နဂါးမင်းသား၏ကံကြမ္မာ

အပိုင်း (၁၄) စိတ်ဝိညာဉ်

ဂရုတစိုက်စောင့်ကြည့်နေတဲ့ ယောင်ယောင်ရဲ့တောက်ပတဲ့မျက်လုံးတွေအောက်မှာ ဇူယွမ်ရဲ့ခန္ဓာကိုယ်က နဂါးကခုန်ခြင်းလှုပ်ရှားမှုပုံစံ ၉၈ မျိုးကို အေးအေးဆေးဆေးနဲ့ နောက်ထပ်တစ်ကြိမ် စတင်လှုပ်ရှားလိုက်သည်။ ဒီတစ်ကြိမ်မှာ သူကပိုပြီးအတွေ့အကြုံရှိလာခဲ့ကာ အခုသူ့ရဲ့အသက်ရှူခြင်းနဲ့ အနည်းငယ်ပိုပြီး သဘာဝကျကျချိတ်ဆက်လှုပ်ရှားနိုင်ခဲ့တယ်လို့ ခံစားခဲ့ရသည်။

ဝေါင်း!

နောက်ဆုံးလှုပ်ရှားမှုကို ပြုလုပ်ပြီးသွားခဲ့သလို ဇူယွမ်ရဲ့ပါးစပ်ကဖွင့်ဟလာခဲ့ကာ သူ့ရဲ့ခန္ဓာကိုယ်ထဲကနေ နဂါးအော်သံခပ်သဲ့သဲ့က နောက်တစ်ကြိမ် ပဲ့တင်ရိုက်ခတ်လာခဲ့သည်။ သူ့ရဲ့ခန္ဓာကိုယ်က ချက်ချင်းတုန်ယင်သွားခဲ့ရပြီး မူလချီတွေကသူ့ဆီကို စုဝေးရောက်ရှိလာခဲ့ကာ အဖြူရောင်အလင်းတန်းတစ်ခုအဖြစ်ပြောင်းလဲသွားလျက် တစ်ချက်တည်းနဲ့ ဇူယွမ်ရဲ့ဝါးမျိုခြင်းကို ခံလိုက်ရသည်။

ဝုန်း!

မူလချီတွေ ဝင်ရောက်လာသကဲ့သို့ သူ့ရဲ့ခန္ဓာကိုယ်ကလည်း လောင်ကျွမ်းနေတဲ့ မီးပြင်းဖိုတစ်ခုအလား ခံစားခဲ့လိုက်ရသည်။ ဇူယွမ်ရဲ့ အတွေးတစ်ခုနဲ့အတူ မူလချီတွေက လှိုင်းလုံးတစ်ခုလို သူ့ရဲ့ပထမဆုံးစွမ်းအင်ဝင်ပေါက်ဆီကို တစ်ဟုန်ထိုးတိုးဝင်သွားခဲ့သည်။

ဒီအရာက အမွှေးတိုင်တစ်ဝက်စာထွန်းချိန်သာ ကြာမြင့်ခဲ့ရသည်။

ဇူယွမ်ရဲ့ခန္ဓာကိုယ်မှာ အနီရောင်အလင်းတွေတောက်ပနေခဲ့ပြီး အပူလှိုင်းတစ်ခုအလား သူ့ရဲ့ချွေးတွေကို အငွေ့ပျံပျောက်ကွယ်သွားစေခဲ့သည်။ ပထမဆုံးစွမ်းအင်ဝင်ပေါက်က အနည်းငယ်ပိုပြီးလျော့ပါးလာတာကို ခံစားနိုင်လိုက်ပြီး အပြုံးတစ်ခုက သူ့ရဲ့နှုတ်ခမ်းထောင့်စွန်းမှာ ထွက်ပေါ်လာခဲ့ရသည်။ ခဏအနားယူပြီးတဲ့နောက်မှာ ယောင်ယောင်ရဲ့ စောင့်ကြည့်နေတဲ့မျက်လုံးတွေအောက်မှာပဲ လှုပ်ရှားမှုပုံစံ ၉၈ မျိုးကို နောက်တစ်ကြိမ် စတင်ပြုလုပ်လိုက်သည်။

အချိန်တွေက ကုန်ဆုံးလာခဲ့သလို နဂါးအော်သံခပ်သဲ့သဲ့နှစ်ကြိမ်ကလည်း အောင်မြင်စွာထွက်ပေါ်လာခဲ့သည်။ ဒါကဇူယွမ်အနေနဲ့ သူ့ရဲ့စွမ်းအင်ဝင်ပေါက်တွေကို နှစ်ကြိမ်ထက်ပိုပြီး ထိုးနှက်တိုက်ခိုက်ခဲ့တယ်လို့ ဆိုနိုင်သည်။