العشق السرمدي

الجزء 122

🍒 الفصل الأول: بدونك لا اهوى الوجود

يوم جديد

على طابلة الفطور ، مجموعة العائلة كاملة كتفطر كل واحد مهبط راسو لطبسيلو و كيفكر ، شي ف الإهانات لي تعرضلهم هاذ الايام شي فالمرض لي كتر عليه و ماعارفش سبابو ، البعض ف حبو و البعض الأخر شهوتو ، من غير مراد لي كان جالس كيتنهد و كيفكر فأمور خدمتو ، شوية و هو يعلي راسو و حنحن قاطع عليهم  جبل من الافكار فوق رأسهم  ، علاو عينيهم كيشوفو فيه و كيستناواه ينطق هو رشف من قهوتو و شبك يديه و تكلم

مراد: سحر عصام يوسف و سلمان ، الكلام موجه ليكم ( كلهم علاو حاجبهم كيساينو شنو يقول و شنو الحاجة لي جامعاهم بربعة هو تنهد و كمل) ، من النهار لي تجمعتو أنا قلت و أخيرا جاا لي يعاوني فالخدمة و يهز عليا الحمل و لكن للاسف كانشوف كل واحد فين شاغل راسو و كلكم مركزين غير علا خدمتكم الفردية حتى واحد مامسوق للشركة الام لي هي الساس د كاع شركاتكم ( جا عصام يتكلم و هو قاطعو ) خليني نكمل هدرتي ، خسكم تعرفو بلي هاد المجموعة را فنينا فيها شبابنا و جفينا فيها دمنا و قوتنا أنا و خويا الله يرحمو باش تكون بالشكل لي شايفينها بيه ، خلفناكم و كبرناكم و حنا كلنا أمل أنكم غادي تهزو علينا الحمل ملي غادي نكبرو ، و لكن دابا كانشوف بلي طاقتي بدات كتنفذ و حتى شعر راسي شعل بالشيب و لكن لا من معين ، شنو دوركم إذا مادرتوش يدكم ف يد بعضكم و هزيتو علينا الشركات ، الخدمة كتيرة و أنا و ياسين بوحدنا هازينها ، واش نتكلف بالإدارة و لا بالمشاريع لي باديين و لا لي قرابين يبداو منهم مشروع فهد لي غابر و ما علابالوش أممم  ؟

أماني شافت الهضرة تحولت ىجدية فوجههم و هي
تنطق : ولكن أعمي مايمك...

مراد قطعها بحدة : من الأحسن ماتتدخليش فهاد الأمور أبنتي حيت ماغادي يعجبك حال ، نتي ماعندك دخل فأمور خدمتنا ( هي سرطات ريقها حاسة براسها تقمعات و فالداخل ديالها كتتمنى مايوقعش لي على بالها ، واخا مرتاحة نسبيا حيت حتى إذا وقع و خدمو مع بعضهم هي مسيطرة على الأمور من جميع النواحي) ،

  المهم كيف ما قلتلكم كاينين بزااف د المشاريع و بينهم واحد مهم ديال إعادة هيكلة مجموعة ديال المستشفيات غادي تقسمو الخدمة بيناتكم كل واحد باش غادي يتكلف على حسب خبرتو و مجال خدمتو و ما نبغي حتى اعتراض ،

سحر تنهدات بقلة صبر ، هي أصلا مايمكنش تعتارض على شي حاجة كتخص مستقبل العائلة ، ولكن كانت شبه متأكدة بلي عصام غادي يرفض حيت النهار لي جات و هضرو فالمكتب ، كان قال بلي ماغايعاودش يحط يدو ف شي حاجة كتخص الشركة و هي عارفاه ماشي من النوع لي يتراجع على كلمتو واخا يوقع لي وقع...

عصام تنهد بدورو واخا ماحاملش فكرة يخدم معاها فنفس البلاصة و لكن حتى هو عندو مستقبل الشركات أهم حاجة :أوكي أنا موافق بصح خسنا نوقفو على شغالنا ما يمكنش الحمل كلو عليكم غير نتوما بجوج و حنا كل واحد فين عاطي الراس خصوصا شي وحدين ( وجه هضرتو ل سحر )

.أماني زيرات يديها حاسة بالفقصة ، أما سحر علات حاجبها باستغراب كتشوف فيه ، واش هذا عصام لي كان مكيخرج الهضرة حتى كيضربلها ألف حساب و لكن إذا مشا حتى خرجها مستحيل يتراجع عليها واخا تنطبق السما مع الأرض ، كيفاش تراجع  على كلامو. ياك قال غادي يهز يديه من على الشركات ،تنهدات منزلة عينيها كتدور فراسها يمين و شمال و كتمتم بشوية : باقي تكتشفي بزااف أ سحر ، هذا لي قدامك ماشي هو عصام د الماضي بمرة...

يوسف حتا هو نطق ب حيويتو : حتا أنا معاكم ، صافي شرفتي أ سي مراد و مابقيتيش قاد على الحمل و لكن كون هاني كاين لي يهزو عليك علاش حنا هنا

سحر علات راسها وبتاسمات ابتسامة هادية كتعكس روحها : كون هاني أ عمي البروجي لي كلفتينا بيه غادي يكمل على أحسن وجه

سلمان بدورو وقف و هو كيضحك : أنا بعدا ديما معاكم ، مانقدرش نضيع شي لقطة نكون مجموع فيها مع ولاد خالي و بنت خالي الزوينة (جبدليها حنكها حتى علات راسها كتخنزر فيه )

مراد بتاسم : الصراحة ماخيبتوش ضني فيكم ، عارفكم غادي تكونو قد المسؤولية لي تعطاتلكم ، المهم من هنا ل ساعة نلقاكم كاملين فالشركة كاينين أمور مهمة خسنا نتناقشو عليهم (وقف) ، نخليكم  أنا غادي دابا ( مشا عنق  ذكرى لي ضاحكة و باسها و حتا ياسين ناض باس بليقيس من جبهتها )