تزوجتنى بالبجامه💙🕊
للكاتبه: Besoo
_____________________
كنت ماشى فى المول عادى بجبلى شويه هدوم بس لقيت واحده وقفتنى
هى: بس بس
بلف ليها لقتها بتقولى: تتجوزنى
_نعم
هى: نعم الله عليك يحبيبى هاا بق هتتجوزنى
_بتكلمينى انا يا انسه
هى: بص حواليك كده شايفنى واقفه مع حد غيرك
_لا
هى: وقفت حد غيرك وكلمتو
_لا
هى: اومال هكون بكلم مين الست الوالده
_بت اتلمى انت هتبجحى ولا ايه
هى: لا يبابا ده انا هبهدلك هنا لو مردتش عليا تتجوزنى
_وه
هى: وهين تلاته خمس واهات ريمكس دى جى ام عبير
_بت انتى عبيطه صح سؤال هل انت عبيطه..؟!
هى: جوابى طبعا عبيطه وزوقى يقرف كمان مهو لو ميقرفش مكنتش طلبت منك الجواز يعع زوقى معفن بشكل فظيع
_طب يلاا يا ماما من هناا هشش هشش
هى: انت بتهش فرخه طب والله م انا ماشيه بس كده
_يبت انتى عاوزه ايه من امى
هى: عوزاك توافق اننا نتجوز ونخلف عيل ونغنيلو هيبقا شبهى وشبهك
_مش طبيعيه اقولك انا اللى ماشى
ومشى وهى وراه
هى: استنى يا كابتن استنى يا كاابتن
وقف واتدور
_عاوزه ايه
هى:فراخ بانيه
_شبسى وكراتيه يوو يخربيتك خلتينى اهيس
هى:طب م انت حلوو اهو وليك فى التهييس يخربيتك ده انت طلعت مسخره والله
مسكتها مش قفاها وناا بقولهاا: بت انتى قسماا عظماا لو ممشتيش من هناا هاخدك على القسم
هى: مهو ده اللى ناقص تاخدنى على القسم يا ابن بطهه
_يخربيتك انت تعرفى امى
هى: اعرف عيلتك كلهاا اعرف اختك ابتهال وامك بطهه وانت معتزز ظابط وعندك 32سنه خطبت قبل كده بس فشكلت لما لقتها بتحب فى صاحبك وياعينى كنت واقف فى النص عامل زى قفص الجوافه غيرت رقم تلفونك اربع مرات وبتحب اللون الاسود واكتر حاجه بتكرهها ان حد ياكل لبان قدامك هاا هتوافق ولا لا ولا اروح اجيب لبان واعد اعملك بلالين
معتز: يلاهووى جبتى المعلومات دى كلها عنى منين
هى: البيست فريند بتاعتى لمتلى كل المعلومات دى كانت عايزه تجيب من يوم م اتولدت بس انا قلتلها لا عشان فضايحك اكيد ان الله حليم ستاار المهم يا ميزوو نرجع لموضوعنا الاساسى هنتجوز امتى
معتز: قدامى على القسم يابت قدامى
هى: لا بقولك ايه بلاش القسم تعالى نروح حته بعيده ونشرب قهوه
معتز: اه عنياا هسقيكى القهوه ميرى انماا ايه هسقيكى المر من كعابك
هى: ممكن بلاش كعابى خليها من بطاطى
معتز: هو ايه اللى بطاطك ده يبت
هى: هشش مسمعش صوتك قدامى على القسم يا ميزوو باشاا قدامى
واخدهاا وراحو القسم ودخلها مكتبو
معتز: انت مين اللى وراكى يبت اعترفى
بصت وراها وبصتلوو وقالتلوو: وربناا مفيش حد ورايا يباشاا
معتز: انت هتستهبلى مين شريكك
هى: البت رحمه البست فريند بتاعتى شركتى فى كل الجرايم هى اللى جابتلى كل المعلومات عنك
معتز: اسمهاا رحمه ايه
هى: رحمه محمد رفعت هاتوهاا وادوهاا العلقه التمام وابعتوهالى على الحبس مش انت هتحبسنى برضو ياميزوو
معتز: طبعا يقلب ميزوو بس واضح حبك لصاحبتك اووى
هى:طبعا يبنى دى البست فريند بتاعتى المهم انده على العسكرى يلا عشان ياخدنى على الحبس زى الروايات والافلام بالظبط
معتز: طب ايه رأيك بق انا اللى هوديكى للحبس بنفسى
هى: من اول ما شوفتك وناا عارفه انك هتموت فياا
معتز: صبرنى يارب
هى: على مين
مردش عليها واخدها على الحبس
فى الحبس
بصت وراها لقت ستات باين عليهم مجرمين واحده منهم كانت لسه بتقربلها اتكلمت بسرعه وقالتلها: لا بقولك ايه وربنا لو قربتيلى لقول لميزوو ينفخك هناا اه كلو الا زوجى قره عينى
الست: جوزك
هى: اه اصل حضره الظابط معتز يبقاا جوزى بس حبسنى هنا عشان احنا متخانقين المهم ملقيش معاكى لبان
الست سابتها ومشيت
بعد شويه معتز دخلها وقلها: عنوان صحبتك ايه
هى: تعرف العماره اللى قدام عمارتكم هى ساكنه هناك فى الدور السابع وركز اسمها رحمه محمد رفعت وانا اسمى نور ساكنه فى قلبك وانشاء الله فى شقتك بعد الجواز الله هبقاا انا والبست جران ونقعد طول اليوم سواا ونقطع فى فروه الناس مش مصدقه نفسى يااه حلم جميل بجد
فتح الزنزانه وخرجها ومسكها من هدومها وجرجرهاا وراه على مكتبو
نور: ايدك طيب مهو مش عشان عنيك شبه عنين حسين فهمى هسكتلك يعنى وبعدين حاسب على الجاكيت ده انا جايبااه ب120جنيه بعد مناهده والله لولاا انى قولتلو ان امى معاايا بره مكنش ادهولى بالسعر ده
معتز: افصلى افصلى يخربيتك
نور: طب تتجوزنى واغسلك المواعين
معتز: انتى جايبه التفاهه دى كلها منين
نور: من عند التفهانى ههه عسل عسل انا عارفه ان دمى خفيف والله وبحبنى جداا
معتز: افصلى افصلى صدعت
نور: معاك شاحن
معتز: ليه
نور: عشان لما افصل حطنى على الشاحن خيووخ خيووخ
معتز: ايه خيووخ خيووخ دى
نور: بضحك بس بشياكه
معتز: اترزعى ومسمعلكيش صوت
نور: طب بقولك ايه هاتلى اكل اصل انا هفتانه وجيت على المول جرى لما البت رحمه عرفت من اختك ابتهال اصلها صاحبه اختك ياكشى يولعوو هما الاتنين فى بعض
معتز: انت بتدعى على اختى
نور: م اختك صاحبه البست فريند بتاعتى غايظنى هما الاتنين ولاد الصرمه
معتز: بتشتمى امى
نور: امك مين
معتز: وحيااه امك
نور: وحياه ابوياا
معتز: منك لله يا بعيدة
نور: لا قولى ايه رأيك نعمل الفرح فى قاعه اللؤلؤه
معتز بصدمه: فرح مين
نور: بص كده حواليك فى حد معانا انا وانت بس يبقاا فرح مين ركز كده معايا يا ميزوو
الباب خبط والعسكرى دخل وبيقول: سعاده اللواء محمد بيستأذن انو يخش يافندم
نور: انت اتجننت يبنى دخلوو بسرعه وبصت لمعتز وقالتلو شوفت رديت مكانك اهوو عشان تعرف ان فى بينا حجات مشتركه
العسكرى: ادخلوو يباشاا
معتز: دخلوو يا منصور وبعدين بص لنور وقلها وانت اكتمى مش عايز اسمع صوتك
نور: شوف لو قلت هنتجوز امتى هكتم
معتز: مش هتجوزك ولا هتجوز بعد ما شوفتك
نور: كده طيب
قاطعهم دخول اللواء
نور ابتدت تعيط اول ما دخلت وبتوجه كلامها لمعتز وبتقولو: انت اتغيرت اووى يا معتز طب ليه تعمل فيا كده ليه كل ده عشان حبيتك
اللواء(محمد): فى ايه يبنتى مالكك
معتز: مفيش يافندم دى مجنونه
نور: يرضيك يا عمو بعد ما خلاصقررنا الفرح بتاعنا يوم الخميس يقولى مفيش جوااز بعد ما رضيت بيه ورضيت ان خطوبتنا تبقا على الضيق ومقولتش لحد ومحدش يعرف غير امى يقسى عليا عشان ابوياا ميت ومليش ضهر يرضيك يفشكل بعد ما عملت حسابى على كل حاجه وقولت حتى الفرح على الضيق مش مهم المهم هو وناا بحبوو وقولت انو هيعوضنى عن بابا الله يرحمه
معتز قام وسقف وبيقول: الله يفنانه هايل هايل
اللواء اتكلم وقال: بس يا معتز دى اخرتها وبص لنور وقلها معلش يبنتي الفرح هيتم فى معادوو غصب عنو
نور: شكرا بجد اول مره احس ان بابا موجود بفضل حضرتك
اللواء: على ايه انا زى والدك
معتز: يا فندم
اللواء: بس يا معتز مسمعش صوتك الفرح يوم الخميس ومش هيبقاا على الضيق هيبقاا فى نادى الشرطه وعلى حسابى بص لنور وقلها متزعليش يبنتى انا عندى بنت برضو واللى مرضهوش على بنتى مرضهوش على بنات الناس
معتز: يا فندم استنى اشرحلك
اللواء: بس يا معتز مسمعش صوتك يا حضره الظابط ومشى وسابهم
ونور قعدت وحطت رجل على رجل وقالتلو: قلتلك نتجوز بالزوق احسن كان ايه بق لزومه نستخدم العنف
معتز: انت يا بت يا مجنونه زمان سعاده اللواء بيقول عليا ايه دلوقتى
نور: هشش كل خير انشاءالله وبعدين ميبقاش خلقك كنز كده يا عريس خليك استرتش عشان منتعبش مع بعض فى التعامل
معتز: منك لله يا بعيده انا مصطبح بوش مين انهارده
نور: اقولك ولا تزعلش
بصلها بقرف وقلها: اكتمى يا شلل اكتمى
نور: لا والله لقول انت مصطبح بوش امك
معتز: وحياه امك وانتى بق عرفتى منين
نور: انت متعرفش انت متعلمش يخراشى هو اناا مقولتلكش اصلى مخاويه جن جصير يجولى انى اخووك يفوااز
معتز: بقولك ايه اسكتى وغورى من هناا
نور: وربناا م ماشيه وهلزقلك
معتز: انتى معندكيش اهل يسألو عليكى
نور: تؤتؤ معنديش غير امى وتلاقيهاا نااو بتعملى محشى تعالى اتغداا معاناا وبصراحه مش عايزه اروح عشان متدبسش فى عمايلوو ومش همشى من هنا عير لما توعدنى انك هتيجى الفرح يوم الخميس مش شقتك جاهزه برضو يادوبك ننقل العفش فيها مقدور عليها دى عقبال ما نرجع من شهر العسل تكون اتفرشت بس مقولتليش نحب نعسل فين فى جمصه ولا بالتيم
قرب منها وقعد جمبها وقال: انتى ايه حكايتك وليه مصممه اننا نتجوز كده مش فاهمك وطلعتيلى منين
نور: اولا طلعتلك من المول ثانيا وعد منى هقولك كل حاجه بس بعد فرحنا يا عريس لو عايز تعرف كل حاجه احضر الفرح واتجوزنى
معتز: مش حاضر
نور: طب استأذن انا
وسابته ومشيت وهو متنح
جه يوم الخميس ونور كانت متأكده ان معتز مش جاى
نروح عند معتز كان نايم صحى على صوت جرس الباب قام فتح لقى ناس عندها عضلات كتير كتفووه وحطوه فى عربيه وبعد شويه خرجوه منها وشالو الماسك الاسود اللى كان على وشو ولقى العروسه(نور) واقفه قدامو
نور بتقولو: لازم العنف يعنى يا ابن بطه اديك هتبقا اول عريس يحضر الفرح بتاعو بالبجامه وطلعت كرفته وربطتها على رقبتو وخدتو وراها على القاعه اول ما معتز دخل القاعه لقى امو واختو قاعدين وفرحانين اووى راحت نور مقعداه على الكرسى جمبها وندت وقالت: المأذون بسرعه يلا عشان العريس مستعجل هيموت ويتجوز
معتز بصدمه: ايه اللى بيحصل ده ايه اللى انا شايفه ده مش هتجوزك مش هتجوزك
نور طلعت مسدس وحطتو فى جمب معتز وقالت: قسما عظما لو ممضتش على عقد الجواز واتجوزتنى لأقتلك واقتل نفسى بعديك واكون شهيده الحب ونتقابل فى الجنه
معتز: لا انا هروح جهنم لو الجنه انتى فيها مش عاوزها
نور: هروح وراك مش هسيبك
معتز: منك لله انت مجنونه
نور: ايوا مجنونه بيك يا معتز
جه المأذون ونور لسه حاطه المسدس فى جمب معتز المأذون طلب بطاقه معتز راحت ام معتز حاطه البطاقه قدام المأذون معتز بصلها بأستغراب ومضى لما لقى امو فى صف نور وخلص كتب الكتاب وقضوو الفرح ونور بترقض ومعتز مكشر طبعا
بعد الفرح راحو على الشقه اللى شبه مفروشه معتز قرب منها وقعد جمبها وقال: ادينى اتجوزتك غصب عنى وحققتى حلمك
نور قالتلو: جه الوقت انى انفز الوعد واحكيلك الحوار فاكر من سنتين ولا انت هتفتكر منين م انت ذاكره السمكه
معتز: نعم
نور: متبس بقاا متقاطعنيش خلينى افتكر الذكريات احسن اعضك والله
معتز بسخريه: احكى يا شهر زااد
فلاش بااك
من سنتين نور كانت ماشيه فى شارع بليل وراجعه من شغلها طبعاا نور ممرضه اتعرضلها اتنين وكانو عايزين يهجمو عليها وقتها معتز ظهر زى الابطال وضربهم واطمن عليها ومشى وفى يوم كانت نور عند رحمه (البست فريند بتاعتها) لقت معتز خارج من البلكونه فى العماره اللى فى وش رحمه من ساعتها نور ورحمه بيجمعو عن معتز معلومات ونور اكتشفت انها بتحب معتز ورحمه عرفت من ابتهال(اخت معتز) ان معتز فى المول ساعتها نور راحت واتقدمت لمعتز😂
عوده من الفلاش باك
معتز بغباء: يعنى انت بتحبينى بجد..؟!
نور: لا عملت الفيلم الهندى ده كلو واتجوزتك غصب عشان اتسلى بيك تعرف من يوم م بابا مات ونا مليش غير امى ومن يوم م شوفتك وناا مليش غيرك انت وامى ولما عرفت ان امك بتدورلك على عروسه قولت لازم اتصرف وسعتها بدأت بالهجوم اقصد يعنى اتقدملك فى المول وامك روحتلها وحكتلها على كل حاجه وعرفتها قد ايه انا بحبك عشان كده طلعت البطاقه بتاعتك قدام المأذون اصلها حبتنى اووى بزمتك انا متحبش
معتز ابتسم وعينو دمعت واخدها فى حضنو وقالها: كل الحب ده مخبياه فى قلبك يا مجنونه شكرا على حبك لياا
نور: لا شكر على واجب يسطاا ااا متحضنيش اووى كده لانى حاسه مش عارفه اخد نفسى وبتخنق ابعد عنى كدهه
معتز: مجنونه
نور: عارفه تعالى نشوف امى عاملالنا اكل ايه اصلى جعانه يارب تكون عامله حمام وسابته ومشيت
_____________________
تمت بحمدالله
