما نور المخيم
نجد:الله يبقيك ياجد وشلونك
منيره:بنورك ياجدي كيف حالك عساك بخير تراني مشتاقه لك ومشتاقة لسواليفك حيلل
الجد:بخير ومال الخير،تشتاق لتس العافيه ياسميت الغاليه
نجد:تبي شي ياجدي قبل اروح
سلامتس يابعدي
طلعت من القسم ما كان فيه الا الجد والباقي يشوفون الذبيحه، عند العيال وعمانهم
العم محسن:يافهيدان تعال
فهد:سم يبه
ابو محمد:خذ معك واحد من العيال استقبلو الضيوف وضيفوهم
فهد: ابشر.
