ICY : Sugar Free Ice Cream

Attachment - 1

Unicode

ညလုံးပေါက် ဂိမ်းဆော့နေခဲ့တဲ့ အကျိုးရလဒ်အနေနဲ့ သူ့မျက်လုံးနှစ်ဖက်လုံးက စူးအောင့်နေပြီး မျက်လုံးဖွင့်ဖို့ပင် မလွယ်ကူနိုင်ဖြစ်နေရသည်။

စာမေးပွဲနောက်ဆုံးနေ့မို့ ဖြေပြီးတာနဲ့ ဂိမ်းဆိုင်မှာ အချိန်ကုန်ခဲ့ပြီး ညမိုးချုပ်မှ အိမ်ပြန်ရောက်လာသည်။

အိမ်ရောက်တော့လည်း ဘယ်သူနဲ့မှ စကားမပြောဖြစ်ပဲ အခန်းမှာသာ ဖုန်းတလုံးနဲ့ အချိန်ကုန်မိပြန်သည်။

ဖုန်းအသစ်ထဲကို နားထောင်ချင်တဲ့ သီချင်းတွေ ဆိုင်ကနေ သွင်းလာတာကြောင့် တပုဒ်ပြီးတပုဒ် နားထောင်ကြည့်ပြီး ကိုယ်ပိုင်Playlistကို ဖန်တီးလိုက်သည်။

သီချင်းနားထောင်ရင်း မိုးလင်းပေါက် ဂိမ်းဆော့နေမိတာ။

လူတကိုယ်လုံးကလည်း ညောင်းညာကိုက်ခဲနေပြီး အသိသာဆုံးကတော့ ဖုန်းကိုင်ထားတဲ့ ညာဘက်လက်ကောက်၀တ်က ကိုက်ခဲနေရသလို လည်ဂုတ်ကလည်း မလှုပ်နိုင်အောင်နာကျင်နေရ၏။

ဗိုက်ဆာပေမယ့် မထနိုင်သေးတာကြောင့်အိပ်ရာပေါ်မှာ လှဲနေရင်းနဲ့ပဲ အိပ်ပျော်တ၀က်နိုးတ၀က်နဲ့။

လက်မောင်းနဲ့ ရင်ဘက်ဆီကို အဆက်မပြတ် ကျရောက်လာတဲ့ လက်သီးဆုပ်လေးရဲ့ ရိုက်ချက်က မကြာခင်မှာ ပါးပြင်ပေါ်ကို ကျရောက်လာတော့မယ်မှန်း သိလိုက်သည်။

ဘေးတစောင်း လှဲအိပ်လိုက်ပြီး မျက်နှာကိုလက်နဲ့ကာထားလိုက်တော့သည်။

" တိုကြီး... "

ညီပေါက်စဆီက ကိုကြီးလို့ခေါ်ခံရတိုင်း ကြက်သီးတဖြန်းဖြန်းထရ၏။ တိုကြီး၊ တိုကြီးနဲ့ ခေါ်သံကိုကြားရတိုင်း နာမည်မစီးဖို့ ဘုရားတရပြန်သည်။