العشق السرمدي

الجزء 22

🍒 الفصل الأول: بدونك لا اهوى الوجود

يوم الافتتاح
                       
عائلة مرتضى كلهم فايقين بكري جالسين فطاولة الفطور مراد مترأس المجلس وعلى اليمين ديالو ذكرى وفاليسار عصام بتخنزيرتو المعتادة ساكت مكيتسمعش صوتو جالسة حداه أماني لابسة كسوة قصيرة وشعرها صفر بالصباغة طالقاه وفالجهة التانية ياسين وحداه  بلقيس وحداها سلمان وأكرم قبالتهم براءة وليليان لي ديمة ملاسقين فحال التوأم 

مراد: الحفل دهاد ليلة مهم بزاف غدي نفتاتحو  أهم واضخم منتجع ف افريقيا والشرق الأوسط بغيت كلشي يكون مضبوط ومتخليوش للصحافة الفرصة فين تشد نقطة ضدنا ، شاف ف عصام: الحفل تحت مسؤوليتك نتا تكلفتي بيه من الأول اذن غادي تكون مسؤول عليه حتا النهاية

عصام بصوت مبحوح وعينيه فالطبسيل معلاهمش: احم متهزش الهم كلشي مضبوط ماغادي يوقع حتا مشكل

مراد: انا تايق فيك ومتاكد ماكاينش حدت كتنضمو نتا وكيوقع فيه مشكل

سلمان:  غدا غادي تلقا الصحافة كلها كتهدر على غياب أولاد عائلة مرتضى  وبلي كاينة بينهم مشاكل لي خلاو فهد ويوسف وسحر يتغيبو

مراد: ادا هدرو غدا نضم مؤتمر صحفي نصرح على اسباب غيابهم وبلي عندهم صفقات مهمة خارج المغرب ميمكنش يسمحو فيها ويجيو

ياسين: على ذكر الصفقات رئيس شركات الإسمنت  لي فروسيا  باغي يجدد العقد مع شركات كريم الله يرحمو وسحر رافضة تماما ترجع تجدد معاهم وهادشي غادي يترتب عليه خصارة كبيرة والشركات غادي يطيحو الاسهم ديالهوم فالسوق.

أماني تزيرات ولات زرقة مبغاش تذكر اسم سحر فالحوار

مراد: خلي تدوز هاد ليلة ونتفرغ لهاد المشكل

براءة: بابا صحاباتي بغاو  يحضرو  واش ممكن تسمحلهم يجيو

مراد: معلوم ابنتي ممكن ضيوفكم وصحابكم كلهم مسموح يجيو غير مبغيتش الصداع

عصام علا راسو وشاف ف براءة وليليان بحدة ومخنزر : غدي نبهكوم دابا قبل ما يبدأ الحفل لبس ميكونش اوفر وجهكم نلقاه مجلخ غادي نجلخكوم ومنلقاكمش كتفرفرو من جيهة لجيهة بلاصة وحدة تبقاو فيها قدااام عيني( شاف ف ليليان  ) خصوصا نتي نشوف شي بلان معجبنيش غدي يكون لي تصرف اخر معاك

ليليان هبطات راسها كتقفقف الطيران لي فيها كولو كيوصل لعندو وكيتحد  اصلا هي كتخاف منو غير تخنزيرتو كتديرلها الرعب عارفة يديه سابقاه وماكيتحكمش فعصبيتو 

ذكرى : متخافش اولدي لبسهم والميكب انا مسؤولة عليهم وغادي يبقاو جالسين قدامي

براءة قربات لودن ليليان: وفين الزعامة ديالك ياك مكتخافيش منو وماكيخلعكش شفت جبهتك قريبة تقيص الطابلة

ليليان تحت سنانها: غادي تبعدي مني يا القح*بة ولا نجمع معاك اصلا ماخايفاش منو شكون هو فملك الله باش يخلعني

براءة: اممم تيقتك ياختي فيك غير لسان مايغلبك حد

مراد : عصام الملفات لي وصيتك عليهم راجعتيهم؟

عصام توتر معرفش باه على شمن ملفات كيدوي عليهم ، راسو   حس بيه غادي ينفاجر ولكن فنفس الوقت كيمتل البرود وجاوب باش تاحد مايرد البال

عصام: اممم وي حتا نصردهمليك

مراد: وحددتي موعد الاجتماع على قيبل المناقصة الجديدة

عصام محملش الوضع لي محطوط فيه وهو ماعارفش كيفاش يجاوب

عصام وقف:احم كلشي واجد.لمهم نتلاقاو ليلة،مشغول  دابا .
دار خارج من القصر وهو على اعصابو محاملش راسو وكاره هاد الحالة لي رجعت من جديد كيفاش اومور مهمة بحال هادي ينساها

#يتبع