#ج١
١____٢
البارت الأول
من منكم لا يملك عائلة
اب
ام
اخ
اخت
بيت دافئ خارجياً ومن خلف اسواره اسرار لا يعلم بيها سوى افراده
من منكم لا يواجه مشاكل في حياته
خبث
حقد
حسد
غيرة
انانية
جشع
طمع
اعداء يتربصون له في كل ومكان وزمان ليحاسبوه على اخطاءه واخطاء غيره
من منكم لا يملك جراحاً موجعة
خذلان
نيران
طعن
قتل
سكين مغروسة بـ دقة
دماء تسيل من القلب قبل البدن وفي كل يوم يجد قريباً او بعيد يمر من جانبه ليرشق الملح على جراحه ثم يرحل كـ من لم يفعل شيء قط
تعالوا معنا.....
لـ نفتح لكم بيبان احد البيوت العراقية
باباً لطالما حلفوا به وبالذين يقنطون خلفه متناسين بل متجاهلين ما يحدث داخله من ظلمٍ وجورٍ وحقدٍ وضغينة
الحـلةة (بـابـل) 2012/1/12
الـساعـةة 7:10 صباحاً
غيداء.. يمة تعالي خلي لگمة بحلگچ قبل لترحين
ادري شلون تمتحنين وانتِ على لحم بطنچ مو حتى دماغچ ميستلم بعد
غسق.. ماما ما الحگ
الخط وصل ولازم نفتر ع البنات هاي كية مو تكسي
مسلم.. وشبيها الكية ست غسق
اذا ما عاجبتچ گولي حتى ابطلچ منها واخليچ ترحين للجامعة مشي هم رياضة من الصباحيات حتى يخف وزنچ وهم توفرين علية
غسق.. لا بابا تعجبني ليش متعجبني يعني
عفتهم وطلعت
واگفلي ع الكلمة حسرة اتنفس وياهم
حچاية واختها ذبلي بسمار على وزني ادري قابل اني خلقت نفسي هيچ لو الله خالقني
شجن.. ها سقة شبيچ تدردمين من الصبح
غسق.. شو تدني خلي اگعد يمعودة
- اگعدي يمچ لأن فاطمة متداوم اليوم
- بعد احسن
- طبعاً حتى تاخذين راحتچ
يا دوب يكفيچ كرسي نفرين انتِ وهالشحم هذا هههه
- شجن تسكتين لو لااااا
- شبيچ متتحاچين داتشاقى وياچ
- ما احب الشقى بهالموضوع
واتصور انتِ تعرفين هالشي كلش زين
- مراح اناقشچ هسه
راجعي للأمتحان ومن نكمل نحچي بلكي تغيرين من نفسچ شوية
- ما اريد احچي ولا اريد اغير من نفسي ارتاحيتي
- مو بكيفچ
ولتلغين كافي اريد اراجع المادة راح ارسب من وراچ
باوعتلها صفح وفتحت الملزمة
بديت اراجع وياها وصار الوقت يمشي ما حسيت إلا واحنه بباب الجامعة
كملت الامتحانات وطلعت
رحت للنادي اراجع اجوبتي بين متجي شجن ربع ساعة وشفتها دخلت من الباب
- يعني ما گدرتي إلا تاكلين
چان انتظرتيني اجي ونطلب الاكل سوة لو البيچ ميخليچ
- جوعانة هاي شجاچ
مماكلة شي من البارحة لليوم وترديني انتظرچ
- اي عادي اني هم مماكلة
وعندي استعداد ابقى بلا اكل لحد منرجع للبيت بس المشكلة بيچ انتِ مو بلأكل ترى
- شجن ليش تحاچيني هالشكل
يعني بهاي تصرفاتچ راح تخليني ابعد عنچ لأنچ متفرقين عنهم شي وبنفس اسلوبهم دتجرحيني
- سقة انتِ تدرين بيه شگد احبچ لو لا
- والله صرت اشك انتِ تحبيني
- انچبي عاد
ترى اني من احچي متعمدة حتى تضوجين وتصحين على نفسچ بلكي تتغيرين شوية
يعني عاجبچ وضعچ هذا
عاجبتچ قلة الثقة بالنفس والكلام الجارح التسمعي يومية من فلان وعلان
لو الملابس التحتارين بيها
فوگ ما اهلچ نقة وميعجبهم العجب سمنچ هذا المخرب حتى جمالچ وممخليچ تعيشين حالچ حال كل البنات المن عمرچ
اصحي غسق
ترى مو صعبة والله تگدرين تنزلين وزنچ واني مستعده اساعدچ شگد متردين بس اقتنعي وابدي بالرجيم
- المن يمعودة
ليش هم بيت عمچ يخلوني اتنفس شو واحدهم عبالك شمر لا بالوجه نور ولا بالگلب رحمة
- الچ
للأنسان الراح ترتبطين بي بعد فترة
- وهذا يا غبي راح يباوع الوحدة مثلي
- انتِ ضعفي وشوفي شراح تصيرين
والنبي كل بنات الجامعة يگومن يتحسرن على جمالچ وگولي بت عمي گالت
- الله كريم
- شنو يعني وافقتي تسوين رجيم
- الله كريم
- راح اضربچ على وجهچ والله
اكو واحد يگول رب العالمين بخيل طبعاً كريم بس اريد جواب يشفي الگلب
- اي اسوي
بس مو هسه بالصيف
- وشمعنى بالصيف
- هسه باردة والليل طويل
- واذا ؟!!
- لچ اجوع
الليل كله بس اكل عبالك معدتي مزروفة
- هههه عمي الله يساعدها المعدتچ
اليگول بير شگد ما تخزنين بي ميفول ولا يشبع
- رجعنا للتصنيف ترى والله ابطل وما اضعف
- لا لا سكتت
اوگفي موبايلي ديدگ يمكن اخوچ
- يلا ردي حتى اخلص من لسانچ
- ها سيف
اي الحمد لله جاوبت واختك هم مبين مجاوبه لأن نفسها مفتوحة ع الأكل
- كافي سخافة
- هههههه
لا مو يمك دتحچي علية
اي حبيبي نص ساعة ونرجع بين ميكملن باقي البنات
ماشي ان شاء الله اخابرك
واني هم احبك حياتي الله وياك
بقينا نسولف اكثر من نص ساعة
وراها اجن البنات ورجعنا للبيت صليت وتغديت وبديت اقرا للأمتحان الجاي
للعصر صبيت الچاي ورحت للصالة
چان بابا گاعد يحچي بالموبايل بس عصبي ما عرفت ليش ولا اهتميت اصلاً
اخذت ملزمتي وگعدت يم الصوبة
بـ ايدي الكعك وگدامي الچاي اكل واقرا
سمعت زمان يقلد علية
سويت نفسي ما اسمعة بس لح هواي لحد ما ضوجني
زمان.. كافي تاكلين مو راح تصيرين فيل
يوسف.. ههههه
ليش هي بعدها مصارت فيل بشرفك
