جاكيت اصفر

هو ايه اللي حصل

انا مريم من دمياط كان حلمي من وانا صغيرة اني اطلع مهندسة كبرت ودخلت كلية الهندسة واتخرجت وقررت ان أحقق حلمي وجاتلي فرصة عمري بس كان لازم اسافر الي القاهرة عشان استلم الشغل بس المشكلة كانت في ماما
انا : يا ماما والله دي فرصة عمري ده حلمي من وانا صغيرة مش هينفع اتخلي عنه وانتٍ اكتر واحدة عارفة كده كويس .
ماما : مش هينفع يا مريم ازاي هتروح تعيشي لوحدك وكمان في مكان محدش يعرفه كل ده علشان شغل .
انا : متخافيش يا ماما انا عندي واحدة صحبتي هناك اسمها سلمي بنت طنط مني جارتنا اللي كانوا ساكنين قدامنا زمان فكراهم.
ماما : اه فكراهم بس مش هينفع .
انا : يا ماما دي فرصتي إن حلمي يتحقق.
ماما : خلاص ماشي يا مريم بس خالي بالك من نفسك وطمنيني عليكي كل شوية .

وروحت القاهرة عشان استلم الشغل واستلمته واجرت شقة جنب شغلي وزهقت شوية قولت اروح اتمشى في الجنينة اللي جنبي واهو افك عن نفسي شوية .

بتمشي في الجنينة فجأه في صوت ورايا بصيت مفيش حد و قولت بيتهيألي كملت تمشية ولقيت محل بتاع ايس كريم وقولت اشتري وجبت ايس كريم جيت عشان أحاسب
بياع الايس كريم : مدفوع يا فندم
استغربت أنا محدش يعرفني في الجنينة .
انا: معلش مين الي دفع .
بياع الايس كريم: الأستاذة اللي واقفة برة لابسة جاكت اصفر .
طلعت ادفعلها الفلوس لاقتها شكلها غريب اوي ( وشها في حروق ومغطية وشها بشعرها الأسود ) .
انا : حضرتك مين ، هو انتي تعرفيني.
بصت لي مرة واحدة وقالت
البنت : طبعا مين ميعرفش أشهر مهندسة  (اللي هو شغلي الجديد).
لسه هسأل تاني لاقتها طلعت بخاخة ورشت في وشي وقتها حسيت ان الدنيا في عيني بتسود ومحستش بنفسي .

فتحت عيني لقيت نفسي في بيتي(كان الوقت بليل) ومش فاكرة حاجة .
انا: ايه ده ايه اللي حصل انا مش فاكرة ...اه ...راسي. بصيت علي دراعي لقيت مكتوب جاكيت اصفر .
انا : ده ايه الهبل اللي مكتوب علي دراعي ده ومين اصلا اللي كتبه .
دخلت اخدت دش عشان انام عشان كنت نعسانة بس لاحظت أن الجملة لسه موجودة.
انا؛ ده ايه ده هي مش بتتمسح هقوم اجيب منديل ( جربت مرة )
انا : هي مش بيطلع ليه ....اوف بقي .. ده مين الغلس اللي بيهزر معايا كده.
( ومره واحدة افتكرت البنت )
انا : كانت مين البنت دي هبقي اسأل عليها بكرة الراجل بتاع الايس كريم هو اكيد يعرف اغلب الناس هناك .

جه الصبح وبدأت لبس عشان اروح الجنينة واشوف بياع الايس كريم .
انا : صباح الخير .. حضرتك عامل ايه .
بياع الايس كريم : صباح الخير يا فندم تطلبي ايه .
انا : شكرا كنت عايزة أسألك علي حاجة .
بياع الايس كريم : اتفضلي يا فندم .
انا : كانت في بنت كده ادفعتلي حساب الايس كريم امبارح هو حضرتك تعرف مين البنت دي
( البياع سكت شوية وقال )
بياع الايس كريم : بنت مين يا فندم حضرتك مجتيش هنا امبارح.
انا : ( ضحكة سخرية ) ازاي انا كنت هنا امبارح وفي بنت جات ودفعتلي الحساب حتي بالإمارة كانت لابسة جاكت اصفر .
بياع الايس كريم : (بصلي باستغراب وقال ) امبارح ازاي يا فندم حضرتك اخر مره جيتي فيها هنا كان من اسبوع .
انا : اسبوع ازاي ده.. بقولك انا كنت هنا امبارح .
بياع الايس كريم : طب ثواني كده .. يا حسين ..يا حسين .
حسين : ايوه يا استاذ .
بياع الايس كريم : هو انت شوفت الآنسة دي امبارح .
حسين : لا والله يا استاذ .. اخر مره شوفنا الآنسة دي كان الأسبوع اللي فات .
انا : طب تمام .

روحت البيت ودماغي شغالة في اللي حصل
انا : هما ازاي شافوني من اسبوع وانا كنت عندهم امبارح اكيد بيهزروا .. هروح اتصل بماما اطمنها عليا .
انا : ازيك يا ماما عاملة ايه .
ماما : انتٍ فين يا مريم بتصل بيكي من بدري .
انا : انا معايا التليفون طول اليوم بس انتٍ مرنتيش عليا خالص النهارده.
ماما : النهارده ايه انا بقالي اسبوع برن عليكي وانتٍ مش بتردي عليا هو انتٍ كويسة؟.
انا : اه يا ماما انا كويسة .

بعد ما كلمت ماما وقفلت معاها بقيت محتارة اكتر في حوار الاسبوع ده قومت اتصلت بسلمي صحبتي .

انا : ازيك يا سلمي عاملة ايه .
سلمي : اخيراً حنيتي علينا ورديتي .
انا : ليه يا بنتي في ايه .
سلمي : في ايه! .. ده انا برن عليكي من اسبوع وانتٍ مش بتردي عليا انتٍ نستينا خالص من ساعت ما اشتغلتي الشغلانة دي هو انتٍ اتكبرتي علينا ولا ايه
انا : اتكبرت عليكوا في ايه بس لا مفيش حاجة .. بقولك ايه انا هقفل دلوقتي علشان الدلفيري وصل.
سلمي : بس خلاص ماشي سلام .

روحت استلم الاوردر وقفلت الباب و قولت ادخل المطبخ اجيب طبق وكوباية ومعلقة عشان ابدء اكل بس لما دخلت المطبخ انصدمت من اللي شوفته .