العشق السرمدي

الجزء 172

🍒 الفصل الأول: بدونك لا اهوى الوجود

سحر شافت فيه بحزن : علاااش درتي فيا هاكا أ عصاام علاااااااش

شاف فيها معلي حاجبو : شنو درت فيك أناا؟

سحر مابقاتش قادرة تتحمل هضرات بعصبية و هي كتشهق : علااااش كدير فيا هاكا ، شنو ذنبي أنني حبيتك؟. لا ماشي حبيتك نتا لي خليتيني حبيتك أنا كنت طفلة و ماكانعرفش شنو هو الحب نتا لي غرستي فيا هاذ المشاعر نتا لي كبرتيني قبل من وقتي

( دموعها نازلين شلال و هو غير كيشوف فيها ) ضلمتيني بزااف أ عصام أهئ هى هئ أنا مانستاهلش هادشي كلو منك

عصام : هادشي كامل لي كتحسي بيه نتي سبابو أ سحر

سحر : أنا سبابو ؟؟ علاش شكون فينا لي غلطان؟  شكون فينا لي أذى التاني شكون لي باع التاني بلا حتا شي سبب ؟ وااش أنا لي خنتك وااش أنا لي دمرتك ؟ أنا لي نسيتك و مشيت و خليتك

عصام : الحاجة لي متاكد منها هي أنني عمري أديتك

سحر : أنا لي آذاني هو كذبك ووعودك  ليا هئ هئ ؟ ( كتشهق بقهر ) ماكرهتش يرجع الزمان و عمرني نفكر نشوفك ، نتا مكاتستاهلش حبي ليك اهئ اهئ عمري ننسى شكون نتا ، نتا هو الحبل لي تمسكت بيه فالآخر قطعتيه و رميتيني فجرف مضلم بحال هذا لي قدامك اهئ هئ عيييت عييت كنحاول نطلع منو كنلقى راسي مرضوخة فيه من جديد ، (ببكاء و ألم ) كنت هازاك وسط عيني جيتي نتا بيديك عميتيهملي ، كنتي أول حب ليا أ هئ هئ شنو درتلك باش نستاهل منك كل هاذ الأدية

عصاام بقاا ساكت مدة كيفكر دار يديه فجيابو ونطق  : داباا شنو كاتنتااضري مني علااش كتقوليلي هادشي كلو

سحر عيات كتحاول تسرطها ولكن ما قدرتش تصبر ، ضعفها غلب عليها و جا الوقت لي غادي تنفاجر فيه وتبين شخصيتها القديمة لي كانت كتحاول تدفنها ،  هدراات بصراخ و بكاء كتخرج داكشي لي دفناتو فقلبها من سنين : حييت كنبغيييييييييك ( زيرت على يديها بقوة ) ح حييييت عييت نكبح فراسي لكن ما بقيتش قادرة ، آاه بغيتك و باقا كنبغيك و غادي نبقى حياتي كلها كنبغيك ( كتحرك راسها بلا ) و هادشي ماشي بيدي أ هئ هئ ماكرهتش نخرج قلبي و نقطعو ططراف باش مايبقاش يحس بيك

( كتدوي مزيرة على سنانها بقوة ) قول عليا لي بغيتي ، لصقة مدلولة ما عندي نفس غير ما تخلينيش مازال ( سحر تمكن منها الضعف ما بقاتش عارفة شنو كتقول مازال بحالا ماشي هي لي كتدوي ) شد فيدي و خلينا ننساو الماضي و نبداو من جديد أ هئ أ هئ علااش مصر تنهي قصتنا ، علاش مصر عليا تقسى هئ اهئ   ، عصااام أنا بلا بيك كنمووووووت ، جسدي عايش و روحي فتابوت أي حاجة كتفكرني فيك ، أنا ضايعة بلا بيك ( كتمسح دموعها لي نازلين بقوة ) تايهة فدوامة مضلمة كل ما كنحاول نخرج منها كتجرني لعندها

( عصام غير كيشوف فيها ما نطق بحتى كلمة مخليها تخرج لي فقلبها )

اهئ اهئ اهئ واش بصح نستيتيني، نسيتي عشرتنا و أيامنا ،واش بصح ما بقيت كنعنيلك والو؟؟ ( تنهدات بقوة و علات يديها كتمسح فدموعها لي غشاو عينيها ) عصاام أنا باقا ما كبرت أنا باقا كنخاااااف ، باقا ملي كنبغي ننعس كنغطي راسي من الضلام ، أنا باقية بنت صغيرة غير متقمصة شخصية وحدة قوية ، قلت البعد غادي ينسيني ، غادي نكون مرتاحة و أنا بوحدي ولكن لقيت راسي ماقادراش ننساك ( مداتليه يديها ) شدلي فيدي أ عصام و خلينا نبداو من جديد ، غادي ننسى كلشي ، الحاجة لي بغيتها هي تبقى معايا و ماتخلينيش حيت و الله بلا بيك مقادراش نعيش

بقات مادا ليه يديها فالهوا كتنتاذر جوابو

عصام بقاا كيشوف فيها مدة بنضرات غرابين عاد ابتاسم باستهزاء و نطق : هانتي وصلتي لكلامي من ديما كنت كنقول عليك مدلولة و نتي كنتي كتحاولي تبيني العكس ، فين مشات القوة لي كنتي كتسطانعي ،( مغزز على سنانو)  جيتي دابا كتدللي ليا باش نكون ليك ، نمشي معاك و نخون مرتي ، ما ضلمتكش نهار قلت عليك قح*بة حيت فعلا نتي قح*بة

سحر وقفات مشوكية بحالا عاد فاقت من شنو كانت كتقول و شنو كانت كتدير ، مصدومة من راسها ومن هاد الشخصية لي تمكنات منها ,تمتمت بهدوء حيت هاد الهضرة كاملة لي قالت استانزفت
الطاقة ديالها : دابا يجي النهار لي تندم فيه أ عصام لكن يا خسارة مغاتلقانيش فيه ، جاا الوقت لي نودع فيه حياتي لي ما بقيتش قادرة على عذابها ، فرح دابا من اليوم غادي ترتاح مني...

ابتاسمات آخر ابتسامة قربت من الجرف لي تحتو البحر قدام عينيه لي مصدومين ،عصام بغا يقرب عندها لكن هي منعاتو ملي مدات يديها على شكل سطوب و ابتاسمات بحزن وتلاحت من فوق الجرف

#يتبع