العشق السرمدي

الجزء 99

🍒 الفصل الأول: بدونك لا اهوى الوجود

طلعات سحر نيشان نالحمام حيدات حوايجها و  دخلت تحت الرشاشة بقات مدة تحت الماء مغمضة عينيها وشادة فالحيط الماء هابط علي جسمها كامل و عقلها تالف وملخبط فحال ديما . هي مامرتاحاش لوجودها فهاد الدار حاسة براسها مخنوقة كل بلاصة فيها كتفكرها  فالماضي حتا من هاد الوقفة فالحمام كانت كتفكرها نهار كانت كاتاخد دوش ودخل عليها عصام ومابغاش يخرج بقا مصر يبقا يدوش معاها حتا ستسلمات وكانت هاديك اول مرة يشوفها عريانة كلها
مازالة عاقلة على كل كلمة غزل كان كيقول ليها، على كل لمسة تلمس بيها جسمها الصغير الحليبي على كل قبلة شاركها معاها تحت الماء ، على كل ضحكة خجل ، كان مدللها لأقصى درجة ومسميها غير أميرتي ماعمرها ضنت غادي يجي نهار لي عصام ميبقاش ليه وجود فحياتها .
سحر تبسمات على ذاكرتها فين رداتها ومع بالها كتقول هادو من الأسباب لي خلاو عصام يتقلب عليها انها دغيا سلماتو راسها وخلاتو يشوف ويتلمس جسمها، واخا مادارش معاها علاقة كاملة وما فضش بكرتها. لكن كتبقا ستسلمات ليه وخلاتو يلعب فيها كيف بغا حتا شبع منها ولاحها. خرجات سحر من الدوش لبسات كوستار فالأسود مع طالون باج، قادات وجهها سامبل فحال ديما وسرحت شعرها ودارتو مور ودنيها وخرجت نازلة.
اما لتحت كانو كلهم كالسين منغير سحر وليليان مازال مانزلو،
كلهم ساكتين وكل واحد فين كيخطط ، نزلات سحر وجلسات بدات تفطر. وبقات غير بلاصة ليليان

يوسف عيا يستناها بالو غير معها باغيها تنزل باش يشبع منها مابقاش ساخي بيها ماكرهش ديمة تبقا جنبو ويشبع شوفتو من وجهها الملائكي، هو مازال كيفكر حتا خرجت ليه تبسيمة ملي سمع صوتها نازلة كتنقز وتغوت فحال ديمة حمقة هههه مرتو الحميمقة طول عمرو كان كيضن انه نهار يحب غادي تكون وحدة كبيرة وناضجة بعقلها باش مايلقاش معاها مشكل، ماعمرو ضن أنه غادي يطيح على زنافرو مع وحدة برهوشة  مراهقة  مازالة كتبغي تلعب . غير دار بعينيه لمصدر الصوت ولمحها كيفاش كتدير قلبو تخطف فكل تنقيزة كيقول دابا غطيح على زنافرا مارتاح ورعجت فيه النفس حتا شافها كتجر الكرسي قدام براءة

ذكرى: الله يابنتي مالكي على هاد الجرا

ليليان: واراه ريحان غاديي تشرب ليا العاصير كلو.

ذكرى: اويلي على بنت الحرام علاش العاصير غادي يتقطع

يوسف بلا ميرد البال خنزر وهدر بحدة" اخر مرة نلقاك كتجري فدروج

عصام تبسم وقلب وجهو اصلا ماعندوش الخاطر الحريق لي رجع ليه مبرزطو مامخليهش يرتاح

ليليان: مولفة على هاد الجرا

يوسف قرن حجبانو معصب من هاد رضان الهضرة لي فيها بقا كيتحلف ليها مع راسو

مراد: ماتعاوديش ابنتي تنقزي

ذكرى: ماعرفتش ابنتي لي فيك مامهنيك كطيري غير بوحدك، ماعمرني شفت شي وحدة بحالك

براءة: هههههه علاش نسيتي سحر كيف كانت كتنقزهم ملي عصام كيكون جاري وراها

كلهم علاو راسهم شافو فيها وشافو فسحر

براءة عضات علي لسانها من الكلام لي فلت ليها
سحر تبسمت جنب بإستهزاء وقلبات وجهها

عصام كان كياكل غير سمع كلامها تزير كيحاول يتذكر هاد الموقف لي دوات عليه عيا يحاول والو تقول عقلو ممسوح

مراد حاول يتدارك الموقف: بما اننا كلنا مجموعين بغيت نقلكم بلي هاد العشية غاديين لفيرما حيت عيد زواجنا غدا وذكرى بغات نديروه فدارنا الأولى فين تزوجنا اول مرة

يوسف: فكرة زوينة حتا انا توحشت الفيرمة من شحال مامشيت

ذكرى بإبتسامة: هادي فرصة نمشيو وحتا نتوما تبدلو الجو دالخدمة

ليليان  بتذمر: ولا اماما مابغيتش ديك الفيرمة كتخوفني ماكيجينيش النعاس فيها