•°'•الرواية الأولى من سلسلة منفى العذارى•'°•
رواية بالدارجة المغربية و الاولى من نوعها بطلتها اسم على مسمى ، افروديت ، إلهة الجمال في الأساطير الإغريقية، وهاد الاسم بحال مولاتو كيدل على الجمال و النقاء و الثقة و الشجاعة ....
و لكن !! فاش أفروديت غتط...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
باقا عاقلة نهار كان مواعدنا استاذ الفلسفة بامتحان صعيب و كان كيتحلف علينا ديال الصح ، كنا مخلوعين حتاش ما كاينش اللي كيجيب عندو هو المعدل بالظبط ، كان ديما امتحاناتو مشحرة على الجهد ، داك النهار كان الخميس ، دخلنا للحصة تاعو مع ديك 15:30 ديال العشية ، شدينا بلايصنا كل واحد تقنت في قنت الا الاخوان اللي كينويو على خزيت و كيتجمعو اللور على قبل النقيل ، و لكن معمر شيواحد ما دوزها على هاد الاستاذ ، ولا عمرها تدارت بيه ، و اللي صدمنا فاش دخل ، دوز السكانير على القسم بعينيه و ما بدل تاواحد من بلاصتو ، كتافا بانه يبتاسم بجانبية و يكتب السؤال و حنا كالعادة _حتاش معروف عليه ما كيتزاݣلش على الوقت_ كنا جابدين وراقي مزدوجة كبار معولين على شي موضوع قد السخط و كاتبين التاريخ الهجري و الموافق تاعو للميلادي فالسطر اللول ، و منقزين جوج سطورة و كاتبين الوسط بخط عريض الفرض رقم 2 للاسدوس 2 في مادة الفلسفة و مسطرين عليه ، و في جنب الورقة كاتبين سمياتنا _تماما كيفما كيبغي الاستاذ_ و هزينا عينيها فالطابلو كينتسناوه يكمل ، الساعة كتب سؤال واحد و مشا جلس فالبيرو تاعو
ما هو أصعب حادث قد واجهته؟و كيف تخطيته؟
ننسا اي ردة فعل تاخذتها فشي موقف الا ردة الفعل تاعي مني شفت داك السؤال ، كلشي بقا غا كيشوف ، واش شي بلان جديد هادا ولا كيفاش؟ ما نكدبش عليكم ما فهمنا والو ، تبلونطينا فديك اللحظة ، العيد ماشي كل نهار عند هاد الاستاذ ، و لكن من بعد ديك عشرة الدقايق اللي بقينا مبلونطيين كنحاولو نستوعبو باللي استاذ الفلسفة حط لينا سؤال لا علاقة ليه بالدروس او سؤال واحد جانا ساهل ، فيقتنا النهضة تاعو : واش غنباتو هنا؟كتبو لاباغين تكتبو ديك الساعة تحنينا على وراقينا و الضحكة ضاربة لينا من الودن تالودن ، كل واحد و شنو كتب ها اللي كتب باللي اصعب حاجة وقعات ليه هي فاش خانتو الصاطة تاعو ... فاش صوروه صحابو سكران و لاحوه فالكروبات ... فاش فشل فشي حاجة .... فاش مو ولا باه قالو ليه شي كلمة ... الخ...
عاقلة انه داك النهار كتبت انه اصعب حاجة واجهتها هي الموت تاع الاب تاعي ديك الساعة كنت عايشة حرة و عندي الحق نحدد شناهيا اصعب حاجة تقدر توقع للانسان ، ركزت ديك الساعة على الحوايج اللي كانوا ناقصيني و نسيت الحوايج اللي انا عايشة فيهم و مدى الصعوبة اللي نقدر نعيشها الا مشاو ، ونسيت ان اصعب حاجة تقدر توقع ليا هي انني نستعبد جنسيا و نتحرم من حريتي
~••~
حبوباتي رجعت برواية جديدة و الاولى من نوعها ، ان شاء الله تعجبكم ... و ما تنساوش لي فوت⭐
