اسكريبتات روان أحمد ♥️

اسكريبت 15

ـ حد يلحقنى بغرررق ،بغررررررق الحقونن
غطست واستسلمت وسبت نفسى للمايه ...
ـ كح كح كح .
ـ انتى بخير يا إسراء .
ـ انا فين انا كنت بغرق ايه اللى حصل ؟
ـ انا اسف انى روحت اشترى اكل واتاخرت عليكى ولولا جيت ولحقتك كنتى غرقتى وبعصبيه :و انا منبه عليكى انك ما تنزليش البحر غير لما اجى علشان انتى مش بتعرفى تعومى .
ـ طب انت متعصب ليه بدل ما تكون خايف لانى كان ممكن اغرق واموت .
ـ ما هو انا خوفت للحظه انك ما تفوفيش بس الحمدلله التنفس الصناعي جاب فايده .
ـ طب الحمد لله انك لحقت وبصراخ ثانيه واحده انت بتقول تنفس صناعى يعنى قصدك ق.قبله ااالحياه .
ـ وبابتسامه برود :ااه .
جاك اوى يقويك يابعيد .
ـ يعنى اخلى حد غريب يعنى يعملها وابن خالك موجود اولى .
ـ اتكسفت وقومت مشيت روحت الشاليه ، يختااى عليا وعلى اللى جابونى كان يوم ابيض يوم ما غرقت ما هى الغلطه غلطتى انا اللى جيت جرى مع خالى ومراته وعياله اول لما قالولى وعرفت ان على طالع معاهم"اصل عيلتى مش بتحب تصيف فـ بطلع مع خالو على طول " .

"انا إسراء عندى 21 سنه فى معهد فنى صحى و جايلى عريس قولت استنى لما اصيف اكون اسوديت وجلد وشى بيقشر يشوفنى يتخض ويطفش ".

صحيت تانى يوم لبست المايوه الاسلامى وخدت العوامه وجريت على البحر ،روحت لقيت خالى ومراته و على واخوه زين دا قلبى من جوه لانى لما بذاكرله بيدينى شوكلاته علشان نطنش المذاكره ونلعب سوا اصله فى اولى اعدادى فاشل زيى 😂،لقيتهم بياكلوا جريت عليهم .
ـ اخس عليكوا بتاكلوا من غيرى .
ـ خالى اتكلم :ما انتى اللى صاحيه العصر نموت من الجوع علشان سيادتك وبعدين ايه اللى حصل امبارح..؟ .
ـ بتوتر و بصيت لـ على بكسوف لقيته بيبتسم ببرود يشيخ جبل جليد متحرك .... محصلش حاجه كنت هغرق وعلى انقذنى .
لقيت خالى ومراته وزين قاموا وجم عليا انتى كويسه مفكيش حاجه .
فى نفسى :الاه هما طلعوا ما يعرفوش اومال ايه اللى حصل امبارح .
ـ بكسوف حاولت اداريه: انا بخير ما تقلقوش الفضل للاخ على انقذنى .
ـ طب الحمد لله انك بخير .
ـ بتوتر :اومال ايه اللى حصل امبارح وكنت بتسال عليه .؟
ـ لا مش حاجه مهمه تعالى كلى علشان ننزل البحر شويه وهنروح .
ـ انا وزين بتذمر :بالله خلينا لبكرا.
ـ على :ويجى بكرا اقولك بعده .
ـ شوفتى يا فوفه ابنك وعمايله.
ـ معلشى يا حببتى هو على كدا هو جديد عليكى يعنى .
ـ طب يالا يا زين ننزل نبلبط شويه فى المايه ونودعها .
ـ يالا يا ياختى ننزل .
لقيت على قام وقال :وانا هاجى معاكوا علشان انتوا الجوز بتغرقوا فى شبر ميه .
ـ خالى :خلى بالك منهم يا على .
=على بغمزه ليا:فى عنيا
ـ نزلنا وقضينا وقت ممتع ولعبنا كوره واول مره اكتشف ان على شهم ودمه خفيف ووعيب عليا اللى بقوله دا ...
روحنا الشاليه وغيرنا وركبنا عربيه خالو وانطلقنا لطريق البيت اللى الصراحه يعنى لم اشتاق إليه بتاتاً .... وعايزه افضل فى المصيف ..
روحت وبعد سلامات ونبع الحنان بقا فتحت اسطوانه انتى اسوديتى البحر سودك وهتقابلى العريس ازاى بمنظرك دا وووووالخ مش بتفصل

بعد اسبوع العتريس جاى انهارده ..
ـ ياله ادخلى قدمى العصير دا ..
ـ دخلت وقعدت وبعد شويه سابونا لوحدنا .
احم... انا خضر عندى 28 سنه والحمد لله معايا وظيفتى وشقتى ...
رفعت عينى علشان اشوف خضر وياريتنى ما رفعت عينى إيه يولا الحلاوه دى اللى يسمع اسمك يقول انك وحش والله ...
فوقت وبصيت بسرعه للارض مكسوفه بقا وكدا وعرفته نفسى وروح ومنتظر الرد مع بابا ..
ـ وطبعا امى ومرات عمى ومرات خالى وام فتحى جارتنا وام مالك صاحبه المحل اللى على اول شارعنا كله بيسالنى انى موافقه ولا لا وكله بيشكر فى العريس اخلاق وادب وشقه وشغلانه عريس لوطه يعنى ..بس انا للاسف مش مرتاحه رغم حلاوه الولا بس نعمل ايه بقا اهم حاجه الراحه ..."طبعا مش هنقول انى بحب على فنقول مش مرتاحه "،بس فعلا انا مش مرتاحه .

وبعد فتره مش طويله .....
اجهزى يالا علشان على جاى يتقدم ..
اتذهلت جاى يتقدم ليا انا .....
ـ دخلت وقعدت وبصيت على الشراب اللى كنت لابساه يختاااى الشراب فيه قطع بس مش باين الحمد لله.
ـ طب ماتسيبك من القطع اللى فى الشراب وخليكى معايا .
ـ وه وانت عرفت منين انا كنت بفكر .
ـ ما انا استنتجت من نظرتك ليه بصيت لقيته مقطوع .
ـ لا ذكى يا عيلوه .
ـ من يومى يابنتى بس انتى اللى مش واخده بالك.
ـ سكتت" هقول انى كنت عارفه الكبيره قبل الصغيره عنه بس هو اللى حلوفه لا يبالى ..."
ـ طبعا انا غنى عن التعريف وانتى كمان ومحتاج اعرف رايك بقا ..؟
ـ فى نفسى 'هو ماله مستعجل ليه دا !!
ـ السكوت علامه الرضا وانا بقول ابن خالك اولى من الغريب ولا ايه
بصيت ليه لقيته بيغمزلى ااه من المش محترم دا..

ـ يا خالى يرضيك ابنك اكل كيس الشيبسى اللى جابهولى امبارح .
ـ ماهى يا بابا قالتلى لو عايزه كُله ولما كلته زعلت .
ـ انا كنت بعزم عزومه مراكبيه لكن انـ... خالى قطع كلامى وزعق...
ـ لااا انا قام وسايبكوا كانى قاعد وسط اطفال مش واحد عاقل ومراته ..
ـ شوفت زعلت خالى ازاى .
ـ وانا مالى حد قالك اشتكى .
ـ طب انا مخصماك هااا .
بعد وقت ...إسرااااااء يا إسراااااء
ـ فى إيه يا على فزعتنى .
ـ طلع كيس الشيبسى من ورا ظهره وقال جبته عائلى علشان ناكل سوااا.
ـ ابتسمت وقولت :سواا مش لوحدك .
ـ ابتسم وقال :سوا سوا يا جميل .

لـ روان احمد.
"انقذتنى من بحار الحياه واغرقتنى فى بحار عيناك 🫀👀"
رأيكم 🧡 .