العشق السرمدي

الجزء 147

🍒 الفصل الأول: بدونك لا اهوى الوجود

فالبيت

عصااام كيقلب فالدرج بعصبية كبيرة لي جا قدامو كيشعطو ، حتى لقا لي كيقلب عليه جبد المذكرة و هز ستيلو حلها و بدا كيكتب فيها ، أماني غير كتدور حداه كتشوف فيه و تغزز ف ضفار يديها ، شافت فيه بقات مترددة مدة عاد نطقات
أماني : عصااام عرف شنو تكتب و شنو لاا
عصام : هاذا كيبقى شغلي نكتب لي بغيت
أماني : كون متأكد بلي هي دارت بحال هاكا غي باش تطيحك فالفخ وتفرقنا بحال لي حاولات شحال من مرة ، هي مهامها لا خير لا والو، عارفانا كنبغيو بعضنا و بقات فيها الشمتة علاش ما تزوجتيهاش بغات تنتقم ، هاديك لفعة أنا لي عارفاها كيفاش كانت ، هي عمرها كانت بريرة بحال لي كيقولو ، من ديما كتبينلهم الضحكة الصفرة و ملي كيدورو كتستهزئ منهم ( مكايجاوبهاش غير كيكتب ) عصااام وا صافي وريني شنو كتبتي ( سالا الكتابة و شد المذكرة عندو بالساروت و خبعها)
عصام : تقيسيها مانتفاهمش معااك ،
أماني : حبيبي عافاك ماتيقش داكشي لي قالو نتا ذكي ما يمكنش تخليها تضحك عليك
عصام :حتى شي واحد مايقد يضحك عليااا ،(قرب عندها و مد صبعو بشكل تهديد) و نتي كتعرفي شي نهار نسوق الخبار بلي راك ضالماها ب شي حاجة لي نديرولك ماغاديش نقولولك ، أنا كنتصرف هاكا ماشي بناءا على الكلام لي كتقولي ولكن كنتصرف بناءا على الدلائل لي كنشوف
أماني بدات تهبط دموع التماسيح : كتبغي تقول بلي راك مامتيقنيش
عصام : لحد الآن نتي المرى لي كنبغي و نحماق عليها ، كنتيقك آااه و لكن النهار لي نسوق بلي راك كادبة عليا بكلمة و لا ضلمتي ديك البنت بكلمة ، عقابك غادي يكون وخيم معايا أنا ( خلاها و دخل يدوش)
أماني كتدوي مع راسها : لا لاا الأمور بدات تخرج على السيطرة ، خسني نعيط لداك الحمار تعطل عليا بزاااف...

                                        🖤عند سحر🖤
نزلات من الطوموبيل مضروبة جهة راسها و لكن ماشي شي حاجة خطيرة ،الضربة مكانتش قوية ، فداك الساعة جاو عندها لي كارد كيجريو و هي وقفاتهم بالغوااات
سحر: يقرب عندي شي زا*مل اليوم ننحر مو هنا مايسوقلو حد الخبار ، سيرو قولو لعمي راني مزيانة بلا ميبقى يصرد ورايا لي يحضيني بحال شي بنت صغيرة ،
خلاوها و ترجعو اللور ، صوناو لمراد علموه بلي طرى و قاليهم يخليوها على خاطرها حتى تتبرد و هما يبقاو مراقبينها من بعيد.
هي بقات العشية و الليلة كاملة غير كتكمي كتكمي واحد مور آخور مقادراش تمنع راسها فين مكاتسالي واحد كاحس بقلبها غادي يخرج و كتزيد التاني عالله يبرد عليها ، بقات على داك الحالة الليل كلو حتى بدات كتشرق شوية الشمس عاد ديمارات الطوموبيل ريحتها عامرة كارو ، مشات للقصر واخا ماحاملاش ترجعليه ولكن واعدات ذكرى ماتمشيش ، طلعات ديريكت لبيتها دوشات هبطات الريدو و نعسات بعمق

نص الليل فبيت يوسف ناعس فوق الناموسية داير يديه فوق راسو كل مرة كيتحرك ويدور مالاقيش راحتو. عيا يحاول باش ينعس . لكن النعاس حلف لا زارو . ولف ينعسها حداه بين دراعو ينوض بليل يشبعها بوسان وتعناق وتلماس وماينعس حتا ينعسها فوقو ،وليوم حيت بعيدة عليه جاه الأرق . كره ختو براءة وكره علاش رجعت ماكرهش كون بقات تما. بعدا كيلقا كيفاش يخليها تنعس حداه لكن ملي جات براءة . ليليان تعكست عيا يحاول ياجيبها معاه لكن هي راسها قاسح حلفات لا مشات معاه . غير دخلات براءة تنعس دخلت معاها خلاتو مجنن ماباغيش ياخدها بزز حيت عارفها حمقة غادي تبدا تغوت وتدير ليه الشوهة .