عمده كفر ابو عجوه
الرابع
أستغفر الله العظيم و اتوب اليك
بعد شهر
رجع يحي البلد تاني علشان يتجوز حياه زي ما اتفق مع والدها
اما حياه فكانت طول الفتره دي بتجهز نفسها للجواز
الايام عدت بسرعه وخلاص مفيش مفر من جوازها من يحي
.....
يوم الفرح كانت حياه لابسه الفستان الابيض وجه يحي في زفه علي الحصان وضرب النار شغال احتفالا بالعريس وكفر ابو عجوه كله خارج يحتفل معاهم وبيهم
.
وصل يحي لبيت العروسه وهو لابس جلابيه صعيدي وصفوان قبله
قعدو وحط أيده في ايده وتم كتب الكتاب
واول اما الماذون خلص ضرب النار اشتغل تاني
وبعد الاحتفال
العريس خد عروسته علي الحصان والزفه شغاله وراهم
حياه مسكت في هدوم يحي بخوف : ما براحه علشان هقع من علي الحصان
يحي : ده يوم المني اما تقعي وياريت علي جدور رقبتك زرع بصل ،، ياااه علي الراحه هكون خلصت منك
حياه : يارب انت يا يحي يا ابن ام يحي ..علشان اكون ارمله واعيش حياتي بقي
يحي : بتدعي عليا يوم فرحي ..ده انت يومك مش فايت
حياه : وله تعرف تعمل حاجه لعلمك انا ممكن اضربك معايا الحزام الاسود في الكاراتيه
يحي ؛ وانا معايا قميص ابيض هيليق عليه ، ههههه
حياه : يومك هيكون زي وشك يا يحي
يحي : أنا وشي زي القمر . الدور والباقي علي وشك اللي عامل زي اخر الشهر
صرخت حياه بغيظ من يحي تقول كلمه ويرد عليها بعشره
.....
وصلو قدام بيت العمده ونزل يحي ومد أيده لحياه نزلها من علي الحصان
. عزيزه بترش عليهم ملح
يحي : كفاياكي عاد يا حاجه .انتي هتخللينا وله ايه عاد
عزيزه : ده عشان الحسد يا ولدي ..الله اكبر عليك وعلي مرتك .. الله اكبر في عيني وعين أهل البلد
حياه ليحي : القرد في عين امه ..دي فاكره انك هتتحسد
يحي : روحي اكشفي نظر. انتي مش واخده بالك اني زي القمر.
حياه : قمر بالستر
يحي : لينا كلام فوق في الاوضه
حياه : اوضه ايه.. انا مش هقعد معاك في اوضه واحده
يحي قرب منها : بما أن الناس كلها هنا . عايزك تعلي صوتك وتقولي الكلام ده .. علشان ابوكي يعرف
