الهَواجس

الحـلقة السـادسة والعشـرين

الكـاتبة شهـد 🖤

‌‌‏لست أنا، ‌‎إنما الأيام ‌‎من يصعب عليها المُضي ‌‎بعدم وجودك، ‌‎إنّها تَحن.

____________________________

روند

يمكن الحياة حالفة تصدمني بكل شخص قريب مني وكل شخص احسه يحبني وراح يكون سند ومعين اليه انصدم بالأخير بشي ينزلني من السما للگاع...

نربط لساني وضاع الكلام مني بلحظة من شفت شاشة الموبايل مفتوحة على حساب فيس كذبت نفسي ورجفتي وگلت مستحيل لا مو معقولة اكيد اكو شي غلط بالموضوع..

عيوني مفتوحة بصدمة ودمعتي احس جمدت ما ترضى تنزل رفعت وجهي وعيوني تعلگت بعيونه احاول الگه الحقيقة بيهن نطقت والكلمة گوه تطلع مني..

-ش شنو يعني م منين تعرف سارة انت سارة صديقتي منين تعرفها

نزل عيونه بسرعة من نزلت دمعتي وگال..

-اني الي چنت اراسلچ من الحساب

-شلون بس فهمني يعني سارة موجودة مو يعني اني عندي صديقة اسمها سارة وانت چنت تاخذ الحساب تراسل منه

احچي وصوتي يرجف مو بس صوتي جسمي كله يرجف اريد امل اتعلق بيه اريد صديقتي الي چنت احچيلها كل شي ما اريد انخذل منها هم ..

بس كل آمالي انتهت من هز راسه ينفي كلامي تهسترت وگفت اضرب بيه بكل قوتي وهو على وگفته ما اهتم اصلاً اضرب واصيح..

-ليش سويت هيچ ليش بس هي چانت تفهمني بس هي الي چانت اطلع كل شي بگلبي الها بدون ما اهتم طلعت حتى هي چذب ونفاق مثلك...

لزم اديني ثنينهن مانعني من ضربه دفعني وگعدني ع التخم يحچي بصوت هامس..

-بس افهمچ والله كل شي صار صدفة وما الي ايد بيه

-شنو الصدفة چذبك وخداعك اليه مو هذا صدفة قصدك

-روند بس انطيني مجال اشرحلچ..

سكتت طاقتي كلها خلصت شعور الغدر كلش صعب صح عرفتها لمدة ثلاث اسابيع بس كلش تعلقت بيها وحطت املي بيها لأنها الصديقة الوحيدة الي دخلت بحياتي سمعت كل همومي بدون ملل چنت انطيها كل التفاصيل الي تصير بأيامي وهو استغل هالشي لمصلحته...

-انتِ الي دزيتي الطلب

صرخت مقاطعته -عباااالي بنيةةة

هز راسه بسرعة وكمل..

-بس اصبريلي افهمچ وحدة وحدة لا تعصبين ولا تصيحين مو زين على عينچ..

ضحكت بأستخفاف -يووه كلش مهتم

اخذ نفس -الحساب مو اليه لجيهان وصارت مشكلة بيه واخذته منها وره يومين دزيتي الطلب..

-هه وتريدني اصدگك بعد كل هاي السوالف