حب بعد الزواج

#شريان (بداايهه)

#حب بعد الزواج (8)
#بقلمي : زينب أمير

*بما ان القصهه بتتمحور حول "الحب البجي بعد الزواج "فأنا شويه اتسرعتا في الأحداث وح ادخل طوالي في تفاصيل م بعد الزواج"*

  بعد رحله صامته استمرت ل أربعين دقيقه، صوت المسجل الكان شغال فيهو برنامج بصوت واطي شويه، بروده المكيف، وتوتري الكل شويه كان بزيد، الساعه الوكت داك كانت خمسه الا، نزل وفتح باب كبير، بعدها ركب العربيه وَدخلها جوه،، نزلتا وبقيت واقفه، قفل الباب وجا مشى قدامي كل السمعتو منو،" ارح ادخلي " مشيت شويه ودخلت في ممر ، بعدها وقف ووقفت وراهو ، طلع مفتاح فتح باب البيت، اللي كان عباره عن بيت ارضى مطلي بلون رصاصي من بره، من دخلت لقيت قدامي في هول كبير فيهو كراسي جلوس في النص، كبيره من العصر القديم تحسي بيها، ع جنب في سفره اكل وقريب ليهو ب شويه المطبخ، اشر لي ع غرفه وقال لي بتلقي شنطتك جوه، هزيت ليهو راسي ودخلتا، لقيتها غرفه نوم عاديه والشنطه مركونه بجنب، جريتها وطلعت منها جلباب تلت ارباع واياديهو نص كم،، اخدت شور واتوضيت طوالي، صليت العصر وبقيت قاعده في المصلايه، جاني صوتو وهو بقول في اسمي، رديت ليهو وانا بقوم من المصلايه، ايوه اتفضل، فتح الباب ودخل ل جوه، قعد في السرير، وتاكل بيدينو عليهو، وكالعاده هو ساكت وانا ساكته، واقفه وماسكه المصلايه في يدي، منتظراهو يتكلم، عيوني الكنت بعاين بيها في كل مكان الا اتجاهو هو، قلبي البقيت بسمع في دقاتو الغريبه ديك،، واخيرا عيوني الرفعتها وعاينت ليهو وبسرعه نزلتها  لمن لقيتو بعاين لي، بنظره غريبه اصلي م عرفتها، اتنحنحتا عسى ولعلى يقول حاجه، ساعه لقيت م منها فايده ولسه في وضيعتو،، ناديتو بصوت شبه مسموع "منذر" ! بعد كم محاوله في مناداه ل اسمو، فاق من شرودو وقال لي هاا في حاجه؟ قلت ليهو ايوه انت! عايز تقول لي شنو؟قال لي انا؟ قلت ليهو ايوه في حاجه؟ قام ع حيلو، ميل راسو يمين وشمال بطريقه خلت رقبتو تطقطق، وبعدها قال، بس حبيت اقول ليك تعالي نصلي ركعتين سوا نبدأ بيها! قلت ليهو حاضر انت اسبقني وبلحقك، هزا لي راسو بمعنى تمام وطلع، عاينت ليهو مستغربه،، سرحت شويه بفكر في الحصل وبعدها طلعت ليهو، لقيتو منتظرني، صلينا سوا وبقينا قاعدين، بين كل ثانيه والتانيه كنت بقول امين، للدعاء البقول فيهو ، الزول البكون جاري بسرعه وفجأة يقيف، يلهث ويتنفس بصعوبه وضربات قلبو السريعه تتسمع، حرفيا ده الحصل لي... لمن حسيت بيهو مسك يدي....!!

*جانب _ منذر*
بعد الضهر كان العقد تم، وبدت معركه بين القلب والعقل، عقلي بقول لي ليه عملت كده عاجبك الحصل يعني؟! ح تقدر تكمل للنهايه؟ قلبي قال، اكيد طبعا ده الحيحصل حتى لو م كنت بتكن ليها مشاعر،لكن هي، هي عندها!! مش ده السمعتو انت اليوم داك، وكت فطور الجمعه عند خالتك سوسن" ام رحمه" وع فكره اسم ام لجين برضو سوسن علشان الناس م تتلخبط ++ لو متذكرين قصه الفطور دي في البارت الاول ) بتذكر بالصدفه كنت ماشي ب جانب المطبخ المن خلالو بتتطلع للشارع،، وسمعتها بتحكي ليها عن واحد بتحبو، في حاجه خلتني اقيف غصب عني واسمع باقي الكلام لمن سمعت كلمه" منذر" رحمه وهي بتقول ليها حاولي اتحكمي شويه في نفسك  واتقلي م تتكركبي وتجوطي، بعدين انتي زاتك م لقيتي غير منذر ود خالتي ده علشان تحبيهو،؟ ردت ليها وقالت اهو حبيتو وخلاص وم تسأليني تاني، بعدها لقيتهم سكتو وم سمعتا منهم حاجه تانيه،،  ح تقولو لي طيب ي منذر علاقه الكلام ده ب انك تمشي وتتقدم ليها شنو؟ انا حاليا ماشي معاكم حبه حبه، حاله الضياع والصياعه،
والفكره حقت اني ابقى شخص ناضج ومسؤول من نفسو وتصرفاتو، كانت ح تتحسن اذا اتزوجت! كيف دي طيب؟ م هو انا عارف او متيقن تماما انو الزواج ده بصلحنا او جزء  كبير مننا، ومعاي انا بالضبط حاسس اني ح اتخطى وامشي ل قدام بصوره كويسه ، اني اشتغل وانهك نفسي في الشغل وعارف عندي زوجه منتظراني في البيت وانا لازم اعمل كده وكده علشانه دي براها خطوه كويسه،وطريقه كمان علشان ابعد عن ال كنت فيهو وم ادي عقلي مساحه يفكر فيهو  احاول انتبه في تصرفاتي ب كلمه "متزوج" الكلمه دي م هينه والله، واهميتها كبيره،

وبعد نهار يوم طويل متعبب الزول يرجع البيت يلقى زوجتو منتظراهو وفي وشها ابتسامه وبتكون معاهو في كل خطوه من خطواتو لحدي م يبقى الشخص الهو عايزو ، دي حاجه عظيمه وسمحه شديد،،

بعدين بقولو اتزوج البحبك م الانت بتحبو لانو بالطريقه دي هو البهتم بيك وبيعرف قيمتك اكتر، ولا م كده؟!

حاولت كذا مره اتكلم معاها لكن الكلمات م اسعفتني،  طيب حتى لو جاتك الفرصه ح تتكلم عن شنو او تقول شنو؟ بس عايز تتكلم معاها وخلاص؟ لمن دخلت ليها كنت عايز اقول ليها عن السبب الدفعني للزواج، لقيت نفسي بدون م احس بفكر بيني وبين نفسي ي ترى ح تفهمني؟ وهل في داعي اقول ليها؟ وهل زي م بقولو في حب بجي بعد الزواج ولا ده كلام ساي؟ لقيت اني بفكر وم منتبه ليها، بعد الحوار الحصل بيناتنا، طلعت انتظرتها بره، بعد الصلاه والدعاء، لقيت يدي بتمش ع يدها وبتمسكها!! حسيت ببروده يديها والحاله الكانت فيها،، عملت فيها رايح وم عارف شي، سألتها مالك؟ بردانه؟ هزت براسها لا، قربت منها اكتر ورفعت راسها بطرف اصبعي، كانت ساكته وخجلانه بطريقه غريبه كده،، ناديتها بإسمها، رفعت عيونها عاينت لي ونزلتها طوالي، قلت ليها لجين عايني لي هنا، ضحكتا لمن هزت لي براسها سريع وهي نافيه بتقول لالا بعدها م عرفت اقول ليها شنو، قمت ع حيلي ومديت ليها يدي علشان اقوماا، لقيتا بتقوم سريع براها، وهي شبه جاريهه للغرفه، عاينت  للاتجاه المشت منو،طيب انا م عارف الحاصل شنو صدقوني لا بحبها لا حاجه، بس تلقائيا بلقى نفسي غريب شديد معاها، ساعه الخطوبه ولمن ابتسمت ليها، ولمن رحمه قالت لجين عملت الفطور (عند ناس خالتي) قمت ابتسمت وللمره الالف ي جماعه م بحبها،، عادي بوزع في الابتسامات!! صوت اشعار ل رساله في التلفون خلتني اشيلو واركز معاهو شويه ...

*جانبي*
قاعده في السرير، وكلي برجف، ومتوتره شديد، ي ترى ده الحب البقولو عليهو؟ خجلانه شديد من الحصل وقلبي بضرب بطريقه فظيعهه، رقدت وبقيت بفكر فيهو، بدون م أشعر لقيت نفسي نمتاا في مكاني،،

صحيت بصوت المفتاح في الباب،، قعدت في نص السرير وبقيت بتلفت، نعسانه شديد وفي نفس الوقت دايره اشوف في شنو، معقوله منذر طلع وخلاني برأي، قبلي م اقوم من السرير لقيتو بدق لي في الباب، عملت نفسي سريع نايمه ورقدت،، أمكن الموقف الحصل قبيل داك عادي بس
بالنسبه لي انا كبير وم قادره اتجاوزو خالص،، نادى اسمي كم مره لجين ، لجين، لكن م رديت عليهو، سمعت صوت الباب وهو بقفل،، قبلي م   ارفع راسي واشوف، حسيت بيهو جاي علي،،

جاني احساس انو هو قريب مني شدييدد، لمن شميت ريحه عطرو،،كتمت نفسي شديد حسيت ب شفايفو في خدي.. سمعتو قال عارفك صاحيه!!..

يتبع..