الهَواجس

الحـلقة الثـانية والعشـرون

الكـاتبة شهـد 🖤

‏وأرضُ الله واسعة ، بأنحائها ، بفرصها ، بالبدائل والخيارات والعوض ، وبالأحبّة .

____________________________

حمزة..

گاعد بغرفتي افكاري مشوشة كل الي يصير خارج طاقتي زواجي منها والمشاكل الي اجت بعد الزواج وجهها المشوه بالضرب مايروح من بالي..

اوقات احمل نفسي مسؤولية الي صار بيها واگول كان لازم اني اتصرف بدون تهور وبدون ما اخلي الموضوع يوصل لأهلها وارجع اناقض نفسي واگول تستاهل لأن خانت ثقة اهلها وخانتني حتى لو علاقتنا متوترة ما توصل لدرجة تخوني ..

كلها بجهة والي صار بأختها بجهة ثانية معقولة ما حست بذنب اختها انتهت حياتها ماكو مستقبل الها بعد بسببها وبسبب الي سوته بيها..

قطع سلسلة افكاري دخول الينا للغرفة واگفة بنهاية الچرباية وايدها على خصرها وضحكة على وجهها..

-شبيچ شارگة الحلگ

-ميصير اضحك للدنيا يعني

-لا اضحكي عادي بس انتبهي لا تعفطلچ

-حمزة ما تبطل سوالفك

بعدت عيوني عنها رجعت صافن بالسگف..

-لا ما ابطلهن عندچ مانع

-اي عندي

-خوش ابلعيه

ضحكت بدلال وتقربت گعدت بصفي وگالت..

-سمعت ابوك يسولف ويه امك بالصالة على ست روند

-اممم

-ماتريد تعرف شسولفوا

-اول وتالي راح تحچين انتِ

-راح يطلگوها منك

فزيت بسرعة من نومتي وصحت بوجهها من الخوف وگفت مبتعدة عني...

-شلووون بالله شلوون عيدي

-هاي شبيك حمزة خوفتني

-احچي بسرعة شسمعتي منهم

-الي افتهمته عمك متصل بأبوك وگايله راح ينطي روند حتى يرجعون اختها ويطلگونها منك

ركضت بسرعة روحي فرفحت من القهر شنو وحدهم يقررون ماريد اطلگ مو بكيفهم ...

نزلت الدرج بسرعة واني اصيح ..

-يابه شنو هالحچي هذا اني ما اطلگ لو اية تنزل بيها بنت عمي ما اعوفها...

وگف ابوي صاح بوجهي ومحروگ دمه..

-وهسه عرفت بنت عمك من ضربتها وسحلتها سحل ومسحت بكرامتها الگاع وتزوجت عليها بيوم عرسها ما چانت بنت عمك جبتها من الشارع لك سا***

-اي غلطت وضربتها بس ما توصل للطلاگ

تقدم مني بسرعة رافع اصبعه بغضب متحلف..