اليتيمة الهاربة { سيف و ملك } _ باللهجة الجزائرية 🇩🇿 _

بارت 14

سعاد : كي نقولك شدي تشدي
ملك : طاطا معلباليش كيفاش راح نقدر نردلك خيرك
سعاد : متعرفي بلاك يجي نهار و نتي لي تعاونيني
ملك : ان شاء الله

ملك تحكي :

خرجت و شديت تاكسي ؛ حطيت راسي على الكارو نشوف فالطريق الحالة هنا بزاف شابة ..... القدر لي حطني وسط ناس كيما هكا معلباليش واش راهو مخبيلي غدوة بصح راني نحمد ربي صباح و عشية لي طاطا سعاد ناس ملاح وقت قلت خلاص راح نقعد فالضرب و المشاكل ربي فرجها عليا و بعتلي ناس ملاح رفدوني فزمان صعيب وين تلقى فيه واحد يرفدك و يدخلك لدارو ..... دورت وجهي نشوف فالبلاصة لي راح نخدم فيها اذا كتب ربي خلصت التاكسيور و هبطت ؛ طلعت راسي نشوف فيه كان مول و دخلت للحانوت لي راح نخدم فيه  حانوت chic و باين بلي يبيع غير الحاجات الغاليين دخلت وقتها لقيت وحدة تبان قدي مع واحد الجون لابسين حوايج تاع الخدمة كانو سروال مع شوميز تاعو و دايرين كارت مكتوبة فيها اسمواتهم تبسمت معايا الطفلة و جات عندي

نور : تفضلي مادموزال
ملك : يزيد فضلك ؛ شفت لانونص لي دايرينها و تحوسوا فيها على خدامين
نور : اههه ايه ارواحي معايا

داتني معاها دورتني فهداك الحانوت لي كان كبير بزاف حتى وصلت قدام واحد الباب طبطبت و دخلنا وقتها لقينا واحد المراة تبان فالربعين من عمرها دايرة نواضر و حاطة راسها مع واحد الورق

نور : مدام فيروز هادي جات تحوس هنا على خدمة
فيروز : ادخلي

دخلت و قعدت مور ما دارتلي بيدها اقعدي ؛ فهمتني على الخدمة و كلش و بعتتني مع نور باش تكمل توريلي

نور : انا اسمي نور و لي خدام معانا اسمو انيس .... مزالنا نحوسو على خدامين يعني اذا تعرفي كاش واحد حاب يخدم قوليلو بارسكو كيما شفتي الحانوت كبير و الناس يجيو بزاف لهاد المول سما مزال نسحقو خدامين المهم راح نمدلك حوايج تلبسيهم و راح نبداو نستفو هاد السلعة بارسكو كي مزال جديد مزال مسقمنا كلش 
ملك : ايه .... و مدام فيروز ...
نور : هديك هي المسؤولة علينا و على الحانوت فغياب مسيو عبد الكريم و بلاكي تسيي تناقشيها ولا .... بيناتنا مرات يجيوها حوالها تقعد غير تعيط و تاكل فينا

تبسمت و رحت بدلت حوايجي بحكم قالولي تبداي من دوك

.........

و هكذا جاز النهار على ابطالنا ؛ ملك لي حبت خدمتها بزاف و تفاهمت مع انيس و نور عجبها الحال معاهم و كانت خفيفة فخدمتها .... لحقت لعشية و خلاصت خدمة ملك و شدت تاكسي باش يرجعها للدار ......... طول الطريق و هي تسيي تشفى على الطريق باش تولي تروح على رجلها بارسكو متقدرش كل يوم تشد دراهم على سعاد باش تخلص تاكسي  .... وقت قربوا يلحقوا شافت فالجنينة لي جاية قريبة من الحومة دايمن كي تطلع للسطح تنشر الحوايج تشوفها ؛ خزرت فساعتها لقاتها الخمسة و نص

ملك : خويا معليش تحبس هنا

خلصتو و هبطت ؛ و قاعدة تتمشى فهديك الجنينة وقت عيات قعدت فواحد الكرسي تما تنهدت و راحت بتخمامها لبعيد تخمم فلي جاي و فخواتاتها و حالتهم ....... محستش بالوقت حتى لقاتها سبعة غير ربع

ملك : اياه طولت بزاف

ناضت و راحت للدار تمشي بالزربة

ملك : اففف ملك واش راح تقول عليك المراة داخلتلها فهاد الوقت

لحقت لواحد الزنيقة تمشي و شادة بيدها فروبتها اول مرة تخرج و تقعد لهاد الوقت فبلاصة متعرفهاش مليح ..... قلبها ولا يخبط وقت سمعت واحد يهدر معاها ملور

رضا : واش زين

سرعت مشيتها كثر حتى سبقها و قابلها

رضا : وين هاربة
ملك : بعد من قدامي
رضا : و اذا ما بعدتش .... واش راهي دير طفلة وحدها هما
ملك : قتلك بعد

جات راح تروح من الجهة الاخرى رجع حاصرها بيديه

رضا : مديلنا نيميرو نخليوك جوزي

زيرت على يدها و طبعتو

ملك : قتللك بعد
رضا : جامي شفتك هنا وين تسكني
ملك : فجهنم الحمراء وعلاش تحوس وين نسكن ؛ بعد عليا

رجعت للجهة الاخرى رجع حكمها

رضا : غير مكالاه تسيي تعرفي هاد الجهة كامل من الحومة انا و جماعتي لي حاكمينها يعني مكالاه تسيي تهربي راكي تشوفي هداك القاراج تاعنا و دوك لوكان نعيط لصحابي يجيو يشدوك .... غير مكالاه تسيي تهربي

ملك حست دنيا دارت بيها ؛ هنا صح ميرحموكش خافت بزاف و ذبلت عينيها من الخوف

ملك : واش تسحق مني
رضا : قتلك مديلي نيميرو تاعك نطلقك
ملك : معن ... معنديش
رضا : هههه مرانيش نتمسخر معاك
ملك : قتلك معنديش

شدتلو يدو و خبشتها بكامل قوتها ؛ عيط من قوة الوجع و هي راحت تجري حتى يشدها من شعرها

رضا : ******* هكا ديريلي اليوم نقتلك

قاعدة تسيي تجبد روحها مقدرتش اما هو عينيه رجعو حمورا من واش دارت ...... الصوت لي جا موراه خلاه يطرطق عينيه و يدور عند مول الصوت