العشق السرمدي

الجزء 43

🍒 : بدونك لا اهوى الوجود

يوم جديد وأحدات جديدة عند عائلة مرتضى ، داز يوم هادئ فالقصر كلشي صبح ناعس حيت تعطلو فالصهير 
الرجال مشاو لخداميهم ويوسف نهار كامل وهو غايب خرج بكري هو و اندريا ، ليليان نهار كامل وهي سادة عليها فلبيت  مغمغمة وناعسة دخلت ذكرى عندها لقات الضواو طافيين والريدوات منزلين، الضلام وهي ناعسة ومغمغمة شركت ليل مع نهار ودابا بدا يطيح ليل وهي ماناضتش ومابغات لا تفطر لا تغدى شعلت ذكرى الفيوزة لي حداها وجلست قدامها فالفراش كتنهد وتأسف على حالة بنتها وضميرها كيأنبها حيت حتا هي كانت سباب فهاد الحالة لي فيها، حيدت الغطا  على راسها وقاصت جبهتها لقات حرارتها عادية حمدت الله وبدات كتدوز يديها بحنان على شعرها حتا بدات كتحرك ليليان

ذكرى: بنتي حبيبة فيقي خلاص راك شركتي ليل مع النهار

ليليان: اممم غير خليني مابغيتش نوض

ذكرى: لا غادي تنوضي وتاخدي دوش ونزلي شوية ونتعشاو راه باباك من قبيلة وهو كيسول عليك كان غادي يطلع عندك بيديه غير منعتو

ليليان: ماما عافاك ماقادراش وماباغا نشوف حد

ذكرى: وحتا لإمتى بسالامة باغية تبقاي مخبيا

ليليان عينيها غرغرو : ماعرفتش صاراحة مبغيتش نشوفو

ذكرى تنهدات: وشنو غادي تبقاي مخبيا ودافنا راسك هنا

ليليان بقات ساكتة وعينيها فالأرض
ذكرى شداتها من خدودها وقرباتها ليها كتشوف ف عينيها لي فيهوم بريق خاص ممزوجين بدموع جاو بحال بلورة فيروزية كتبري

ذكرى: شوفي ابنتي يمكن كلامي ماغاديش يريح قلبك ولكن غادي يفيدك انا عارفة راسي غالطة من راسي لرجلي فهاد القصة ماكانش عليا نخبي عليك بلي هو ماباغيش وغير بززت عليه ولكن ماقدرتش ،بقيتي فيا خصوصا ملي شفتي تصويرتو كنتي فرحانة مابغيتش نخسر ليك فرحتك وملي دخلتي لهاد الدار نورتيها رديتيها حيوية بالشغب ديالك ولغوات والتنقاز زرعتي الفرحة فينا كاملين حتا رجع عندي امل نهار يجي يوسف اكييد غادي يبغيك كيفما بغيناك وبعدت فكرة نقوليك الحقيقة
ليليان بدات كتبكي

ذكرى بالدموع: بنتي دموعك غاليين عندي ماكانبغيش نشوفك فهاد الحالة مكتائبة مولفاك نشيطة

ليليان عنقات ذكرى كتبكي : أهئ اهئ انا خايفة اماما

ذكرى كتدوز ليها على راسها بحنان:  شوووووو مناش خايفة احبيبة

ليليان: ياك دابا  انا ويوسف غادي نطلقو

ذكرى حركاتليها راسها بأسف: على الأغلب هادشي لي غايوقع

ليليان تفركعات بالبكا ودارت يديها على وجهها كتشهق: أهئ هئهئ اذن أهئ غادي تردوني بحالي ل دوار

ذكرى بقات مصدومة من هدرتها ونطقت بحدة: نتي مصطية  واش انا نقدر نفرط فيك ولا تغيبي علي عيني هادشي ما نويتي فيا نتي عارفاني ندير هادشي

ليليان:  وهو مايبغيش

ذكرى: ادا مابغاش راه الباب يرجع منين جا هو و ديك لي معاه اما نتي بلاصتك هنا هادي هيا دارك وهنا كاين خوتك وعائلتك حنا كلنا معاك ونتي بنتييي لي مولدتهاش وربي عالم على قلبي بحالك بحال براءة... شافت فيها مخنزرة: مابغيتش نسمع هاد الهدرة مرة خرا اولا غادي نتقلق منك

ليليان كتمسح دموعها بيديها: سمحيلي ماما

ذكرى بتاسمات: ديري فبالك نتي اجمل هدية دخلت لهاد الدار وبفضلك بلقيس ولات كتضحك شوية وتجلس  معانا ومابقاتش حابسة راسها قربت عندها وباستها من خدودها يالاه اماما نوضي خودي دوش ونزلي حنا كتسناوك لتحت واخا تلقايه لتحت مابغيتش نشوفك ضعيفة وكاتبكي تصرفي عادي ودموعك مايبانوش تفاهمنا، ليليان بقات ساكتة علات ليها ذكرى راسها: واااش تفاهمنا حركات ليها  ليليان راسها ب اه