العشق السرمدي

الجزء 91

🍒 الفصل الأول: بدونك لا اهوى الوجود

جا صباح جديد و طلت الشمس ببهائها المعتاد على القصر لي جامع أبطالنا ، باعثة جدائلها الذهبية ،خيوط أمل كتبين لكل واحد بلي هاد النهار يقدر يكون حسن من لي داز و بلي ما دام كتشرق الشمس كل نهار فمنقدوش الأمل فأنه ممكن تشرق معاها ضحكتنا و فرحتنا...

جالسين على لاطابل د الفطور كيساينو سحر تنزل حيت عندهم من باب الاحترام ما يبداو حتى يتجمع كلشي ، شوية و هي تبانلهم نازلة هازة فاليزة صغيرة ف يديها شعرها مطلوق مخلياه على راحتك ، ابتاسمات نزلت الباليزة جنب و مشات عندهم

بلقيس : فين غادة أ بنتي علاش هازة باليزتك

سحر بابتسامة هادية : عمتي نتي عارفاني جيت غير نقدي شي شغال و راجعة بحالي لأمريكا

ذكرى : دوزي تفطري

سحر :والله مقادة أ مرات عمي  ، و زيدون غادي نتعطل
ذكرى بجدية وحنية فنفس الوقت : من إمتى وليت مرت عمك ياك من ديما كنتي كتعيطيلي ماما ذكرى

سحر ردات لباب لراسها و مشات عنقاتها من اللور : سي فري بزاف دالحاجات تبدلو فيا و لكن إلا نتي عمري نبدلك غادي تبقاي ديما ماما ذكرى لي عوضتني و محسستنيش بألم فقدان الأم

ذكرى وقفت عندها : نتي راكي ماشي غير بنتي و صافي نتي عندك معزة خاصة فقلبي نتي بنت أعز صديقة عندي لي كانت بمثابة ختي، مانبغيكش تعتابريني غريبة عليك و تعاودي تعيطيلي هكاك

سحر : والله ماقصدت أماما  ، حتى أنا من ديما عاطياك واحد المكانة فقلبي لي عمرها ماتبدل

عصام و أماني غي كيتنهدو محاملينش الوضع

مراد : صافي دوزو تفطرو حتى نساليو و أرا  متعبرو على حبكم لبعضياتكم

سحر : والله أعمي حتا غادي نتعطل غا بصحتكم

ذكرى بجدية : شوفي نتي غادي نقلك جوج كلمات مغاديش نزيد عليهم مكاين بو مشي غادي تبقاي فدارك و قدام عائلتك مغاديش تفرقي من حدايا ، المرة لي فاتت ضحكتي علينا و كلتي غادي غير تمشي تبدلي الجو و تنساي و ترجعي فلخر بقيتي تما أما دابا فكنقسسسسمللك بالله و تخرجي من داك الباب عمرك تعاودي تعرفي بلي عندك عائلة هنا و نساي بلي كتعرفي شي وحدة إسمها ذكرى وحتا أنا غادي ننسى بلي راك بنتي لي ماولدتهاش، عمري غادي نسمحلك فحياتي و تحاولي تفرضي قرارك عليا و تمشي بزز مني

( عصام بدا يسخط من كلام ماماه أما أماني كنتمنى سحر تدير لي فراسها و تمشي )

سحر : ولكن أماما ...

ذكرى : أنا قلت لي عندي ما بغيت نسمع من عندك حتا كلمة عندك جوج اختيارات يا غادي تهزي باليزتك و تخرجي ساكتة و ديكساع غادي تاخدي معاك سخطي للابد يا غادي تكلسي على هاد الكرسي و تفطري  داكساع غادي نعرف بلي عائلتك و رضايا عندك أهم من كلشي

بلقيس: بنتي حبيبة ، ذكرى عندها الحق رجوعك لهنا كيهمنا كلنا و غادي يفرحنا  ،حنا كلنا كنبغيوك و غيابك هاد السنوات أتر فينا كاملين ، مكانلوموكش، مشيتي بنيتي حياتك طورتي من شخصيتك و لكن دابا صافي لازم عليك ترجعي، بعدك ما بقى عندو حتى معنى ، كلنا محتاجينك تبقاي معانا

سحر بقات مدة كتفكر فلخر تنهدات بقلة حيلة  جرات كرسي قدام براءة و كلسات حيت كيف ما كانو الضروف لي كيجبروها تمشي و لكن رضا ذكرى و عائلتها عندها أهم من كلشي تضحي بالغالي و النفيس و متفقدهومش

عصام ضرب الطابلة بعصبية حتى قفزو البنات وناض خرج و اصليه الخز للراس ولكن ميمكنش يدور فماماه ، حتى أماني ناضت بالزربة طلعت لجناحها حيت عارفة وجودها تما بلا بيه معندو حتى معنى بالأخص حتى واحد مكيحملها

مراد : تفضلو بداو الفطور

فهاذ الصباح نيت كانت فاقت ليليان بكري وخدات دوش ولبسات حوايجها عبارة على سروال جينز كولو مقطع ومزير علي جسمها وطوب سميطات اخضر لون عينيها وخلات شعرها الأورنج مطلوق علي راحتو هزات صاكها وطيليفونها وخرجات من البيت كتسلت باش مايشوفها حد  وهبطات كتجري من الجيهة التانية من القصر فين كاين الطوموبيلات عطات إشارة للشيفور جا كيجري ركبات ديمارا الطوموبيل و خرجت من القصر ،

فهاذ الأثناء كان يوسف واقف فالبالكون لابس حوايجو و شاد فيديه كاس دالقهوة تفيقو شوية قبل ما يخرج يقاد أمورو دالخدمة حيت من هنا لفوق غادي ينقل جميع أشغالو للمغرب لأنو ما يمكنش بعد ما عرف ليليان مرتو يخليها و يمشي، يمكن دار هذا الغلط قبل ملي مكانش عارفها و كان تهيأليه أنها مازالا طفلة جات من الدوار مغاديش تكون مناسبة ليه و لا لعقليتو لكن من بعد ما شافها سحراتو من أول نضرة ، معمرو ما ضن أنه يمكن يتغرم ب شي وحدة بين ليلة و ضحاها حتى لقى ليليان لي غيرت كل توقعاتو و كسرت الأسوار و السلاسل لي شاد بيهم قلبو ، مزال ساهي فأفكارو حتى تار انتباهو شي جسم غادي بالزربة لتحت ، هبط عينيه و هو يشوفها غادا كتسلت ركبت بالزربة فالطوموبيل لي ديمارات و زادت ، عض على شنايفو بقوة و حط الكاس دالقهوة بعصبية حتى طاح و تهرق هز سوارتو  هبط كيجري تابعها عارفها و عارف فين مخططة أنها تمشي، من الأحدات لي وقعو البارح متأكد أنها غادي تكون عنيدة و راسها قاسح و غايكون صعيب عليه يرجعها للطريق و  لكن حالف ما يرتاح حتى يديرلها عقلها يا بالخاطر يا بالسيف
ركب فالطومبيل ديماراها و خرج تابعها بأقصى سرعة ...