Unicode
မင်းမာန်တို့ နေထိုင်ရာ ရပ်ကွက်မှ အထွက် တစ်ဖက်ကားလမ်းရှိ လူ၀င်လူထွက်နည်းသည့် ကော်ဖီဆိုင်လေး၏ ဒုတိယမြောက်အထပ်တွင်ဖြစ်၏ မင်းမာန်ရှေ့ ထိုင်နေသူက Galaxy လုပ်ငန်းစု၏ ဥက္ကဌ ဖြစ်သူဖြစ်သည်။ အသက် ငါးဆယ်ကျော်ခန့်ပင်ရှိပြီ ဖြစ်သည့် ဥက္ကဌ သည် PARAGON လုပ်ငန်းစုနှင့် အပြိုင် အောင်မြင်နေသည့် လုပ်ငန်းစုကြီးကို ဦးဆောင်နေသူဖြစ်ပြီး သားနှစ်ယောက်ဖခင်အဖြစ် နာမည်ယူထားသူလည်းဖြစ်၏ ဖြောင့်မတ်မှန်ကန်သူအဖြစ် ဆရာကိုယ်တိုင်မှတ်ချက်ပြုထားသူဖြစ်၍ မင်းမာန်တလေးတစားဆက်ဆံဖို့ ခေါင်းထဲထည့်သွင်းထားလိုက်သည်။
"မောင်ရင့်ကိုခေါ်တွေ့ဖိုက အဲ့လောက်တောင်ခက်ခဲတာပဲလား"
"ကျွန်တော့်ဆီ တကူးတကလာတွေ့ရတာအတွက် အားနာမိပါတယ် အန်ကယ်"
"လာရင်းအကြောင်းကိုလည်းသိလောက်မယ်ဆိုတော့ လိုရင်းတိုရှင်းပဲပြောကြတာပေါ့"
"ဟုတ်ကဲ့"
"မင်း အိမ်မှာ အန်ကယ့်သားရောက်နေတယ်။ အဲဒါကို အန်ကယ်သိတာကတော့ မင်းနောက်ကို သူလိုက်လာတဲ့ရက်ကတည်းကဆိုပါတော့"
"ဟုတ်ကဲ့"
"သူအိမ်ပြန်လာဖို့ အန်ကယ်အကြိမ်ကြိမ်ကြိုးစားခဲ့ပေမယ့် ဆောင်းဦးက သိပ်ခေါင်းမာတဲ့ကောင်လေး။ သူ့ကိုခေါ်ဖို့လွှတ်လိုက်တဲ့သူမှန်သမျှ ပြန်လာရင် ဒဏ်ရာဒဏ်ချက်တွေနဲ့။ ဒါတွေမောင်ရင့်ကိုပြောပြာရတာကတော့ ကိုယ့်ပေါင်ကိုယ်လှန်ထောင်းသလိုပါပဲ။ မောင်ရင်နောက်ကွယ်က ဆောင်းဦးရဲ့ပုံစံအစစ်အမှန်ကို မောင်ရင်လည်းမသိလောက်ဘူးထင်ပါတယ်။ သူကမောင်ရင့်ရှေ့မှာ ဘယ်တော့မှ သူ့ရဲ့ဆိုးသွမ်းတဲ့ပုံစံကိုမပြဘူးလို့ အန်ကယ့်တပည့်တွေဆီက ပြန်ကြားထားတယ်။ လိုရင်းပြောရရင်တော့ ဒီကောင်လေးက မင်းမမောင်းချမချင်း မင်းအိမ်ပေါ်ကဆင်းမှာမဟုတ်ဘူး။ အဲ့ဒါကြောင့် မင်းဘက်ကပဲစပြီး လုပ်သင့်တာလုပ်ပေးဖို့ အန်ကယ်ကတောင်းဆိုချင်တယ်"
"ကျွန်တော်.............မလုပ်နိုင်ပါဘူး အန်ကယ်"
"အဟင်း......အန်ကယ်က ဒီတောင်းဆိုမှုကို အလကားလာလုပ်တာမဟုတ်ဘူး မောင်ရင်။ မောင်ရင်စိတ်၀င်စားလောက်မယ့် အပေးအယူ......"
