سديم.

"گطن"

لحد هسه اذكر فرحتي من گالت امي ان راح يصير عندي اخ واخيرا.. راح يصير عندي سند وشخص اذب حيلي عليه اذا ضاگت بيه الدنيا.

-سديم.

50 Comment + 50 vote = new part.

_______________

6:31 صباحا.
-سديم.

چنا بالمستشفى لان امي اجتها ولادة فجأة صوت صياحها مالي قسم الولادة واني وابوي بالردهة ننتظر المولود الجديد وبيبيتي ام ابوي ومرت عمي الچبير واگفين قريب على باب القسم ينتظرن الحفيد الجديد للعائلة واخوي الوحيد الي راح يشرفني بالدنيا.

الخوف اخذ نصيبه من كل ركن بجسمي لان صوت امي چان طاغي على كل الاصوات بغرفة الولادة المفروض اني اهدي ابوي بس اختلف الوضع وصار ابوي هو الي يهديني من لاحظ رجفة ايدي وهز رجلي بكل توتر.

مرت نص ساعة او اكثر ما حسبت الوگت لان حسيت كل دقيقة تسحب روحي من الخوف واخيرا طلعت الدكتورة المختصة لامي والابتسامه شاگه حلكها "مبروك عيني يتربه بعزكم الطفل بخير وامه بخير هسه فد شوية ونطلعهم بغرفة".

صوت الهلاهل مال مرت عمي وبيبيتي مله المستشفى والابتسامه شگت وجهي اخيرا بعد 13 سنه صار عندي اخ صغير اهتم بي واعتني بي وهم يسندني من اكبر بالعمر.

حضنت ابوي وبيبيتي وكل شخص اعرفه من فرحتي باخوي رحنا انا وابوي نسجل البيان چنه نفكر باسم وفجأة نطقت باول اسم اجه بالي."يابة سمي سند انتظرنه هواي علموده".

ابتسم ابوي وباوعلي بطرف عينه شوية قبل لا يكتب اسم سند بالبيان "اني الي انتظرته لو انته الي فجرت راسي بانتظارك اله؟".

ضحكت واني اشوف ابوي يكمل يملي البيان عفته ورحت لغرفة امي بالمستشفى متحمس اشوف اخوي لشدة ضليت اتنهد كل خمس دقايق من التوتر.

وصلت لطابق الي بي غرفة امي واول ما دخلت لغرفتها شفت بيبيتي وعمتي كاعدات على القنفة القريبة من الغرة كونه اصلا بمستشفى اهلي وغرفة خاصة ومرتبه.. وجه امي جان اصفر و واضح تعبانه "يا هلا بالغالية" حچت اجذب نظرها عن سند وهي فورا التفت الي بابتسامه چبيرة.

رحت يمها وحضنتها ضليت ابوس بايدها واغازلها بشكل مبتذ علمود تبتسم شوية ويروح عنها التعب "سديم وليدي شنو سميتوا اخوك؟".

ابتسمت بقوة وبست ايدها "سميته سند يمه اسم على مسمى راح يتربى على ايدي واخلي سند النه بس يكبر يصير رجال سبع".

ابتسمت وتقربت اشوف كلكوت القريب على سدية المستشفى وحطته بين اديه "هذا سند امانه بيدك يمه ابد لا تعوفه ولا تخلي شي يصيبه كلنا هلكنا علموده".