مذكرات قاصر

الجزء 1

مرات تستوقفنا جمله بكتاب
صوره نشوفها صدفه
لقطه بمسلسل او فلم
اغنيه
و مرات موسيقى

جنت واكفه بالمطبخ اعجن العجين اخففه ب المي شويه شويه و اعجن
شعري شادته بعصابه والكذله توكع منها كل شويه تبهذلت
اني و اعجن و مخبوصه سمعت المذيعه بالراديو
تكول (اننا محكومون بالامل الخيبات و تشوهات الزمن و الانكسار و الحسره يمحيها الامل احنه مجبورين عليه حته نعيش )

جانت اكو موسيقى ويه كلامها وكفتني عن العجن ضليت واكفه اسمع
تذكرت ابويه و امي من ماتو بانفجار ببغداد

اهل ابويه علمود مشاكل الورث تكاطعو و كلمن اطشر بدوله محد يعرف شي عنهم

وابويه لزم سجل ورثي باسم زوجي لان جنت بعدني قاصر و هو مسؤول عليه الله يرحمه جان حاس حيروح من الدنيا وزع الورث وهو عايش

تذكرت طلعتنا من بغداد بنص الليل بايام العلس والتفجيرات مهزومين لسليمانيه
تذكرت احداث حياتي
زواجي صار واني بعمر 13 سنه
لحد هذا عمري 21 سنه

ابني من مات وهو عمره 5 سنين ملحكت افرح بطفولته
بيومها جان الجو ثلج بسليمانيه مثل كل سنه اطراف سليمانيه ثلوج طول الشتا