الهَواجس

الحـلقة الثـلاثون

الكـاتبة شهـد 🖤

لنمضي معًا
‏سيرًا في هذِه الحياة
‏لنستلقي معًا متعبانِ
‏من ضجيج الحياة ،
‏حتى يشرقُ علينا
‏قمران ، قمرُ عينيك
‏وإبتسامتك الزاهيِّة ..

____________________________

روند

بلعت ريگي من التوتر والخوف عيوني على غيث الي ترك الباب مفتوح وراح منتضرني اطلع وراه..

عيني ع الجنطة بيها الموبايل حسيت نفسي اريده اريد اسمع صوته اريده يطمني ويگلي كلشي تمام وكله راح يصير مثل ما هو يريد..

ضليت اعيد بيني وبين نفسي شنو گالي اسوي الخوف وصل بيه اعيد حتى الغزل الي گاله الي..

حسيت مرتاحة شوية حطيت ايدي على گلبي امسده واردد الكلمات الي كل ما احس نفسي متأذية من شي اگولها..

اللهم تولى قلبي بما انت اعلم به..

تحركت نازلة جوا بعد ما رددت كل الكلمات الي ممكن تخليني اسوي الي راح اسويه بدون ما احس بتأنيب الضمير..

حمزة ما يستاهل ارجعله ولا يستاهل احس تجاهه بأي تأنيب لأن أذاني بما فيه الكفاية..
ضرب واهانة وغلط وعلى اقل شي يشك بيه بدون سبب وغير هذا كله يخجل من شكل عيني ويعيرني بيها..

مصعب ابداً ما كان سبب و لا راح يكون قراري بـ ترك حمزة كان قبل ما احس بمشاعر تجاه مصعب ماكو انسانة تتحمل الي تحملته من حمزة ...

وگفت على اخر درجة افكر بالكلام الي گلته بيني وبين نفسي..
شنو مشاعري تجاه مصعب يعني اني حبيته؟
هو يستاهل الحب اي اسلوبه وحنيته وتصرفاته كل شي ينحب بيه بس شلون واني على ذمة شخص ثاني وهالشخص مو اي احد هذا ابن عمي...
هالشي كله حرام حتى لو حمزة أذاني بس مو سبب يخليني اخونه اي اي هاي خيانة...

نزلت واني استغفر ربي احاول افكر بالي راح يصير بهاللحظة وافكر بعدين بقصة مصعب لازم اكو حل ..

رجف جسمي كله رجفة مو طبيعية واني اشوف حمزة گاعد بالمضيف اهلي كلهم گاعدين منتضرين جيتي دخلت گعدت يم امي گوه أجر النفس استغليت هالشي حتى انفذ الي اريده..

تحرك حمزة واگف وگال..

-يلا روند شو ما محضرة نفسچ

-ما اروح وياك عوفني بحالي

نطق بابا بجمود..

-گومي بنتي حضري نفسچ يلا بيت عمچ منتضرينچ يلا بسرعة...

اخذت نفس بقوة من القهر الي تملكني بوقتها وبدأت المسرحية الي درسني ياها مصعب...

ضميت نفسي بحضن ماما انحب وابچي بصوت عالي والرجفة بجسمي كلها بقوة مثل السعفة ارجف وانطق ..

-ماما لا ماما فدوة لا تخلينهم ياخذوني ماما يخطفوني ماما انتِ تحبيني مو اي اي تحبيني لا تخلينهم بس نروح ونطلع من الباب يرجعون يخطفوني هو نفسه هو گال اخطفچ ما اخليچ تتهنين بحياتچ...