العشق السرمدي

الجزء 101

🍒 الفصل الأول: بدونك لا اهوى الوجود

الليل بدأ يطيح الضلام تحلات باب الفيرمة لي جات خارج المدينة ضاير بيها غير لخلا والأراضي الزراعية والجنانات.  كانت فيرمة كبيرة مكتحدهاش العين البشرية من أراضي وإسطبلات وكوريات،تحلات الباب ودخلو منو ربعة طوموبيلات الأولى د مراد وذكرى ومعاهم ليليان والتانية ياسين وبلقيس والتالتة ديوسف لي كان عقلو غير مع ليليان وطريق كلها وهو كيتحلف عليها حيت هربات ليه وركبات مع مراد وهو مقدرش يمشي ينزلها  ومعاه اندريا والطوموبيل لخرا كان فيها عصام واماني
نزلو كيشمو ريحة الطبيعة ليليان خلاتهم واقفين ودخلات كتنقز يوسف تنهد وحرك راسو بلا حولة ودخل تابعها  غادي تصطيه وكلهم دخلو وراه. لقاو الخدم كلهم واقفين كيستناوهم ومعاهم رئيسة الخدم لي كانت مرأة كبيرة كانت معاهم من أول زواجهم وملي نتاقلو على القصر بقات هي مكلفة بالفيرمة
 
رئيسة الخدم: مرحبا بيكم الفيرمة نورات بوجودكم

ذكرى قربات وسلمات عليها: ترحب بيك الجنة اخالتي

سعدية: الفيرمة نورات بيكم

قرب عصام وباس ليها راسها : منورة بوجودكم الحاجة
ويوسف جا باس ليها يديها كتبقا مرأة كبيرة وكيعرفوها من صغرهم

السعدية: حليلي وليداتي  كبرو  او ولا رجال
ذكرى: تبارك الله شكون يقول دوك نص شبر يرجعو بهاد الطول

السعدية: هادي هيا الدنيا دغيا كنكبرو وحتا هوما دابا يجيبو ولادهم ويكبروهم .

عصام بإبتسامة: ان شاء الله الحاجة

السعدية: الله يرزقك من عندو اوليدي

عصام تنهد آااميييين ( امنيتو يكون عندو ولد)

السعدية يالاه زيدو تعشاو قبل ما تبرد القصرية دكسكسو ، مازال كتهدر حتا جاتها تعنيقة من ضهرها ضارت وهي تلقا ليليان

ليليان: الحااجة توحشتك

السعدية: هادي نتي اشويطينا

ليليان عبسات: مازال كاتقوليلي شويطينا

السعدية بضحكة : علاش ماشي نتي لي لحتي القط مسكين فالبير

ليليان: وراه بغيت نعطيه غير يشرب وهو كينقز بوحدو طاح ليا

ذكرى: اوا الحمد لله ملي كان مصطفى ( الجارديني) حاضر وجبدو دغيا

السعدية: واييه ولكن  الحقيقة تقال كتطيري  ابنيتي دارت وشافت فيه: يوسف الله يعينك اوليدي عليها
يوسف عجبو لحال من هاد الكلام جاه احساس فشكل

يوسف: هاحنا صابرين الحاجة حتى تدير عقلها
ليليان ميقات فيه وقلبات عينيها . غير شافها شنو دارت خنزر فيها كيتحلف

دخلو كلسو يتعشاو حتا قربو يساليو ديك القصرية حيت كانو موحشين طيابها.  ليليان مامهتماش بالبريستيج كتلجم بيديها وتاكل وتفرتيت كينزلو من فمها  مامدياها فحد يوسف غير حاضيها مستغرب من الشراهة دماكلتها وكيقول مع بالو من عدرها مطرمة ومطرفة الخير لاقي فين يمشي . واندريا غير كاتشوف فيها وتبتاسم بوحدها. سالاو ماكلتهم وكل واحد ناض لبيتو يرتاح حيت الطريق كانت طويلة

فبيت عصام جالس فوق السرير لابس غير شورط فالأسود ومن لفوق عريان شاد كارو فيديه كيكميه وكيشوف فأماني قبالتو كتدهن فالكريم

عصام بصوت مبحوح: درتي تيست هاد الشهر

اماني علات عينيها شافت فيه من المراية ونزلاتهم :  درتو

عصام : نفس النتيجة

اماني: اممم نيكاتيف

عصام : مارجعتش عند الطبيبة

اماني: هاد الشهر كان عندي عامر ديفيلي  مادركتش نمشي مي مازالة كنشرب الدواء

عصام: حنا هدرنا على هاد الخدمة نهار تحملي غادي تجلسي

اماني بإبتسامة صفرة: واخا احبيبي

عصام: ومالك هاد اليوماين غير قالبة وجهك

اماني: والو
عصام: سولتك مانعاودش الهضرة

اماني:شوف نتا .ماشفتيش هاديك لي راجعة

عصام: علامن كتدوي
اماني: سحر
عصام:وحنا مالنا

اماني:كيفاش حنا مالنا ماتنساش شنو كان بيناتكم

عصام بحدة : كاااان كااان فالماضي والماضي فات ودا كانت شي حاجة واخا ماعاقلش على طبيعة هاد العلاقة كيف كانت مئة بالمئة لمهم فاتت ودابا نتي لي كاينة

اماني:كيف سبق قلتليك كانت غير لاسقة فيك ونتا كنتي شافق عليها .ونهار سافرات خرجات على الطريق عاطياها  غير السكرة والرجال

عصام: قح*بة كتطيح من سمعة العائلة.

أماني:وزيد عمي مراد وخالتو ذكرى ماشيين معاها فالخط

عصام: بدلي عليا سيرتها. جيبتي معاك المذكرة ياك

أماني: اممم جبتها

#يتبع
التتمة غدا.  خليو تفاعلكم و تعاليقكم