يتيمان في سجن الجحيم

البارت 6

#يتيمان في سجن الجحيم
#بقلمي . سجى حنا
#البارت السادس
___________________

" رضيت بالأمر الواقع وتعايشت ويا نفسي ويا الآخرين لان ماكو حل آخر حل ان اطلع من هذا المكان جربت اسوي كُلشي ومصار وما نصفني القدر جربت اشرد وفشلت وجربت الجئ بشخص وفشلت ومو بس هيج لا ومرته شدت وياي

يعني ما اعرف الحظ الي عندي شنو ما شاء الله اكو مثل يكَول حظ البنت على حظ امها والظاهر صدُك هذا المثل أمي جابت عمرها عايشه بمعاناة

وظيم وشكلي ورثت حظها
مرت الايام والأوضاع نفسها ماكو شي جديد غير أن تحدد موعد الخطوبه

ومن يوم ما حددو الموعد الهذا اليوم اني عايشه بصراع بسبب ساهر الي كل مشافني لازم يتحرش بيه لو يذبله كلام بذيئ مثله

وبالمقابل اني ما اكدر احجي أو اشكي الأحد لان محد بالبيت يحبني ما شاء الله الكل ناشبين عداوه وياي من لا شيء

" واليوم اخخ من هذا اليوم اليوم الي دمر حياتي كل ما أذكر هذا اليوم اموت الف موته اتعس يوم بحياتي على الإطلاق يوم خطبتي من ساهر

كعدت من الصبح اغسل وانظف واطبخ ولا كأن اني العروس الي لازم تكعد تجهز نفسها تسبح تحضر روحها للصالون

طبعا كل فعاليات الخطوبه انلغت من حيث أن البس فستان حالي حال المخطوبات أو أن اروح للصالون أو يشغلون موسيقى وأغاني وحفله واعزم صديقاتي كُلها انلغت

" اجتني زوجه اخو ساهر وانطتني دشداشه من عدها حمره وفوكَاها تول اسود صراحه كُلش حلوه وشسورت شعري واني متت عليه صار سرح يجنن

شكَد حلو عدهم شسوار ينعم الشعر اني حته ما اعرف اسمه لو ما هيه كَلتلي عليه وبعدها خلتلي شويه كحله وحمره شويه

اباوع على نفسي بالمرايا طلعت فد شي بعمري ما مخليه مكياج عيوني اصلهم لونهم اسود وهيه خلتلي كحل بطريقه رسمت عيوني رسم واني سمره

طلعن ملامحي من هذني العربيات

بس هيه ضلت تحجي على شواربي تريد تحفهم بس اني مخليتها لان اخاف ضلت تحجي آخرها عافتني وراحت وهيه ادردم

ضليت اباوع النفسي واتمايل منا ومنا وانفش بشعري معجبه بنفسي انفتح الباب ودخلت عمتي أول مشافتني كامت تصلي على النبي وتكَول شهل جمال فدوه لهل وجه يستاهل ابني ساهر هذا الجمال وصاحتني اجي علمود نعقد لان اجه السيد

" خليتها تطلع واني احجي عليها واعيب ؛ اي يستاهل ساهر ابني حبيبي السكير ابو النسوان الله ياخذه هوه وأمه شكَد اكرهم

اخر شي طلعت لان كَاموا يصيحون عليه طلعت امشي خايفه كُلش ورجليه ترجف ما اعرف شبيهم واحس

نفسي بردت حيل وصلت للاستقبال جان كَاعد عمي ابو ساهر وعمتي وأم سالم وسالم وساهر وباقي الولد والچناين كُلهم كَاعدين ينتظرون نعقد