العشق السرمدي

الجزء 94

🍒 الفصل الأول: بدونك لا اهوى الوجود

ف منتصف الليل ، القصر كان هادئ تعشاو وكل واحد مشى لجناحو يرتاح من غير ذكرى لي باقا واقفة متوترة كأنها كتستنا شي واحد ، باركات سحر السيارة و نزلات هازة معاها ساشيات ديال الملابس كانت محتاجهم مع دخلات فالباب لقات ذكرى واقفة لي غير شافتها تنهدات عاد رجع فيها الروح ، سحر تقدمات عندها باستغراب

سحر : ماما ذكرى مالك

ذكرى : فين كنتي أ بنتي شطنتيني عليك

سحر : علاش غادي تشطني أنا موالفة نبقى كتر من هاكا معطلة

ذكرى : من إمتى ولفتي هادشي ياك كنتي تدخليلي قبل ما يطيح الضلام

سحر دارت ضحيكة على وجهها : هادشي كان شحال هادي أ ماما واش أنا باقا بنت 16 عام

ذكرى عنقاتها و باستها : ديما غادي تبقاي ف عيني صغيرة و ما عمرك غادي تكبري ،

سحر عنقاتها بدورها: عارفاك الحنانة غير مخلوعة عليا و لكن خسك تولفيني

ذكرى : را ضروري نخاف عليك عنداك شي واحد يتعرض عليك و حنا داير بينا غير الخلا

سحر ضحكات : تخافي عليا ، أنا را الخوف براسو يخاف مني هاد الساعة ، متبقايش تخافي غي ريحي راسك

ذكرى باستها : يالاه نخليك، دابا رتحت ملي شفتك ، نتي عارفة عمك مراد مينعسش بلا بيا

سحر بقات حاضياها بعينيها مبتاسمة حتى اختفت على أنضارها، و كملات طريقها طالعة فالدروج ، غير وصلات للراس فالكولوار باش تدور جيهة جناحها و هي تخبطها ليليان لي كانت جاية كتجري ؛ شافتها و هي تبتاسم

ليليان : نارييي باربي ديالنا جات

سحر :مالكي ألحمقة كتجري

ليليان: حتى نتي غادي تكوليلي الحمقة

سحر :خبارك واصلاني ههه

ليليان : ضالميني فهاد الدار بالله

سحر : وا سيري قدي شغلك لي كنتي كتجري عليه وخليني نمشي نرتاح

ليليان : كنت غادية غير عند أكرم يصايب ليا تيليفوني ولكن ملي شفتك ما بقيتش غادة (جراتها ) يالاه تمشي معايا نالبيت عند براءة نكلسو شوية عافاااك

سحر : لا مافياش باغا نرتاح، مرة أخرى

ليليان : عافاك عافاك ديريلي خاطري بغيت نتعرف عليك كتر

سحر تنهدات بقلة حيلة وتبعاتها،دخلو للبيت و بقاو داويين سحر مرة مرة تنساجم معاهم فالحوار وتجاوب على أسئلة المسطية د ليليان لي ماهداتش ملي دخلو و هي كتسول

ليليان : صدقتي زوينة بزااف حسن من التصاور لي شفت ؛ كتشبهي ل روبي ، لا لهايفاء لا لا حسن منهم بجوج ، شوفي أ براءة شعرها كحل تبارك الله شحال زوين ، صافي حتى أنا بغيت ندير هاد اللون وأنا عندي هاد الشعر حمر بحالا شاعلة فيه العافية

سحر غي كتشوف فيها و مرة مرة كتخرجليها ضحيكة من الهضورات ديالها

سحر : لا حتى نتي شعرك زوين ما شاء الله مناسب وجهك

ليليان : نو نو نتي حسن كلك على بعضك زوينة وفرمتك واااو كتحمق عطيني الوصفة عافاك عافاااك