*عمر ما كان الجواز بالإكراه ولا كان بالشكل ده .. بقيت في نظر عيلتي "عانس" بالرغم من إني لسة مكملتش حتى 25 سنة ولكن بنات عيلتي المبجلات كلهم بقوا في عداد المتزوجين وحتى أختي صاحبة الـ"20 عامًا" زي ما بيقولوا!*
- بابا أنا شايفة إني لسة مش مهيأة لحاجة زي كده ولسة قدامي شوية في الرسالة بتاعتي.
= إنتِ مش واخدة بالك إنك بتكبري
- بكبر إيه يا بابا أنا لسة مكملتش 25 حتى
*بصلي بسخرية أنا عارفاها كويس وكمّل .. *
= اه اه عندك 25 سنة إلا شهر .. بُصي ده شخص مُناسب ليكِ وأنا قررت خلاص
- مُناسب أو لا دي أنا ال أقررها مش حضرتك
= إنتِ هتتفضلي تقومي كده تدخلي أوضتك ومسمعش صوت من هنا لحد ما ييجي بكرة إن شاء الله
- عادي إنت ال حكمت .. هطفشه زي ال قبله
*بصيتله بكل فخر وقلتله الجملة دي ال بيكرهها قام حادفني بالشبشب على طول .. هيقطع على شغلانة ماما شكله .. دخلت أوضتي قعدت ألف حوالين نفسي بفكر إزاي هخليه يطفش زي ال قبله .. أفكاري كلها خلصت مفيش ولا حاجة في إيدي غير إني أبينله قد إيه أنا واحدة تافهة لا تصلح لتحمل مسئولية بيت وعيّلة .. اه هي دي وهيطفش لإنهم بيقولوا عليه إنسان جد جدًا وبيكره التفاهة وعدم الإلتزام .. يومين وكان الأستاذ المبجّل قاعد برة مع أهلي وبابا جه أخدني ليه طبعًا هددني بقطع رقبتي وبعدها يرميني لكلاب السكك لو العريس ده كمان طفش .. أومال الناس تاكل وشه ببنته العانس .. لا ميصحش!
دخلت الأوضه وقعدت على الكرسي ال قصاده*
- السلام عليكم
* بصيتله بقرف وأنا قاصدة ده *
= عليكم السلام ورحمة الله وبركاته إيه مبتعرفش تكمل السلام ولا إيه .. متعرفش إنك لو السلام كامل هتاخد حسنات أكتر
- مقبولة منك
* لقيت بابا بيبصلي بعصبية من برة وهنا عرفت إن رقبتي هتوحشني قريب *
- احم احم يعني هو ممكن حضرتك تيجي تقعدي جنبي علشان نعرف نتكلم وأسمعك أفضل
= لا مش ممكن
* لقيت بابا برة بيجز على سنانه فقمت بكرامتي أحسن وسيبت مسافة تكفي شخص ما بينا وقعدت *
= قصدي مش ممكن أقعد جنبك لازم مسافة يعني
- خريجة جامعة إيه ؟
= هنتعرف ولا إيه
- ده باينله يوم هباب أنا عارف .. حضرتك أنا مش جاي أهزر هنا المفروض إن دي رؤية شرعية وإن هيكون فيها قعدة تعارف وأنا بحاول ألطف الجو أنا أصلاً جاي مغصوب
= قول أقسم بالله مغصوب متقول كده من الصبح يراجل
- نعم!
= يلا يا شطور إطلع قولهم بقى دي طلعت خازوق وأنا مش موافق
- شطور! مش ناقص شغل عيال أنا وإنجزي مش هنتكلم كلمتين جد على بعض يعني ولا إيه؟
= طب خلاص خلاص متزعلش بس أنا ال هسأل
- يا الله يا ولي الصابرين اتزفتي إسألي
= فلن رايدر اسمه الحقيقي كان إيه؟
* رفعلي حاجبه كده باستهزاء وحسيت إني لو ما متمش قتلي من ناحية بابا فيهكون من ناحيته هو*
- قولي إنك بتهزري!
* رسمت ملامح الجدية على وشي *
= كان نفسي أقولك اه بس أنا مبهزرش وده سؤال مهم جدًا لو تعلم
- يوجين
= أقولك على سر؟
- أنا ال قتلت موفاسا
= ايه التراب ال كانت بتستعمله تنة ورنة؟
- تراب الأساطير
= اسم الشلال ال كان رايحله أستاذ فريد زين؟
- شلال الفردوس
= لا مش معقول آكل دبان
- وأبوس ضفدع في نفس اليوم
= ريبانزل قعدت في البرج قد إيه ؟
- 18 سنة
= قد لمعت عيناه!
- بالعزم انتفضت يُمناه
= لا تبكِ ..
- يا صغيري لا انظر نحو السماء
= مين ال كتب سلسلة مملكة البلاغة!
- د. حنان لاشين
= كام جزء
- 5 أجزاء
= تقدر تقولي أسماءهم وبالترتيب
- إيكادولي .. اوبال .. أمانوس .. كويكول .. سُقُطْرىٰ
= أنا وليد وإنتِ رغد
- أنت لي
= لا تمشِ وراء قلبك لأن قلبك بدون أقدام قائل هذه العبارة هو ؟
- غامبول
= الوردة المس ...
- مقربناش نخلص فقرة شباب المستقبل دي ولا اي؟
= شششش متقاطعنيش .. الوردة المسحورة ال كانت ف الجميلة والوحش بقالها كام سنة؟
- 21 سنة
= إجابتك ناقصة يبشمهندس
- لو مفيش بنت حبته هيفضل وحش .. زهقت أقسم بالله
= عارف ..!
* بصلي باهتمام من كتر الحماس ال طلع مني في اللحظة دي*
= أنا كنت جاية أطفشك بشوية أسئلة العيال دول بس لقيتك ماشي معايا ع الخط والحوار عجبني فكملت .. ف خلاص نتكلم جد شوية .. حابب تعرف إيه عنّي ؟
- هو غالبًا كده هنتفق لأن ليكِ نفس ميولي .. احكيلي عن نفسك وايه الحاجات ال حابة تكون في زوجك
= بعرف أهزر تحت ضغط وده يكفيني
- جد إحنا قلنا هنتكلم جد
= إنت بتتحول يبني مانت كنت تمام .. أكيد عارف عني الحاجات ال المفروض سألت عنها قبل ما تيجي .. بالنسبة للسؤال التاني ف أنا مفكرتش قبل كده لكن في المجمل .. أنا مش عايزة إنسان حياته جد في جد ميعرفش يعني إيه هزار .. مياخدش كل المواضيع بجدية وشد أعصاب ما هو الدنيا مش مستاهلة يعني .. عايزة حد يشاركني حياتي .. سواء تفاهة أو جد .. يسمع معايا كرتون .. يقرأ معايا روايات .. يرسم معايا .. صح إنت بتحب الرسم مش كده!
- اه طبعًا
= الأهم من ده كله يكون بيحب يتمشى مش واحد عايز قطع غيار وبيتحرك الخطوة بمواصلة! بتحب تتمشى!
- تحبي نلف السبع قارات!
* صقفت بإيدي زي العيال *
= هو ده
- بعيدًا عن إنك مبتتكلميش كلمتين جد ع بعض بس شكلي كده هتدبس وأمري لله .. يكفي إن ميولنا واحدة
= أنا بحب التعليم جدًا وعمري ما شفت إن حياتي هتكون مقتصرة ع بيتي .. فأتمنى تراعي ده لو فيه نصيب وأوعدك إني لو لقيت حاجة هتأثر ع بيتي أنا من نفسي هسيبها
- هشجعك ع ده وأنا كمان مش حابب مراتي تكون حياتها مقتصرة ع بيتها بس برضه
= آخر سؤال وهقوم
- اتفضلي
= يعني إيه "هو هو هي ها هو" ؟
- وأنا ال كنت فاكرك هتسألي سؤال مهم
= شكلك مش عارف الإجابة
- جين هتفضل مع طرزان
= إجابتك غلط يبشمهندس
* لقيته بيبصلي باستغراب ومديتوش فرصة يتكلم ووقفت بعدين افتكرت إني معرفش اسمه لأني كنت مصرة ع رأيي الغبي في الأول*
= هو صحيح اسمك إيه ؟
- نعم!
= والله معرفش
- امشي بسرعة من قدامي لأحسن أنا ع آخري منك
*طلعت بسرعة وأنا بضحك وقعدت معاهم في الصالة لقيت بابا مكشر دايمًا بيفهمني غلط الراجل ده .. كان فاكرني مبسوطة إني طفشته وكدة زي كل مرة لحد ما طلع وقعد وقالهم إنه من ناحيته موافق بابا بصلي بعدم تصديق كده ورجع تاني بصله قاله متأكد يبني فقاله اه وبعدين مشيوا*
- الراجل وافق بجد!
= ايه يا حاج إنت فاقد الأمل فيا كده ليه
- أكيد فيه حاجة غلط
= كل الحكاية إنه طلع تافه مش أكتر
- تافه! قومي من وشي
= صحيح يا حاج الكابتن مقاليش اسمه إيه هو إسمه ايه
* وللمرة التانية اتحدفت بنفس الشبشب قمت بما تبقى من كرامتي ودخلت أوضتي .. وعدت الأيام واتخطبنا وكتبنا الكتاب*
- أنا مستغربة من الكلام ال كنت بسمعه عنك إنك جد ومبتعرفش يعني إيه هزار وكده
= جد مع الناس الغريبة وخارج حدود بيتي في محيط شغلي وخاصةً إن أغلب ال حواليا بنات فلازم هكون كدة لكن الجانب ده مبيطلعش غير للحبايب يحبايب
* كمل كلامه وغمزلي ف ابتسمت*
- عارف من ضمن دعواتي ال كنت بدعي بيها "واجعله تافهًا يا الله"
*ضحك جامد بعدين بصلي كده وكأنه افتكر حاجة*
= فاكرة لمّا سألتيني عن معنى جملة قالها طرزان
- اه مالها
= قلتيلي غلط
- أيون غلط
= وإيه الصح إن شاء الله ده أنا رجعت سمعت الفيلم مرتين
- مش هتضربنى صح!
= إنتِ وحظك بس يللا
- هاجر هتفضل مع محمّد
* "لم يكُن مثالي أو مُبهر لكنهُ كان إنعكاسي رأيت نفسي فيهِ أكثر مما رأيت ذاتهُ *
منار البدوي🌻
