الهَواجس

الحـلقة الرابـعة والعشـرين

الكـاتبة شهـد 🖤

‏وأرضُ الله واسعة ، بأنحائها ، بفرصها ، بالبدائل والخيارات والعوض ، وبالأحبّة .

____________________________

رقية

مر اسبوع على غياب روند من البيت الوضع من سيء للأسوء امي دمعتها ما تنشف تگوم وتگعد تصيح روند لو تصيح جبت وحدة وضيعت الثانية...

ابوية وضعه غريب يروح للشغل واخواني مثله ما حسيتهم متأثرين غير من سمعته يبچي مرة من المرات ويه امي وحدهم و واحد يلوم الثاني...

غيث كان اكثر شخص متضرر بعد امي يفوت ويطلع يحچي على حمزة وانهم غلطوا من سمعوا كلامه..

الي عرفته من كلامهم حمزة متخبل مايعرف ليل او نهار كل هالأسبوع يطلع يدور عليها بنفس الشارع الي فاتت منها سيارة هذاك الشخص..

بيوم من ايام هذا الأسبوع الي مر دخل حمزة للبيت بعد ما دخله محمد للمضيف وگاعدين اني وامي بالغرفة مالتها احاول اخفف عنها دخل محمد علينا وبسرعة گال ..

-رقية سوي چاي حمزة هنا ومنتضرين ابوي يجي

هزيت راسي وگمت واكفة ع الطباخ اسوي چاي وفكري كله بوضعنا المخربط بس الله يعلم شگد شايلة حقد بگلبي على روند بس بنفس الوقت ما اريد اهلي يتأذون بسببها..

اريدها ترجع لحمزة ونخلص من كل هذا الهم الي اجه لحياتنا بدون انذار..
مرات احس اكو شي غلط صاير..
شلون تعرفت عليه؟
شلون حبها لهالدرجة؟
شلون توصله اخبارها؟

روند كانت ابداً مو راعية طلعات و ونسة ولا هي طالبة مدرسة حتى تتعرف عليه ولا عدها موبايل حتى نگول عرفته من النت منو هذا لعد وشلون صار كل هالشي بدون مانعرف؟

صحيت على نفسي الچاي يفور ع الطباخ وصخه كله واني بغير عالم..

بسرعة شلت الچاي وجبت منشفة انشف الطباخ وانضفه من خلصت حطيت الصينية ورتبتها ورحت للمضيف اوديلهم الچاي..

دخلت للمضيف الصينية بأيدي وعيوني عليها اخاف ينكب الچاي وامشي على كيف عبالك ماشية على بيض طبيت وسلمت بدون ما انتبه منو موجود ..

-شلونك حمزة

ويه كلمتي رفعت راسي اباوعله واجت عيني على شخص غريب اول مرة اشوفه رجفت من الخوف درت وجهي على محمد خزرني بسرعة طلعت اركض والصينية بعدها بأيدي وكل الاستكانات باقيات للنص من الركضة مالتي..

فتت للمطبخ ارجف والطم على وجهي...

-عزه بعينج رقية عزه بعينج يايمه شلون فشلة الله يطيح حظچ..

اجه وراي محمد يركض صاك سنونه ويحچي يعصبية وبأصبعه ينقر على راسي..

-ماتعرفين تدگين الباب ايدچ مكسورة طبيتي چفت دماغ سزز..