بعياط _ يارب يارب سامحني يارب بس انا تعبت بجد ومبقتش اقدر استحمل،انت انت ادتني حياه صعبه اوي سامحني يارب.
كنت لسه هرمي نفسي قدام العربيه لقيت أيد بتمسكني وبتشدني لورا.
مسحت دموعي وقولت _ أنت....أنت مين ؟
= انتي هبله كنتي هتموتي نفسك .
شديت ايدي من ايده وقولت _ اوعي.
كنت لسه هتقدم خطوه لقيته بيشدني من ايدي وبيمشيني وراه .
حاولت اسحب ايدي بس كان ضاغط عليه قوي ف استسلمت .
_ انت موديني فين؟وانت مين اصلا؟ومين سمح لك انك تمسكني بالشكل ده.
ساب ايدي وقال = تقعدي ولا نتمشي.
_ أفندم!!!!!
= خلاص ماشي يلا نتمشي .
كان هيمسكني تاني ف شديت ايدي بعيد عنه وقولت _ أنت مجنون!!!
= لأ مش انا اللي مجنون ،مش انا اللي حاولت اموت نفسي علشان شويه زعل....
قطعته بحسره _ شوية زعل.. شوية الزعل دول اللي هما طول حياتي ، بنسبه لك 23 سنه شوية زعل.
= بصي بصي وراكي منظر النيل حلو ازاي.
أبتسمت بس إبتسامة زعل وحزن، ذا كان القَريب مفهمنيش عايزه شخص اللي شيفاه من دقيقه يفهمك.
كنت لسه همشي بس وقفني صوته وهو بيقول = 23 سنه يعني ناضجه وعارفه ان هما كام سنه وهتموتي ، ناضجه وعارفه أن مش دي حياتك اصلاً، ناضجه وعارفه أنك مش هتخسري دنيتك بس لأ وكمان هتخسري أخرتك.
عيطت ، عيطت بحسره علشان عارفه كل ده ،بس انا تعبت وزهقت وربنا مش راضي ياخد روحي ف حبيت اروح له انا.
رجعت الخطوه اللي مشيتها وبدأت اعيطت جامد _ بس انا تعبت ، تعبت ومبقتش مستحمله ، انت اصلك مش فاهم.
مسكني المره ده وانا مشيت معاه وانا مستسلمه قعدني علي الرصيف وقال وهو بيشاور علي كشك قريب مننا = هجيب لب....عايزه حاجه اجيبها؟
هزيت راسي ب معني لأ .
ثواني ولقيته راجع ب أربع قراطيس لب .... قعد جمبي وقال = جبت أربعه علشان انا طفس الصراحه .
ضحكت ومردتش ،مد لي ايده بقرطاسين وقال = بس مش طفس اوي يعني .
قولت بصوت واطي _ مش عايزه.
= امسكي بس متعمليش نفسك مكسوفه يابنتي ده انتي عشرت ٥ دقايق.
ضحكت وبصيت له وقولت _ شكرا ، بجد مش عايزه.
= طب اجبلك أيس كريم.
_ لأ برضوا .
= طب اجبلك ايه.
أبتسامتي اختفت وقولت _ الراحه....تعرف؟
فضل ساكت ثواني وبعدها ضحك وقال = لا للأسف دي غاليه وانا مش معايا فلوس.
بصيت قدامي _ فعلاً غاليه.
كنت سرحانه ف وقت ماهو كان حط القرطاسين في ايدي وقال = انا بقرف اصل مش هاخد حاجه لَمستيها.
بصيت له وبعدين بصيت للقرطاسين وقولت _ صدقني مش عاوزه،مليش نفس، انا اصلاً هقوم اروح دلوقت.
ضيق عينه بشك = تروحي ولا ترمي نفسك قدام عربيه .
أبتسمت _ امممم، يمكن اه ويمكن لأ.
سكتنا بعدها ، فضلت بصه للنيل وانا ساكته.
لأ انا مش ساكته ،انا في حرب ف دماغي مش عارفه اوقفها ، انا أفكاري مسيطره عليا وعلي حياتي .
مسكت دماغي جامد ، محاوله فاشله علشان اوقف الحرب دي.
كنت مغمضه عيني لقيته بيشدني ويقومني = تعالي تعالي انا عارف هبسطك ازاي.
انا حاسه اني ف عالم تاني ، هو بيكلمني وانا مش سمعاه ،ماشيه معاه وانا مش عارفه انا رايحه فين.
المفروض مديش له الأمان بس انا حياتي كلها بايظه ومفيهاش أمان ف هيبقي احسن لو خطفني وموتني.
